1, 2. Бөгүн бүзүрелдиг чаштыр черни кайыын тып ап болур?

 БҮРГЕГ хүнде орукка чораан дижик сен. Дээр бүргеп, кызаңайнып, диңмиреп эгелээн. Суггур чаъс кудуп келген. Далаш-биле хая көрүнгеш, бир-ле черге чаъстан чаштыр болза эки деп, бодап эгелээн сен. Ырак эвес черде чаштыр чер эскерип кааш, ынаар халыыр боор сен. Аңаа турарга, чылыг болгаш аянныг. Ындыг айыыл чок черни тып алганың кайы-хире эки-дир!

² Бөгүн бис база дүвүрээзинниг үеде чурттап турар бис. Хүн санында делегейде байдал нарыыдап бар-ла чыдар. Ынчалзажок эттинмес хорадан камгалап болур бүзүрелдиг чаштыр чер бисте бар. Ол чүү чаштыр чер чүвел? Библия чугаалап турар: «Бурганым, Сен мээң хоргадалым сен, быжыг шивээм сен, мен Сеңээ идегээр мен» (Ырлар 90:2).

3. Иегова канчап бистиң чаглаавыс апарып болурул?

³ Чүгле бодап көр даан: Иегова, Чаяакчы болгаш Октаргайның Дээди Чагырыкчызы, бистиң бүзүрелдиг чаглаавыс бооп болур! Ол  бисти камгалап шыдаар, чүге дизе ооң күжүнге кым-даа деңнежип база удурланып шыдавас. Бир эвес бистиң-биле айыыл болур-даа болза, Иегова бүгү хораны чайладырынга белен. Ынчаарга канчап ол бистиң чаглаавыс апарып болурул? Иеговага бүзүрээр херек. Оон артык, Бурганның Сөзү бисти деткип турар: «Бурганның ынакшылының ачызында бодуңарны шынчы кадагалаңар» (Иуданың 21). Ийе, Бурганның ынакшылынга бодувусту кадагалап, дээрде Адавыс-биле найыралывысты быжыглаар ужурлуг бис. Ынчан ол бистиң ёзулуг чаглаавыс апарып болур. Ынчаарга ооң-биле ындыг быжыг найыралды канчаар сайзырадып ап болурул?

4, 5. Иегова биске ынакшылын канчаар илередип турар?

⁴ Бурганның ынакшылынга бодун кадагалаар дизе, Иегова бодунуң ынакшылын биске канчаар илередип турарын эскерери чугула. Бо номнуң дузазы-биле өөренип алган библейжи өөредиглерниң дугайында боданып көр даан. Бистиң Чаяакчывыс, Иегова, биске кайгамчык бажыңны — Черни белекке берген. Аңаа аъш-чем аймаа элбек болурун база суг болгаш бойдустуң янзы-бүрү казымал-байлактары аңаа турарын ол сагыш човаан. Дириг амытаннарның кайгамчык делегейин база каас-чараш бойдустуң чурумалын ол чаяап бүдүрген. А Библия таварыштыр ол бодунуң адын база кайгамчык шынарларын биске ажыдып берген. Оон аңгыда, Бурган бодунуң эр чаңгыс Оглун, Иисус Христосту, бо делегейже бис дээш хилинчектенип, өлзүн дээш чорутканын ооң Сөзү чугаалап турар (Иоанның 3:16). Ол белек биске чүнү бергенил? Ол аас-кежиктиг келир үеже идегелди биске ажыдып берген.

⁵ Оон ыңай Иегова дээрде чазакты, Мессиан Чагырганы, тургускан болганда, келир үеже идегелдиг көрүп болур бис. Удавас ол Чагырга бүгү хилинчек-човалаңны узуткааш, черге дываажаңны тургузуптар. Чүгле бодап көр даан: бис тайбың болгаш аас-кежиктиг мөңге чурттап болур бис! (Ырлар 36:29). Бо үеде-ле чуртталганы эки талаже өскертип алырынга дузалаар удуртулганы Бурган биске берип турар. Оон аңгыда, ол биске мөргүлдү — Бурган-биле ажыт-чажыт чокка сеткил-бодалдарывысты үлежир арганы — берген. Бо бүгү Иегованың шупту кижилерге база хууда кижи бүрүзүнге ынакшылын  канчаар илередип турарының чүгле каш чижээ-дир.

