1. Бир эвес бистиң шажынывыс Бурганга таарымчалыг болза, кандыг йөрээлдерни алыр бис?

 ИЕГОВА БУРГАН биске аажок ынак болгаш, ооң удуртулгазы бистиң чуртталгавыска дузалыг болурун ол күзеп турар. Бурганга шын бараалгап тургаш, аас-кежиктиг болуп, хөй бергелерден чайлап болур бис. Оон аңгыда, Бургандан дузаны болгаш йөрээлдерни база алыр бис (Исаия 48:17). Ынчалза-даа Бурганның дугайында алыс шынны өөредип турар бис деп, чугаалап турар чүс-чүс шажын угланыышкыннары бар. Ынчалзажок оларның Бурганның дугайында база ооң негелделериниң дугайында билиглери аажок ылгалып турар.

2. Иегова кандыг шажынны шын деп санап турарын, канчап билип алырыл, база ону билип алырынга кандыг чижек дузалаарыл?

² Иегова кандыг шажынны шын деп санап турарын, канчап билип алырыл? Ону билип алырда, шупту билдингир шажыннарның өөредиглерин шинчилеп, деңнээн херээ чок. Библия херек кырында чүге өөредип турарын база ында алыс шын шажын дугайында чүнү чугаалап турарын билип алыры чедер. Бир чижекти көрээлем. Хөй чурттарда меге акшаны кылып турары — нарын айтырыгларның бирээзи. Бир эвес сеңээ меге акша тодарадыр даалга берген болза, канчаар сен? Шупту меге акшаларның хевирлерин шинчилеп чыдып бээр сен бе? Таанда. Ооң орнунга ёзулуг акшаларны шинчилээринче үени үндүрери шын болур. Ёзулуг акша кандыг болурун билип алгаш, меге акшаны тодарадып шыдаар сен. Ооң-биле  дөмей, Бурган кандыг шажынны шын деп санап турарын билип алгаш, меге шажыннарны тодарадып шыдаар сен.

3. Иисустуң сөстери-биле алырга, Бурганга таарымчалыг болур дизе, чүнү кылыр херек?

³ Иегова боду канчаар күзеп турарыл, ынчаар ону ханы хүндүлээри чугула. Бурганга шупту шажыннар таарымчалыг деп, хөй улус бодап турар. Ынчалзажок Библия ынчаар өөретпейн турар. «Бурганга бүзүрээр мен» деп чугаалаары безин эвээш. «Олар: „Бурганны билир бис“ дижирлер, ынчалза-даа ажыл-херээ-биле Ону хүлээп көрбестер-дир. Олар чииртим, дыңнангыр эвес база кандыг-даа буянныг чүүл кылыр харык чок улус-тур» — деп, Павел элчин чугаалаан (Титке 1:16). Бурганга таарымчалыг болур дизе, ооң негелделериниң дугайында билип алгаш, оларны кызып сагыыры чугула. Бурганның күзел-соруун күүсетпейн турар улустарны Иисус «бачыт үүлгедикчилери» деп адаан (Матфейниң 7:21—23). Меге шажын меге акшалар дег, ёзулуг үнези чок. Оон артык, ол айыылдыг.

4. Иисус кандыг ийи орук дугайында чугаалап турган, база олар кайнаар чедирер?

⁴ Иегова кижи бүрүзүнге черге дываажаңга мөңге чурттаар арганы берген. Ону чедип алырда, Бурганга шын бараалгап, аңаа таарымчалыг болур дээш, кызары чугула. Хөй улустуң ону кылыр хөңнү чогу арай харааданчыг-дыр. Ынчангаш Иисус чугаалаан: «Тар эжик дамчып кириңер, чүге дээрге өлүм эжии алгыг, а ынаар чедире бээр орук делгем, хөй улус ол орук-биле бар чыдар. Ынчалза-даа амыдыралдың эжии тар, а ынаар чедире бээр орук кызаа, ону тып чедип кээр улус эвээш» (Матфейниң 7:13, 14). Шын шажын мөңге чуртталгага, а меге шажын өлүмге чедирер. Иегова кымның-даа өлүрүн күзевейн турар, ынчангаш бодунуң дугайында алыс шынны билип алыр арганы ол шупту кижилерге берип турар (2 Пётрнуң 3:9). Бистиң чуртталгавыс Иегованы ханы хүндүлеп турарывыстан хамааржыр.

5. Алыс шын шажынның талалакчыларын канчаар танып ап болур?

