1. Кандыг үлегер мөргүлдү сайгарып көөр бис?

 ИИСУС ХРИСТОС өөреникчилерин мөргүп өөредип тургаш, ханы уткалыг үлегер мөргүл берген. Ол мөргүлдүң баштайгы үш дилээ Библия херек кырында чүге өөредип турарының дугайында оон-даа хөйнү билип алырыңга дузалаар.

2. Иисус бодунуң үлегер мөргүлүнче кандыг үш дилег кииргенил?

² Үлегер мөргүлдүң эгезинде Иисус мынча дээн: «Мынчаар мөргүп чоруңар: „Дээрде Адавыс! Сээң адың алдаржызын! Сээң Чагыргаң чедип келзин. Дээрге дег, черге база Сээң күзел-сорууң чогуп бүтсүн“» (Матфейниң 6:9—13). Ол үш дилегниң утказы кандыгыл?

3. Бурганның Чагыргазының дугайында чүнү билип алыр ужурлуг бис?

³ Бурганның адының дугайында хөйнү билип алган бис. Ынчангаш ооң күзел-соруу кандыгыл, база Бурган кижилерге чүнү кылганын болгаш келир үеде чүнү кылырының дугайында чугаалаштывыс. «Сээң Чагыргаң чедип келзин» деп мөргүүрүн Иисус бисти өөредип тургаш, чогум чүнү барымдаалап турганыл? Бурганның Чагыргазы деп чүл? Ол Бурганның адын канчаар ыдыктаар? Бурганның күзел-соруунуң күүсеттинери Чагырга-биле кандыг харылзаалыг?

4. Бурганның Чагыргазы деп чүл база ооң Хааны кымыл?

⁴ Бурганның Чагыргазы — Иегованың тургускан чазаа-дыр. Бурган ол Чагырганың Хааны кылдыр кымны томуйлааныл? Иисус Христосту. Иисуска кым-даа деңнежип шыдавас. Ол «хааннарның Хааны болгаш тергиидээннерниң Дээргизи» (1 Тимофейге 6:15). Иисус кандыг-даа, безин эң-не эки дээн башкарыкчыдан артык, көвей буянныг херектерни кылып шыдаар.

5. Бурганның Чагыргазы кайда турар база ол чүнү чагырарыл?

⁵ Бурганның Чагыргазы кайда турарыл? А Иисус Христос ам кайдал? Хилинчектиң чагызынга өлген соонда, ол дирилгеш, дээрже көдүрлү берген деп, сактыр боор сен (Ажыл-чорудулга 2:33). Ынчаарга Бурганның Чагыргазы дээрде. Ынчангаш Библияда ону «Дээрде Чагырга» деп адаан (2 Тимофейге 4:18). Бурганның Чагыргазы дээрде-даа болза, ол черни чагырар (Ажыдыышкын 11:15).

6, 7. Чүге Иисус — эң-не эки Хаан?

⁶ Чүге Иисус — эң-не эки Хаан? Чүге дээрге өлүм ону чагырып шыдавас. Черде чагырыкчыларга бодаарга, ол «дың чаңгыс өлүм чок... Ол кымның-даа чоокшулап шыдавазы чырыкта чурттап турар» деп Библияда чугаалаан (1 Тимофейге 6:16). Ынчаарга ооң шупту буянныг херектери кезээ-мөңгеде артып каар. Оон артык, ол келир үеде хөй өндүр улуг херектерни кылыр.

⁷ Иисустуң дугайында Библияда баш удур чүнү медеглеп турарын, эскерип көрем: «Аңаа Иегованың сүлдези турар, мерген угаан болгаш бодап-билип турарының сүлдези, арга-сүме болгаш күчү-шыдалдың сүлдези, билигниң болгаш Иеговадан коргуштуң сүлдези. Ол чүгле карактарының көрүп турары-биле шиитпес, чүгле кулаа-биле дыңнаан чүүлү-биле үндезилеп, эдип-чазавас. Ядыыларны Ол шыны-биле шиидер болгаш черде томаанныгларга эки боор кылдыр, чөп-шынныы-биле сойгалаар» (Исаия 11:2—4). Иисус чөп-шынныг болгаш  кээргээчел Хаан болур деп, бо сөстер көргүзүп турар. Ооң чагыргазының адаанга чурттаарын күзээр-дир сен бе?

