ОЛ ЧҮГЕ ЧУГУЛА? Телефон таварыштыр суртаалдаары * — буянныг медээни эчизинге чедир херечилээр аргаларның бирээзи (Ажч. 20:24). Ынчалдыр кандыг-бир чылдагаан-биле амы-хууда барып шыдавазывыс улуска, Библияның медээзин чедирер арга тыптып кээр.

ОНУ КАНЧААР КЫЛЫРЫЛ?

• Белеткенип ал. Улуска солун болур теманы шилип ал. Оон канчаар чугаалажырын чижеглей бижип ал. Чижек чугааң, электроннуг херекселиң дээн ышкаш, дузалыг апаар өске херекселдериң чаныңга чыдар болза эки. JW Library^® капсырылганы азы jw.org^® деп сайтыны баш удур ажыдып ал.

• Сула салдынып ал. Оожургап алгаш, хүлүмзүрүп, имнээшкин шимчээшкиннерин кылбышаан чугаалажыр болза эки. Чугаалажып турар кижи сени көрүп турар ышкаш кылдыр алдын. Чугаага херекчок доктаашкыннар кылба. Өске акы-угбалар-биле ажылдаш. Телефонда кижи айтырыг салырга, ону эжиң дыңнап кааш, харыызын тыптарынга дузалаптар кылдыр катап чугаала.

• Дараазында кандыг теманы сайгарарын дугуржуп ал. Чугаалашкан кижиң сонуургаар болза, дараазында телефон таварыштыр сайгарып болур теманы сүмеле. Оон аңгыда ол кижиге ном-дептерни сүмелээш, электроннуг азы анаа почта таварыштыр чортуп азы бодуң чедирип берип болур сен. Азы болза, статьяже азы видеороликче чортуптар айтыгны электроннуг почта азы мессенджер таварыштыр чортуп болуруңну чугаала. Эптиг арга турда, Библия өөренир онлайн-курс (чамдык дылдарда чок) дугайында чугаалап бер азы сайтывыста өске чүүлдү сонуургат.