⁵ «Амыдыралдың эжиинче» чедирер орукту канчаар тып алырыл? Алыс шын шажынны, ооң талалакчылары бодун канчаар алдынып турарындан танып ап болур деп, Иисус  чугаалаан. «Оларны кылган ажылының үре-түңнелинден танып аар силер,— деп ол чугаалааш, немээн:— Шак ынчаар эки ыяш чаагай чимис бээр, а багай ыяш багай чимис бээр» (Матфейниң 7:16, 17). Өскээр чугаалаарга, алыс шын шажынга хамааржып турар кижилерни оларның шажын өөредиглеринден болгаш чурумундан танып ап болур. Алыс шын Бурганның бараалгакчылары бачыттыг болгаш чазып турар-даа болза, ниитизи-биле ооң күзел-соруун күүседиринче олар чүткүп турар. Алыс шын шажынга хамааржыр улустарны танып алыр алды онзагай демдекти сайгарып көрээлем.

6, 7. Бурганның бараалгакчылары Библияга кандыг хамаарылгалыг база Иисус кандыг үлегер көргүскен?

⁶ Бурганның бараалгакчыларының өөредиглери Библияга үндезилеттинген. «Бурган Бижилгени бүрүнү-биле хей-аът киирген болгаш, ол алыс шынны өөредиринге, чазыгларны айтып, эдеринге, Бурганга шынчы амыдыралды суртаалдаарынга ажыктыг. Ындыг болганда Бурганга бараан болган кижи бүрүнү-биле мергежээн база кандыг-даа буянныг херек кылыры-биле чепсегленген боор» — деп Бурганның Сөзүнде чугаалаан (2 Тимофейге 3:16, 17). Бүзүрели чаңгыс аай ха-дуңмага Павел элчин мынча деп бижээн: «Бистен дыңнааныңар Бурганның медээзин хүлээп аарда, ону кижи сөзү дег эвес, а ооң херек кырында кандыызы дег: бүзүрей бээриңерге, силерге күчүлүг салдар чедирип турар Бурганның сөзү дег кылдыр хүлээп алган силер» (1 Фессалоникажыларга 2:13). Алыс шын шажынның өөредиглери кижилерниң ёзу-чаңчылдарынга болгаш үзел-бодалдарынга үндезилеттинмээни моон көскү-дүр. Олар Бурганның Сөзүнге — Библияга үндезилеттинген.

⁷ Иисус Христос бодунуң өөредиглерин Бурганның Сөзүнге үргүлчү үндезилеп чораан болгаш бистерге кайгамчык үлегер көргүскен. «Сээң сөзүң дээрге-ле алыс шын ол-дур» — деп, дээрде Адазынга мөргүп тургаш, ол чугаалаан (Иоанның 17:17). Иисус Бурганның Сөзүнге бүзүреп, үргүлчү Бижилгелер-биле дүүштүр өөредип турган. Барымдаалар чугаалааш, үргүлчү-ле: «Бижилгеде бижээн-дир» — дээр турган (Матфейниң 4:4, 7, 10). Ооң соонда Бижилгелерни шээжи-биле чугаалап турган. Ооң-биле дөмей, бо үеде Бурганның бараалгакчылары боттарының үзел-бодалдарын таратпайн турар.  Олар Библияны — Бурганның Сөзү деп бүзүрээр, ынчангаш шупту өөредиглерин чүгле аңаа үндезилеп турар.

8. Иеговага ыдыктыг бараалгал күүседири дээрге, чүү дээни ол?

⁸ Алыс шын шажынның талалакчылары Бурган кылдыр чүгле Иегованы ханы хүндүлээр болгаш ооң адын бүгү улуска чарлап турар. «Ырап чор, эрлик! Бижилгеде: „Бодуңнуң Дээрги-Бурган-Чаяакчыңга мөгейип чор, чүгле Аңаа бараан бол“» — деп, Иисус чугаалаан (Матфейниң 4:10). Алыс шын христианнар Бурган кылдыр чүгле Иегованы ханы хүндүлээр. Олар аңаа ыдыктыг бараалгал кылып, өске улуска ооң адының болгаш кайгамчык шынарларының дугайында чугаалап турар. «Олар Сени дың чаңгыс, Дээрги-Чаяакчы [„Иегова“, ЧД] деп аттыг, бүгү чер-делегейни чагырган Дээди Өрүкү деп билип алзын» — деп Библияда чугаалаан (Ырлар 82:19). Иисус кижилерни Бурган-биле таныштырып турган, ынчангаш аңаа хамаарыштыр биске үлегер көргүскен. «Сээң бо делегейден алгаш, Меңээ хүлээдип берген улузуңга Сээң адыңны ажыдып бердим» — деп, Иеговага ол мөргүп тургаш, чугаалаан (Иоанның 17:6). Бөгүн алыс шын Бурганның бараалгакчылары өске кижилерге ооң адының, үзел-бодалының, кайгамчык шынарларының дугайында база өөредип турар.

