ОЛ ЧҮГЕ ЧУГУЛА? Коринфичилерге бирги чагаа — Павелдиң кады бүзүрээн ха-дуңмазын быжыктырар дээш бижээн 14 чагааларының бирээзи. Чагаалар амдыгаа чедир харылзажырының эптиг аргазы. Чагаада колдуунда бодамчалыг бижиттинген сөстер бар боор, чүге дизе ону бижип турар кижиниң эки боданып алыр үези турган база ооң соонда ол чагаазын чаңгыс удаа эвес катап номчуур болгай. Чагаалар дузазы-биле төрелдерге болгаш таныыр улуска суртаалдаары эптиг. Оон аңгыда, хууда ужуражып чугаалажыры болдунмас улуска база чагаалар таварыштыр херечилеп болур. Чижээ, ол дээрге алыс шынны сонуургаан, ынчалза-даа бажыңынга тудуп аары берге улус, азы хааглыг девискээрлерде турар каът бажыңнарда база ырак кожууннарда чурттап турар улус. Чагааларны, ылаңгыя, танывазывыс улуска бижип тура, чүнүң дугайында сактыры чугула?

ОНУ КАНЧААР КЫЛЫРЫЛ?

• Улус-биле хууда чугаалажып тургаш, чүнүң дугайында чугаалажыр ийик сен, ону бижи. Эгезинде бодуңнуң ат-сывың бижээш, чагааны чүге бижип орарыңны тода тайылбырлап бер. Ооң соонда, кижиниң үзел-бодалын билип алыр айтырыгны салып болур сен. Библияны халас өөренириниң дугайында азы өөренир дептерлерниң бирээзинден кезек темаларны бижип каг.

• Допчу тодаргай бижи. Чагааны эмин эрттир узун кылдыр бижээн ажыы чок, чүге дизе улус түвексине берип болур.

• Шын бижээниңни хына. Чагаа номчуттунгур-дур бе, эвилең-ээлдек бижиттинген бе, хөлүн эрттир шыңгыы хевирде эвес бе, хөөннү эки бе? Бир эвес чагааны почта таварыштыр чорудуп турар болзуңза, маркаларны четчир кылдыр чыпшырып каг.

• Удуртукчу акылар-биле сүмелеш.