8. Иисус-биле кады кымнар башкарарыл?

⁸ Ынчалза-даа Иисус чааскаан башкарбас. Ооң-биле кады чагырар башкарыкчылар бар. Павел элчин Тимофейге мынча деп бижээн: «Ам шыдажып турар болзувусса, Ооң-биле кады чагырар бис» (2 Тимофейге 2:12). Павел, Тимофей болгаш Бурганның шилип алганы өске-даа шынчы кижилер Иисус-биле кады дээрниң Чагыргазынга башкарар. Каш кижи аңаа төлептиг болурул?

9. Иисус-биле кады каш кижи башкарар база Бурган кайы үеден эгелээш оларны шилип эгелээнил?

⁹ Бо номнуң 7-ги эгеде чугаалааны дег, Иоанн элчин өттүр билген медеглелдиң көстүүшкүнүн тодарадып бижээн: «Сион даанда [дээрде ооң бедик байдалы] Хураган [Иисус Христос] турду. Ооң бодунуң болгаш Адазының адын хавактарында бижип демдектээн чүс дөртен дөрт муң кижи Хураган-биле кады турар болду». Ол 144000 кымнарыл? Иоанн тайылбырлап турар: «Олар дээрге, Хураган кайнаар-даа барза, Ону эдерер улус-тур. Оларны бүгү кижи төрелгетенден шилээш, хостап каан; Бурганга база Хураганга өргүп салган баштайгы дүжүт дег улус ол-дур» (Ажыдыышкын 14:1, 4). Ол Иисус Христос-биле дээрге башкарар дээш шилиттинген, ооң шынчы талалакчылары-дыр. Дээрге чурттаар кылдыр дирилгеш, Иисус-биле кады «олар чер кырынга хааннаар» (Ажыдыышкын 5:10). Элчиннерниң үезинден эгелээш, Бурган шынчы христианнарны Иисус-биле кады башкарар кылдыр шилип эгелээн, а түңнелинде оларның саны 144 000 болур.

10. Кижилерни Иисус Христос-биле кады 144 000 башкарыкчылар башкарарында Бурганның ынакшылы канчаар көстүп турар?

¹⁰ Кижилерни Иисус Христос-биле кады 144000 башкарыкчылар башкарарында Бурганның ынакшылы көстүп турар. Иисус боду кижи турган, ынчангаш кижилерниң хилинчек-човалаңын ол дыка эки билир. «[Иисус] кошкак талаларывысче ээ көрүнмейн баар хире эвес Кижи. Ол,  бис ышкаш, бүгү тала-биле күткүлгеге алзып турган, ынчалза-даа бачыт үүлгетпээн» — деп, Павел чугаалаан (Еврейлерге 4:15; 5:8). Иисус-биле кады башкарарлар кижилер чорааш, база хилинчектенип, хөй-ле шенелделерни шыдажып эрткен. Олар янзы-бүрү аарыглар-биле аарып, бачыт-биле демисежип турган. Ынчангаш кижилерниң таваржып турар бергелерин олар дыка эки билип турар деп, бүзүреп болур бис.

11. Дээрге Бурганның күзел-соруу күүсеттинериниң дугайында мөргүүр кылдыр, Иисус өөреникчилерин чүге деткээн?