9, 10. Алыс шын христианнар бот-боттарынга ынакшылды канчаар илередип турар?

⁹ Бурганның бараалгакчылары бот-боттарынга ак сеткилдиг, бодун хайыралавас ынакшылды илередип турар. «Силерниң араңарга ынакшыл-ла турар болза, силерни Мээң өөреникчилерим дээрзин делегейде хамык улус танып алыр» — деп, Иисус чугаалаан (Иоанның 13:35). Бир дугаар христианнар ындыг ынакшылды бот-боттарынга илередип турган. Ёзулуг ынакшыл аңгы ызыгуур, язы-сөөк ылгаар чорукту ажып эртип, кижилерни бузулбас ха-дуңма хандыкшылының үзүлбес харылзаазы-биле тудуштуруп турар (Колоссчуларга 3:14). Меге шажынның чүдүкчүлериниң аразында ындыг ынакшыл чок. Ону кайыын билир бис? Олар чаңгыс чүдүлгеде улустарын язы-сөөк болгаш төрел-аймак аңгылажыышкыны дээш, өлүрүп турар. Алыс шын христианнар боттарының бүзүрели чаңгыс аай ха-дуңмазын азы өске кижилерни өлүрер дээш, боо-чепсек тутпас. «Кым — Бурганның ажы-төлү, а кым —  эрликтиң ажы-төлү боорун мынчаар билип ап болур: буян тарывас болгаш бодунуң эжинге ынак эвес кижи Бурганга хамаарышпас. Бот-боттарывыска ынак болур ужурлуг бис... Эрликке алзыпкаш, бодунуң дуңмазын өлүрүп каан Каинге дөмейлешпес ужурлуг бис» — деп Библияда чугаалаан (1 Иоанның 3:10—12; 4:20, 21 ).

¹⁰ Ынчалза-даа ёзулуг ынакшылдыг болуру — чүгле кижи өлүрбес эвес, а оон-даа ханы уткалыг. Алыс шын христианнар өске кижилерге дузалажып, бүзүрели чаңгыс аай ха-дуңмаларын деткиир дээш, бодунуң үезин, күжүн болгаш акша-хөреңгизин өргүүрүнге белен (Еврейлерге 10:24, 25). Олар берге үелерде бот-боттарын деткижип, бодун шынчы кылдыр алдынып турар. Олар «бүгү улуска буяндан көргүзүп чоруулу» деп библейжи сүмени күүседип турар (Галатчыларга 6:10).

11. Бурган камгалалды чүгле Иисус Христосту таварыштыр берип турар деп, чүге миннири чугула?

¹¹ Бурган камгалалды чүгле Иисус Христосту таварыштыр бээр деп, алыс шын христианнар миннип турар. «Камгалал чүгле Оон кээр, чүге дээрге, бисти ооң ачызында камгалал алзын дээш, кижи амытанга берип каан өске ат бүгү чер-делегейде чок» — деп Библияда чугаалаан (Ажыл-чорудулга 4:12). Иисус дыңнангыр кижилер дээш, бодунуң амы-тынын берген деп 5-ки эгеден билип алдывыс (Матфейниң 20:28). Ол ышкаш Бурган ону бүгү чер кырын башкарар дээрде Чагыргазының Хаанны кылдыр томуйлаан деп билип алдывыс. Бир эвес мөңге чурттаарын күзеп турар болзувусса, Иисуска дыңнангыр болуп, ооң өөредиглерин эдерери чугула. Ынчангаш Библияда чугаалаан: «Оглунга бүзүрээн кижи мөңге амыдыралдыг болур. А Оглун тооп дыңнаваан кижи мөңге амыдыралды көрбес» (Иоанның 3:36).

12. «Бо делегейден эвес» дээрге чүү дээни ол?

