Библияны эки билип алырын күзээр-дир силер бе?

 Чүге Библияны номчуурул?

БИБЛИЯ кандыг-даа өске ном-биле деңнеттинмес. Ында ынакшыл-биле долган Бурганның удуртулгазы бар (1 Фессалоникажыларга 2:13). Ооң сүмелерин ажыглаар болзуңарза, ол силерге дыка улуг ажык-дузалыг болур. Силерниң Бурганга ынакшылыңар өзер, ынчангаш «кандыг-даа буянныг база болбаазын ачы-буян хайырлалдарының» Хайырлакчызы-биле чоокшулажып ап болур силер (Иаковтуң 1:17). Аңаа канчаар мөргүүрүн билип алыр силер, а берге үеде ооң ажык-дузазын бодуңарга эскерип болур силер. Бир эвес силер чуртталгаңарны Библияда бердинген дүрүм-хоойлуга дүүштүр чурумчудуп алыр болзуңарза, Бурган силерге мөңге чуртталганы белек кылдыр бээр (Римчилерге 6:23).

Библияда дыка хөй айтырыгларны чырыдып турар алыс шын бар. Сая-сая кижилерни бүрүнү-биле чагырган, шын эвес бодалдардан Библияның билиглери хостап турар. Чижээлээрге, сүнезин дугайында алыс шынны билир болганывыста, өлген улус биске хора чедирип болур азы бистиң чок апарган чоок кижилеривис хилинчектенип чоруур деп, коргуштан хосталып турар бис (Иезекииль 18:4). Өлген кижилер катап дирлип кээр деп, библейжи өөредиг чоок кижилерин чидирген улустуң сагыш-сеткилин оожургадып турар (Иоанның 11:25). А дээрниң каржы  төлээлериниң дугайында алыс шынны билир болганывыста, кара күштер-биле харылзаа тудар айыылдардан чайлап, база делегейде чүге ынча хөй хилинчек-човалаң барын билип ап болур бис.

Бурганның берген библейжи дүрүмнери мага-бодувус кадык болурунга дузалыг амыдыралды чоргузарынга бисти өөредип турар. Ынчалдыр, «бодун туттунуп билири» эки кадыкшылды камнаарынга дузалыг (1 Тимофейге 3:2). «Мага-ботту болгаш сүлдени бужартадыптар бүгү чүүлден арыгланыр» болзувусса, хөй-ле аарыглардан бодувусту камгалап алыр бис (2 Коринфичилерге 7:1). Библиядан алдынган Бурганның сүмелери өг-бүле чуртталгазынга аас-кежикти чедип алырынга болгаш бодунга хүндүткелдиг болурунга дузалажып турар (1 Коринфичилерге 6:18).

Бурганның Сөзү ёзугаар чурттаар болзуңарза, оон артык аас-кежиктиг апаар силер. Библияның берип турар билиглери чуртталгага амыр-дышты болгаш сагыш-сеткилге оожургалды тып алырынга, ол ышкаш идегелдиг болурунга дузалажып турар. Оон аңгыда ол билиглер биске кээргээчел чорукту, ынакшылды, өөрүшкүнү, амыр-тайбыңны, буянныг чорукту болгаш бүзүрел дээн ышкаш эки шынарларны сайзырадырынга дузалажыр (Галатчыларга 5:22, 23; Эфесчилерге 4:24, 32). Ол мөзү-шынарларның  ачызында бис оон-даа эки ашак-кадай, оон-даа эки ада-ие болгаш оон-даа эки ажы-төл болу бээр бис.

Силер келир үе дугайында кажан-бир боданган силер бе? Библейжи өттүр билген медеглелдер-биле алырга, төөгүнүң онзагай үезинде чурттап турар бис. Библияда амгы делегейде турар байдал дугайында баш бурунгаар чугаалаанындан аңгыда, удавас Бурган бистиң черивисти кайгамчык Дываажаң кылыптарының дугайында база чугаалап турар (Ажыдыышкын 21:3, 4).