¹¹ Иисус үлегер мөргүлүнде Чагырганың келириниң дугайында чугаалааш, Бурганның күзел-соруу «дээрге дег, черге база» күүсеттинериниң дугайында мөргүүр кылдыр өөреникчилерин деткээн. Бурганның дээрде шынчы төлээлери ооң күзел-соруун үргүлчү күүседип чораан. Ынчалзажок дээрниң бир каржы төлээзи Бурганны дыңнавайн баргаш, Адам биле Еваны бачыт кылырынче көгүдүпкен деп, 3-кү эгеден билип алдывыс. Библияда ол дээрниң каржы төлээзи — Эрликтиң дугайында 10-гу эгеде тодаргай сайгарып көөр бис. Бурган Эрликке болгаш буктарга — ооң соондан чоруткан көзүлбес мага-боттуг чаяалгаларга — дээрге артарын чөпшээрээн. Ынчангаш дээрге Бурганның күзел-соруун көзүлбес мага-боттуг чаяалгаларның чамдыызы күүсетпейн чораан үе турган. Ынчалза-даа Чагырга башкарып эгелээри билек, ол байдал өскерли бээр ужурлуг турган. Келир үеде Хаан болур Иисус Христос Эрлик-биле тулчур турган (Ажыдыышкын 12:7—9).

12. Ажыдыышкын 12:10-да кандыг ийи чугула болуушкун дугайында чугаалааныл?

¹² Библияда ооң дугайында баш удур медеглеп чугаалаан: «Мен ынчан дээрден ыыткыр үннү дыңнап кагдым: „Ам камгалал келген-дир... Ам Ооң шилээн Христозу Бодунуң эргезин көргүскен-дир! Бурганывыстың мурнунга  туруп алгаш, эш-өөрүвүстү хүндүс-даа, дүне-даа буруудадып келген буруудадыкчы [Эрлик] дээрден дүжүр октаткан-дыр“» (Ажыдыышкын 12:10). Бо библейжи шүлүкте кандыг ийи чугула болуушкун дугайында чугаа чоруп турарын, эскердиң бе? Бирээде, Иисус Христоска башкарткан Бурганның Чагыргазы башкарып эгелээн. А ийиде, Эрлик дээрден черже дүжүр октаткан.

13. Эрлик дүжүр октадыпкан соонда, дээрге чүү болганыл?

¹³ Ол болуушкуннар чүге чедиргенил? «Ынчангаш өөрүп-байырлаңар, дээрлер база дээрлерниң чурттакчылары!» — деп Библияда чугаалаан (Ажыдыышкын 12:12). Дээрниң чөп-шынныг төлээлери өөрүп турар, чүге дизе Эрлик болгаш ооң буктары дүжүр октадыпкан. Ынчангаш дээрде Иегова Бурганның чүгле шынчы бараалгакчылары арткан. Ында тайбың болгаш чаңгыс аай чорук делгерээн. Шынап-ла, ам дээрде Бурганның күзел-соруу күүсеттинип турар.

14. Кажан Эрлик черже дүжүр октадыптарга, чүү болу бергенил?

¹⁴ А черге чүү болганыл? «А чер биле далай, ат болур силер, чүге дээрге эрлик силерже бадып келген-дир! Ол хөлчок килеңнээн, чүге дээрге ооң үези көңгүс эвээш артканын билир-дир» — деп Библияда бижээн (Ажыдыышкын 12:12). Эрлик дээрден дүжүр октаткан база ооң үези көңгүс эвээш арткан, ынчангаш ол килеңнеп турар. Хорадаанындан ол кижилерге хилинчек-човалаңны чедирип турар. Ооң дугайында хөйнү дараазында эгеден билип алыр бис. Ынчалза-даа Чагырга Бурганның күзел-соруун канчаар күүседиптер?

15. Бурганның черге хамаарыштыр күзел-соруу кандыгыл?

¹⁵ Бурганның черге хамаарыштыр күзел-соруу кандыгыл, сактып келем. Ооң дугайында 3-кү эгеде чугаалаан. Эң-не эгезинде, Эдем сесерлиинге-ле, Бурган черни дываажаң кылырын күзеп турар деп тода көргүскен. Чөп-шынныг кижилер аңаа мөңге чурттаар кылдыр, ол күзээн. Эрлик Адам биле Еваны бачыт кылырынче көгүдүпкен, ынчангаш ол чүүл Бурганның күзел-соруу черге  хамаарыштыр күүсеттинеринге салдарлыг болган. Ынчалзажок Бурганның бодалы өскерилбээн. «Чөп-шынныг улус чер-чуртту салгап алгаш, ону кезээ-мөңгеде ээлеп чурттаар» деп ооң аазаашкыны өскерилбээн (Ырлар 36:29). Ол Бурганның Чагыргазының ачызында күүсеттине бээр. Канчалдыр?