¹² Алыс шын Бурганның бараалгакчылары бо делегейден аңгыланган. Шииткел үезинде Иисус рим чагырыкчы Пилатка: «Мээң Чагыргам бо делегейден эвес» — деп чугаалаан (Иоанның 18:36). Иисустуң шупту алыс шын талалакчылары кайы-даа чуртка чурттап чорза, боттарын дээрде Чагырганың хамаатылары деп санап турар, ынчангаш бо делегейниң политиктиг херектеринге бичии-даа киришпейн турар. Олар маргыштыг херектерге болгаш демиселдерге киришпес. Ынчалза-даа  Иегованың бараалгакчылары өске улуска политиктиг партияларже киреринге, бодунуң кандидатуразын бадыладырынга, база соңгулдаларга киржиринге шаптыктавас. Алыс шын христианнар политиктиг херектерге киришпес-даа болза, олар хоойлуга дыңнангыр бооп турар. Чүге? Чүге дээрге Бурганның Сөзү: «Үстүнден башкарган [күрүне] эрге-чагыргага чагыртып чорзун» — деп кыйгырып турар (Римчилерге 13:1). Ынчалза-даа бир эвес күрүнениң хоойлузу Бурганның хоойлузунга чөрүшкек апарза, алыс шын христианнар элчиннерниң үлегерин өттүнүп турар, а олар мынча дээн: «Кижилерге  эвес, а Бурганга колдадыр чагыртыр ужурлуг бис» (Ажыл-чорудулга 5:29; Марктың 12:17).

13. Иисус Христостуң алыс шын талалакчыларынга Бурганның Чагыргазы дээрге чүл, база олар кандыг ажыл чорудуп турар-дыр?

¹³ Иисус Христостуң алыс шын талалакчылары Бурганның Чагыргазы — кижи төрелгетенниң чаңгыс идегели деп чарлап турар. Иисус баш бурунгаар чугаалаан: «Дээрниң Чагыргазының дугайында Буянныг Медээни бүгү делегейге, хамык чоннарга медеглээн турар, бүгү чүвениң төнчүзү чүгле ооң соонда кээр» (Матфейниң 24:14). Иисус Христостуң талалакчылары кижилерни черде чазактарга эвес, а Бурганның Чагыргазынга идегээринче кыйгырып турар, чүге дээрге кижи төрелгетенниң берге айтырыгларын чүгле ол шиитпирлеп шыдаар (Ырлар 145:3). «Сээң Чагыргаң чедип келзин. Дээрге дег, черге база Сээң күзел-сорууң чогуп бүтсүн» деп тура, Иисус дээрде чазактың дугайында мөргүүрүн өөредип турган (Матфейниң 6:10). Ол Чагырга «ол бүгү [амгы үеде турар] күрүнелерни бузуп, чылча шаапкаш, оларны узуткап кааптар, а боду кезээ мөңгеде турар» деп Библияда баш бурунгаар чугаалаан (Даниил 2:44).

14. Кандыг шажынны алыс шын деп адап болур?

¹⁴ Үстүнде чугаалаан чүүлге хамаарыштыр бодуңдан айтырып көрем: кандыг шажынның өөредиглери долузу-биле Библияга үндезилеттинген? Иегованың адын кым бүгү улуска чарлап турар? Кым бот-боттарынга ылап-ла ынак база Иисус Христоска бүзүрелин илередип турар? Бо делегейниң херектеринге кым киришпейн турар база Бурганның Чагыргазы — кижи төрелгетенниң чаңгыс идегели деп кым чарлап турар? Бо шупту негелделерге кым дүгжүп турарыл? Ол дээрге Иегованың Херечилери деп, барымдаалар тодаргайы-биле херечилеп турар (Исаия 43:10—12).

15. Бурганга бүзүрелден аңгыда, чүү херек?

¹⁵ Бурганның сеткилинге кирер дизе, аңаа бүзүрээри эвээш. Чүге дээрге буктар безин Бурган бар деп бүзүреп турарын Библияда чугаалаан (Иаковтуң 2:19). Ынчалза-даа олар Бурганның күзелин күүсетпейн турар, ынчангаш Бурган оларны эки деп санавайн турар. Бурганның сеткилинге кирер дизе,  ол бар деп бүзүрээринден аңгыда, ооң күзел-соруун күүседири чугула. Меге шажындан үнгеш, алыс шын шажынга каттыжар болзувусса эки.

16. Бир эвес бис меге шажын-биле харылзаалыг болзувусса, чүнү канчаар ужурлуг бис?

