Библия кандыг-даа узуткаашкыннарга таварышса-даа, бистиң үеге чедир кадагалаттынган. Бөгүн ону кижи бүрүзү номчуп болур аргалыг. Эки очулгалыг Библияны шилип алгаш, ол чиңгине сөзүглелге дүгжүп турар деп чигзинмейн барып болур силер a. Күштүг удурланыышкыннар, үениң байдалы база сөзүглелин хажыдар дээн оралдажыышкыннар турза-даа, Библия кадагалаттынып арткан. Ол чүнүң ачызында болдунганыл? Ол ном чүзү-биле онзагай?

Библияның дыка хөй номчукчулары Павел элчин ышкаш түңнелге келген: «Бүгү Бижилге Бурганның аксындан үндүр тынган сөзү-дүр» (2 Тимофейге 3:16). Библияның кадагалаттынганынга бүзүрээр бис, чүге дизе Бурган бодунуң Сөзүн бистиң үевиске чедир камгалап, кадагалаан. Кырында чугаалашканывыс Файзал фактыларны боду шинчилээр дээш, Библияны өөренип эгелээн. Билип алган чүүлдери ону кайгаткан. Христиан делегейде нептерээн хөй өөредиглер Библияда чок деп, ол көрген. Оон аңгыда, Бурганның черге дываажаң-сесерлик тургузар дээн аазаашкыны ооң сеткилинге дыка кирген.

Файзал үлешкен: «Бо үеде бисте бар Библия — Бурганның белээ деп, ам долузу-биле бүзүрээр мен. Бурган ол хире кайгамчык улуг Октаргайны чаяап каан болганда, бодунуң Сөзүн кадагалап арттыргаш, кижилерге дамчыдып шыдаар күжү бар. Аңаа бүзүревес кижи, Бурганның күжүнге чигзинип турар. А мен Бүрүн Күчүлүг Бурганның күжүнге чигзинер хире кым мен?» (Исайя 40:8).