16, 17. Даниилдиң 2:44-тен Бурганның Чагыргазының дугайында чүнү билип ап болурул?

¹⁶ Даниилдиң 2:44-те бижээн өттүр билген медеглелди сайгарып көрээлем: «Ол хааннарның үезинде дээрде Бурган кажан-даа бууравас чагырганы тургузуптар. Ол чагырга өске чонга дамчывас. Ол бүгү күрүнелерни бузуп, чылча шаапкаш, оларны чок кылыптар, а боду кезээ-мөңгеде турар». Ол шүлүктен Бурганның Чагыргазының дугайында чүнү билип ап болурул?

¹⁷ Бирээде, Чагырга «ол хааннарның үезинде», азы өске күрүнелер туруп турар үеде, тургустунар. Ийиде, Чагырга кезээ-мөңгеде турар. Ону кым-даа, кажан-даа чаалап ап шыдавас база ооң орнун бир өске чазак солувас. Үште, Бурганның Чагыргазы бо делегейниң күрүнелери-биле дайылдажыр, ынчалза-даа Бурганның Чагыргазы тиилээр. Ынчан бүгү черниң кырынга чүгле чаңгыс чазак турар — эң-не эки болгаш эң-не чөптүг.

18. Бурганның Чагыргазының болгаш бо делегейниң чазактарының аразында шиитпирлиг тулчуушкуннуң адын чүү дээр?

¹⁸ Бурганның Чагыргазының болгаш бо делегейниң чазактарының аразында шиитпирлиг тулчуушкунну Библияда тодаргай бижээн. Чижээ, ол тулчуушкун чоокшулап турда, каржы буктар «бо делегейниң хамык хааннарын» будалдырар дээш, мегени тарадып эгелээр деп чугаалаан. Чүү дээш? «Бүрүн Күчүлүг Бурганның өндүр улуг хүнү кээрге, чаалажыры-биле оларны [хааннарны] чыып алыр дээш». Черниң хааннары «еврей дылда Армагеддон дээр черже» чыглып кээр (Ажыдыышкын 16:14, 16). Ынчаарга кижилер чазактарының болгаш Бурганның Чагыргазының аразында шиитпирлиг тулчуушкунну Армагеддон дээр деп, ол ийи шүлүктен көскү.

19, 20. Бөгүн Иегованың күзели чүге күүсеттинмээнил?

 ¹⁹ Армагеддонга Бурганның Чагыргазының тиилелгези чүнү эккээрил? Бурганның черге хамаарыштыр күзел-соруу кандыгыл, сактып көрээлем. Дываажаң чер кыры Бурганга аас-кежиктии-биле бараалгап турар тергиин, чөп-шынныг кижилер-биле дола бээрин Иегова күзеп турар. А бөгүн Иегованың күзели чүге күүсеттинмээнил? Чылдагааннарның бирээзи — шупту кижилер бачыттыг, ынчангаш олар аарып база өлүп турар. Ынчалзажок бо номнуң 5-ки эгеде чугаалааны дег, Иисус бис дээш өлгениниң ачызында мөңге чурттап болур бис. «Оглунга бүзүрээн кижи бүрүзү өлбезин, харын мөңге амыдыралдыг болзун дээш, Бурган Бодунуң эр чаңгыс Оглун берипкен. Ооң бо делегейниң улузунга ынакшылы ол хире болган-дыр» — деп, Иоанның бижээни Буянныг Медээден сөстерни сактып кээр боор сен (Иоанның 3:16).