6. Иегованың ынакшылынга канчаар харыылаар сен?

⁶ Ам шыңгыы айтырыгны сайгарып көрээлем: Иегованың ынакшылынга канчаар харыылаар сен? «Иеговага ынак болур ужурлуг» — деп, хөй кижилер чугаалаар боор. А сен ынчаар бодаар-дыр сен бе? Иисус чугаалаан: «Дээрги-Бурган-Чаяакчыңга [„Иеговага“, ЧД] бүгү-ле чүлдү-чүрээң-биле, бүгү-ле сеткил-сагыжың-биле, бүгү-ле угаан-сарыылың-биле ынак бол» (Матфейниң 22:37). Ол айтыышкынны Иисус эң-не кол деп санап турган. Чугаажок, Иеговага бүгү-ле чүлдү-чүрээң-биле, бүгү-ле сеткил-сагыжың-биле, бүгү-ле угаан-сарыылың-биле ынак болуруңга сенде база чылдагааннар хөй. Ынчалза-даа Бурганга ынакшылды чүгле миннири четчир бе?

7. Чүге Бурганга ынакшыл — чүгле минниишкин эвес-тир, тайылбырлап көрем.

⁷ Библиядан алырга, Бурганга ынакшыл — чүгле минниишкин эвес-тир. Ынакшылды миннири чугула-даа болза, ол Иеговага ёзулуг ынакшылдың чүгле эгези-дир. Яблоктуң хензиг үрезининден дүжүткүр, дыка улуг ыяш өзүп кээр. Бир эвес яблокту чиксей бээр болзуңза, чүгле үрезинин чиир сен бе? Таанда! Ынчангаш Бурганга ынакшылды миннири — Бурган-биле найыралдың чүгле эгези-дир. «Бурганга ынаавысты Ооң чагыгларын күүсеткенивис-биле көргүзер бис. Ооң чагыгларын күүседири ындыг-ла берге эвес» — деп, Библия бисти өөредип турар (1 Иоанның 5:3). Бурганга ёзулуг ынакшыл үре-түңнелдиг болур ужурлуг. Ынакшылды ажыл-херээвис-биле илередир ужурлуг бис (Матфейниң 7:16—20).

8, 9. Ынакшылывысты болгаш четтиргенивисти Бурганга канчаар илередип болур бис?

⁸ Бир эвес Бурганның хоойлузун сагып, ооң дүрүмнерин чуртталгавыска ажыглап турар болзувусса, Бурганга ынаавысты көргүзүп турар бис. Ону күүседири берге эвес. Чүге дээрге ооң хоойлулары ындыг-ла берге эвес, олар биске ажыктыг болгаш аас-кежиктиг болурунга дузалыг (Ырлар 18:8, 9).  Бурганның чагыын хүлээп, күүседип турар болзувусса, ооң биске шупту кылган эки чүүлүн аажок үнелеп турарывысты көргүзүп турар бис. Бөгүн дыка эвээш улус Бурганга четтиргенин илередип турары арай хомуданчыг-дыр. Бис Иисустуң үезинде чурттап чораан, четтиргенин илеретпес кижилер дег, болуксавас бис. Кажан Иисус экирбес кеш аарыглыг он кижини экиртиптерге, чүгле чаңгызы четтиргенин илередип, чедип келген (Луканың 17:12—17). Бурганга өөрүп-четтиргенин илередири кайы-хире чугула ийик!

