Хөй чугааланыр. Шуптузун тайылбырлаар ужурлуг мен деп бодава. Иисус боданырынга болгаш шын түңнелдер үндүреринге дузалаар айтырыгларны салып турган (Мф 17:24—27). Айтырыглар кичээлдерни солун кылып, өөренип турар кижиниң чүү чүвеге бүзүреп турарын болгаш материалды кайы хире шиңгээдип ап турарын билип алырынга дузалаар. Айтырыгны салгаш, харыызын шыдамыы-биле манап ал. Өөренип турар кижи шын эвес харыылаар болза, ону эдеринче далашпа. Ооң орнунга немелде айтырыгларны салып тургаш, кижи шын түңнелди үндүрер кылдыр дузала. Өөренип турар кижи чаа бодалдарны эки билип алыр кылдыр, ону далашпайн, тайылбырлап бер.

Нарыыдадыры. Сайгарып турар темага хамаарышкан шупту билир чүүлдериңни чугаалаксаар күзелиңге алыспа (Ин 16:12). Абзацтың кол бодалындан быжыг туттун. Дыка солун тодарадылгалар безин кол бодалдан чардыктырып болур. Өөренип турар кижи кол бодалды шиңгээдип алыр болза, дараазында абзацче шилчий бер.

Материалдан сырый туттун. Бистиң сорулгавыс — анаа-ла материалды өөренири эвес, а кижиниң чүрээнге чедир чугаалаары-дыр (Лк 24:32). Бурганның Сөзү салдарын чедирер кылдыр, чүгле кол шүлүктерни сайгар (2Кр 10:4; Евр 4:12). Бөдүүн чижектерни болгаш деңнелгелерни ажыгла. Ооң байдалын болгаш шажынчы көрүжүн кичээнгейге ап тургаш, материалды таарыштыр шилип ал. Мындыг айтырыгларны сал: билип ап турар чүүлүң сеткилиңге кирер-дир бе? Бо чүүлден Иегованың дугайында чүнү билип алыр-дыр бис? Бо сүмени ажыглаар болзуңза, ол сеңээ чүге ажыктыг болурул?