²⁰ Оон өске чылдагаан — хөй улус каржы херектер кылып турар. Олар мегеге, бузуруушкунга болгаш мөзү чок чорукка туттуруп, Бурганны дыңнаар хөңнү чок. Ынчалза-даа каржы кижилер Армагеддон деп Бурганның дайынынга узуткадыр (Ырлар 36:10). База бир чылдагаан — бо делегейниң чазактары бодунуң албатыларын Бурганның күзел-соруун күүседиринче деткивейн турар. Дыка хөй чазактар күш чок, каржы-дошкун болгаш алыскак-чискек бооп турар. Библияда кончуг шын чугаалаан: «Кижи кижиге хора чедирери-биле ону чагырып турар» (Екклесиаст 8:9).

21. Чагырга Бурганның күзел-соруун черге канчаар күүседиптер?

²¹ Армагеддон соонда бүгү черниң кырын чүгле чаңгыс чазак — Бурганның Чагыргазы чагырар. Ол чагырга Бурганның күзел-соруун күүседип, кижилерге дыка хөй йөрээлдерни эккээр. Эрликтиң база буктарның салдары моон соңгаар турбас (Ажыдыышкын 20:1—3). Иисустуң хосталга бээр өргүлүнүң ачызында кижилер аарывас база өлбес. Чагырганың башкарылгазының үезинде олар  кезээ-мөңгеде чурттаар (Ажыдыышкын 22:1—3). Бүгү чер дываажаң апаар. Чагырга Бурганның күзел-соруун черге күүседиптер. Ол ышкаш Бурганның адын ол ыдыктаар. Ынчаарга шупту улус Иегованың адын алдаржыдар.

22. Иисус чер кырынга турда, азы ону диргискениниң соонда, Бурганның Чагыргазы башкарылгазын дораан-на эгелевээн деп, кайыын билир бис?

²² Иисус черге турда, Чагырга башкарылгазын эгелевээн, чүге дизе ол бодунуң өөреникчилеринге: «Сээң Чагыргаң чедип келзин» деп мөргүүрүн өөредип турган. Чагырга Иисус дээрже үне берген үеде тургустунган бе? Чок, чүге дизе Иисустуң дирлип келгениниң соонда, ыдыктыг ырларда: «Дээрги-Чаяакчы [„Иегова“, ЧД] мээң дээргимге: „Дайзыннарыңны буттарың адаанга эккеп салбаан шаамда, Мээң оң таламга олур“» — деп чугаалаан. Ол өттүр билген медеглел Иисус Христоска күүсеттингенин Пётр-даа, Павел-даа чугаалап турган (Ажыл-чорудулга 2:32—35; Ырлар 109:1; Еврейлерге 10:12, 13). Ынчаарга үе эртер ужурлуг турган.

23. а) Бурганның Чагыргазы кажан башкарып эгелээнил? б) Дараазында эгеде чүнүң дугайында сайгарар бис?

²³ Кайы-хире манаар херек турганыл? XIX векте Библияның кичээнгейлиг шинчилекчилери манаашкын үези 1914 чылда төнер деп санап үндүрген. (Ол чылдың дугайында  «1914 чыл — библейжи өттүр билген медеглелдерниң кол чылы» Капсырылгада тодаргай чугаалаан.) 1914 чылдан эгелээн болуушкуннар ол санаашкыннарның ылаптыын бадыткап турар. Библейжи өттүр билген медеглелдерниң күүсеттингени Христос 1914 чылда Хаан апарган, ынчангаш ол чылын Бурганның Чагыргазы башкарып эгелээнин херечилеп турар. Ынчап кээрге, Эрликтиң «көңгүс эвээш үези арткан» үеде чурттап турар бис (Ажыдыышкын 12:12; Ырлар 109:2). Чагырга Бурганның күзел-соруун черге күүседиптер үези көңгүс чоокшулап келген деп, бүзүрелдии-биле чугаалап болур бис. Ол кайгамчык эки медээ сени өөртүр-дүр бе? Аңаа бүзүрээр-дир сен бе? Удавас бисти кайгамчык өскерлиишкиннер манап турар деп шынзыгарыңга дараазында эге сеңээ дузалаар.