Чылдың-на Сактыышкын кежээзинче суртаалдаарын соксаткан хөй бараалгакчылар кээп турар. Кажан бир ол акы-угбалар амыдырал дээш оруун эгелеп алза-даа, үе эрткенде олар кошкай берген (Евр 12:1). Чылдагааннары аңгы-аңгы, чамдыызын «Вернись к Иегове» деп брошюрадан номчуп болур. Ынчалза-даа ол христианнар Иеговага үнелиг хевээр, чүге дизе Ол Бодунуң Оглунуң үнелиг ханы-биле оларны садып алган (Ажч 20:28; 1Пт 1:18, 19). Катап чыышче эглип кээринге, оларга канчаар дузалап болур бис?

Чиде берген хураганны дилээн кадарчы ышкаш, удуртукчулар суртаалдаарын соксаткан бараалгакчыларны дилеп, оларга дузалажырын кызып турар (Лк 15:4—7). Иегованың ынакшылы болгаш сагыш човаашкыны оон көскү (Иер 23:3, 4). Суртаалдаарын соксаткан бараалгакчыларга чүгле удуртукчулар эвес, бис шупту дузалажып болур бис. Күжениишкиннеривисти Иегова эскерер, Ол бисти суртаалдаарын соксаткан бараалгакчыларга илереткен энереливис дээш шаңнаар (Уч 19:17; Ажч 20:35). Кымга ындыг дузаны саадатпайн көргүзүп болур сен, боданып көр!

«СУРТААЛДААРЫН СОКСАТКАН БАРААЛГАКЧЫЛАРГА КИЧЭЭНГЕЙ» ДЕП ВИДЕОРОЛИКТИ КӨРГЕШ, ДАРААЗЫНДА АЙТЫРЫГЛАРГА ХАРЫЫЛА:

• Эбби суртаал үезинде суртаалдаарын соксаткан танывазы угбавыска таварышкаш, чүнү кылганыл?

• Суртаалдаарын соксаткан бараалгакчыларга дузалаарының мурнунда, чүге удуртукчулардан сүме айтырарыл?

• Лораже катап кээриниң мурнунда Эбби канчаар белеткенип алган?

• Ынакшылды, кызымаккай болгаш шыдамыккай чорукту илередип тургаш, Эбби Лорага дузалаарын канчаар оралдашканыл?

• Лука 15:8—10-да Иисустуң бижээн угаадыглыг чугаазындан, чүге өөренип ап болур бис?

• Эбби биле удуртукчу акыларның демниг үндүрген күжениишкиннери кандыг түңнелдиг болган?