Бирги чүс чылда христиан кижи бүрүзү хууда дүрүглүг турбаан. Ынчалза-даа ол чүүл суртаалга Бижилгениң дузазы-биле чугаалажырынга шаптыктавайн турган (Ажч 17:2, 3). Оларны канчаар өттүнүп болур бис? Бижилгениң дузазы-биле чугаалажырда баш бурунгаар белеткенип тургаш. Ынчан кижилер-биле чугаалажырынга белен боор бис.

КАНЧААР БЕЛЕТКЕНИРИЛ? План бүрүзүнде библейжи шүлүктерни болгаш Библияның кол өөредиглерин кысказы-биле бижээн. Шүлүктерниң тайылбырын кайыын тып ап болурул? Планнарда темаларны болгаш шүлүктерни ооң мурнунда-ла дептерлеривиске сайгарып турган. Белеткенирде ол статьяларны ажыглаары эки болур. Чамдык суртаалчылар шүлүктерниң тайылбырын планнарынга бижип ап, а өскелери анаа сактып ап турар. Ол ышкаш шүлүктү тайылбырлаан чижекти тып ап болур. Удуртукчулар таарымчалыг статьяларны силерге тып алырынга күзелдии-биле дузалаар. Планнарда тайылбыр материал эвээш болганда, өөредип турар кижи эки белеткенип алгаш, өөренип турар кижиге материалды таарыштыр шилиир ужурлуг. Ынчап кээрге, Библияны өөредир кол дептер чокта безин, өөренип турар кижиге бүзүрелин быжыглаарынга, Бурганче чоокшулаарынга болгаш шенелделерге белен болурунга дузалап болур бис.

КАТАПТААШКЫН. План бүрүзүнүң төнчүзүнде немелде библейжи шүлүктер бар, оларны номчааш, тайылбырлаары чогуур. Материалды катаптаары-биле, ол шүлүктерге айтырыгларны баш удур белеткеп алыры чугула. Немелде статьяларны ажыглаар болзуңза, материалды ында бердинген айтырыглар-биле катаптап болур.

СОРУЛГАНЫ ЧЕДИП АП БОЛУР СИЛЕР. Павел элчин Бижилгениң дузазы-биле чугаалажып өөренип алган (Ажч 17:2). Ону өөренип алыр дизе, белеткел херек. Бир эвес үени аңгылап, кызар болзуңза, ол буянныг херекке бүрүнү-биле чепсегленген боор сен (2Тм 3:17).