Библияны билип алырынга дуза

Силер Библияны номчуп шенеп турган чадавас силер, ынчалза-даа ону билип алыры ындыг кончуг белен эвес деп, көрген боор силер. Библиядан харыыларны кайыын тып ап болурун билбес боор силер. Ындыг чүүл-биле хөй кижилер таваржып турар. Биске шуптувуска Библияны билип алырынга дуза хереглеттинип турар. Иегованың Херечилери 235 чуртта сая-сая кижилерге Библияны төлевир чок өөрениринге дузалажып турар. Олар силерге база амырап дузалажыр.

Библияны кол өөредиглерден эгелээш, система аайы-биле өөренири эң-не дээре (Еврейлерге 6:1). Ынчан чоорту «кадыг чемни», чок болза ханы алыс шынны шиңгээдип алыры силерге белен болур (Еврейлерге 5:14). Бир дугаарында Библияның бодун өөренир, а аңаа үндезилеттинген үндүрүглер — чижээлээрге, «Бурган бистен чүнү негеп турарыл?» деп дептер — янзы-бүрү темаларны сайгарып турар библейжи текстерни билип алырынга дузалажып турар.

 Библияны эки билип алыр дээш, неделя санында үени үндүреринге белен силер бе?

Библияны силерге эптиг үеде болгаш силерге таарымчалыг черге өөренип болур. Хөй кижилер бодунуң бажыңында өөренип турар. Чамдыызы телефон таварыштыр безин өөренип турар. Кичээлдер колдуунда тускайлаң кылдыр эртип турар. Ынчаарга кижиниң хууда байдалын, ооң эртем-билииниң деңнелин көрүп барымдаалап турар. Кандыг-даа шылгалдаларны дужааган херээ чок, сайгарылга чугаа хостуг, шөлээн байдалга эртип турар. Шак ындыг чугаалажыышкын үезинде силерни дүвүредип чоруур айтырыгларның харыызын тып ап, ол ышкаш Бурганга канчаар чоокшулажырын билип алыр силер.

Өөредилге төлевир чок эртип турар (Матфейниң 10:8). Ол шупту кижилерге, оларның чүдүлгезинден болгаш хууда үзел-бодалдарындан хамаарылга чокка сүмелеттинип турар. Кол-ла чүве, олар Бурганның Сөзүн шын сеткили-биле эки билип алыксап турар-ла болза.

Сайгарылга чугаа үезинде кым киржип болур? Бүгү силерниң өг-бүлеңер. Күзээр болзуңарза, силерге каттыжар кылдыр, эш-өөрүңерни чалап ап болур силер. Азы чок болза, күзээр болзуңарза, өөредилге силерниң-биле хууда эртип болур.

Хөй кижилер Библияны өөрениринге неделяда бир шакты үндүрүп турар. Бир эвес силер оон хөй азы оон эвээш үени үндүрүп шыдаар болзуңарза, Херечилер үени силерниң байдалыңарга дүүштүр кызып таарыштырып болур.

 Өөрениринче чалалга

Бис силерге Иегованың Херечилери-биле харылзажырын сүмелеп тур бис. Ону кылыптар аргаларның бирээзи — адаанда айыткан адрестерниң бирээзинче бижиири. Херечилерниң кайы-бирээзи силерниң-биле төлевир чок Библияны өөренир кылдыр, сагыш салыр бис.

□ Меңээ «Бурган бистен чүнү негеп турарыл?» деп дептерни чоргузуп бериңерем.

□ Библияны бажыңга төлевир чок өөренирин сонуургап тур мен.

Еврей Бижиктер (Эрги Дугуржулга-чагыг) Синодалдыг очулгадан, а Христиан Грек Бижиктер (Чаа Дугуржулга-чагыг) — «Чаа Дугуржулга-чагыг» очулгазындан алдынган.