¹⁶ Меге шажын-биле ниити чүвүс-даа чок болур ужурлуг деп, Павел элчин көргүскен. «Ынчангаш оларның аразындан үне бериңер, аңгыланып алыңар — деп Дээрги-Чаяакчы чугаалап турар,— арыг эвес чүүлге дегбеңер, Мен ынчан силерни хүлээп аар мен» — деп, ол бижээн (2 Коринфичилерге 6:17; Исаия 52:11). Ынчангаш алыс шын христианнар меге шажын-биле харылзаалыг бүгү чүүлден ойталап турар.

17, 18. «Өндүр улуг Вавилон» деп чүл база оон дүрген-не үнери чүге чугула?

¹⁷ Меге шажынның шупту угланыышкыннарын Библияда «Өндүр улуг Вавилон» деп адаан a (Ажыдыышкын 17:5). Ол ат бурунгу Вавилон хоорайны сагындырар. Суг халавының соонда, аңаа меге шажын тывылган. Меге шажында калбаа-биле нептерээн хөй шажын өөредиглери болгаш ёзулалдар шак ол бурунгу хоорайга тывылган. Чижээ, Вавилоннуң чурттакчылары үш арынныг бурганнарга чүдүп чораан. Үш арынныг бурган — бөгүн хөй шажыннарның кол өөредии болуп турар. Ынчалза-даа чүгле чаңгыс алыс шын Бурган — Иегова бар, а Иисус Христос — ооң Оглу деп, Библия тодазы-биле өөредип турар (Иоанның 17:3). Оон аңгыда, өлүм соонда улаштыр чурттаар база хилинчектенип болур өлүм чок сүнезин кижиде бар деп, Вавилоннуң чурттакчылары бүзүреп турган. Бөгүн өлүм чок сүнезин дугайында өөредиг, ол ышкаш алдыы оранның дугайында өөредиг шажыннарның хөй кезиинде калбаа-биле нептерээн.

¹⁸ Вавилоннуң шажын өөредиглери бүгү делегейде тараттынган болганда, амгы Өндүр улуг Вавилон делегей чергелиг меге шажынның ниити бөлүүн илередип турар. Ол ниити бөлүк хенертен узуткадыр деп, Бурган баш бурунгаар чугаалаан (Ажыдыышкын 18:8). Өндүр улуг Вавилон-биле холбашкан бүгү чүүлден адырлып алыры кайы-хире чугулазын, ам билип  тур сен бе? Амдыызында үе турда, меге шажындан дүрген-не үнериңни Иегова Бурган күзеп турар (Ажыдыышкын 18:4).

19. Иеговага бараалгаашкын сеңээ чүнү эккээрил?

¹⁹ Меге шажын-биле харылзааны үзер деп турарыңны билгеш, чамдык кижилер сээң-биле чугаалашпайн барып болур. Ынчалзажок Иеговага ооң чону-биле бараалгап тургаш, чидиргениңден-даа артык хөйнү тып алыр сен. Бүгү чүвезин каапкаш, Дээргизиниң соондан эдерип чорупкан Иисустуң бирги өөреникчилери дег, сен база христиан хуралдан дыка хөй ха-дуңмаларны тып алыр сен. Миллион-миллион алыс шын христианнардан тургустунган, ёзулуг ынакшылды илередип турар делегей чергелиг өг-бүлениң кежигүнү болуп шыдаар сен. Оон артык, «келир үеде» мөңге чурттаар кайгамчык идегелдиг апаар сен (Марктың 10:28—30). Бүзүрелиң дээш, сээң-биле чугаалашпайн барган улус, үе эрткен соонда, библейжи өөредиглерни билип алыксай бээр, база Иегованың бараалгакчылары апаар чадавас.

20. Алыс шын шажынга хамааржып турар кижилерни чүү манап турарыл?

²⁰ Удавас Бурган бо каржы тургузугну узуткап каапкаш, Чагырганың башкарылгазының үезинде чаа, шынчы делегейни тургузуптар деп, Библия өөредип турар (2 Пётрнуң 3:9, 13). Ынчан чуртталга кайы-хире кайгамчыктыг болур-дур! Чер кырынга шын болгаш Бурганга таарымчалыг чүгле чаңгыс шажын артар. Алыс шын Бурганның бараалгакчыларынга ам дораан катчыры-биле, күжениишкиннерни кылыры мерген угаанныг боор эвес-тир бе?