⁹ Кандыг хоойлу-дүрүмнерни сагыыры чугула? Бо номда элээн кажын сайгардывыс, ынчалзажок ам бир катаптап көрээлем. Чүге дээрге Бурганның хоойлу-дүрүмнерин сагыыры Бурганның ынакшылынга бодувусту кадагалаарынга дузалаар.

10. Иегованың дугайында хөйнү билип өөренири чүге чугула, тайылбырлап көрем.

¹⁰ Иеговага чоокшулаар дизе, ооң дугайында хөйнү билип өөренири дыка чугула. Ол өөредигниң төнчүзү чок. Бир эвес соок дүне одаг чанынга чыннып турган болзуңза, отка өжер арга бээр сен бе? Чок,  болбайн канчаар. От өөскүп кывар кылдыр, база ооң чылыынга чылыгар дээш, ынаар ыяш салыр болгай сен. Чүге дээрге сээң амы-тының оон хамааржыр болгай! Ыяш отка өөскүп кыварынга дузалаары дег, «Бурган дугайында билиг» бистиң Иеговага ынакшылывысты быжыглаар (Чугаалар 2:1—5).

11. Иисустуң сөстери өөреникчилеринге кандыг салдарлыг болган?

¹¹ Иеговага болгаш ооң үнелиг Сөзүнге ынакшылын кадагалаар кылдыр, Иисус өөреникчилеринден күзеп турган. Ол ынакшыл хүн тудум кыптыгып, күштелирин ол күзеп турган. Иисус дирлип келген соонда, бодунга күүсеттинген Еврей Бижилгелерден чамдык өттүр билген медеглелдерни ийи өөреникчизинге тайылбырлап берген. Ол оларга кандыг салдарлыг болган? «Ол орук ара бистиң-биле чугаалажып чорда база Бижилгениң утказын биске тайылбырлап чорда, чүректеривис хып чорбажык бе?» — деп, үе эрткен соонда олар чугаалаан (Луканың 24:32).

12, 13. а) Бо делегейде дыка хөй кижилер Иеговага база ооң Сөзүнге кандыг хамаарылгалыг? б) Иеговага ынакшылывысты соотпайн, ону канчаар кадагалап болур бис?

¹² Кажан Библия херек кырында чүге өөредип турарын билип аарыңга, сээң чүрээң өөрүшкү-биле кыптыгып, Бурганга ынакшыл-биле долуп турбаан бе? Чугаажок! Ындыг минниишкиннерни дыка хөй шын сеткилдиг кижилер миннинген. Ам Бурганга ынакшылды кадагалаары болгаш сайзырадыры чугула. Бис бо делегейге дөмей болуксавас бис. «Эңдерик улустуң ынакшылы соой бээр» — деп, Иисус баш бурунгаар чугаалаан (Матфейниң 24:12). Иеговага база библейжи алыс шынга ынакшылывысты соотпайн, ону канчаар кадагалап болур бис?

¹³ Иегованың база Иисус Христостуң дугайында өөренирин уламчыла (Иоанның 17:3). Бурганның Сөзүнден билип ап турар чүүлүң дугайында ханы бодан. Библияны номчуп тура, бодан: бо номчаан чүүлүм Иегованың дугайында чүнү өөредип турарыл? Ол библейжи шүлүктер Иеговага бүгү-ле чүлдү-чүрээм-биле, бүгү-ле сеткил-сагыжым-биле, бүгү-ле угаан-сарыылым-биле ынак болурунга мени канчаар деткип турарыл? (Ырлар 142:5). Ынчаар боданып тура, Иеговага ынакшылыңны сайзырадыр сен.

14. Мөргүл Иеговага ынакшылывысты кадагалаарынга канчаар дузалап болур?

 ¹⁴ Оон ыңай Иеговага ынакшыл кыптыгар кылдыр, мөргүүр үени тускайлаары чугула (1 Фессалоникажыларга 5:17). Мөргүл — Бурганның үнелиг белээ деп 17-ги эгеден билип алдывыс. Ажыт-чажыт чок чугаа кижилерни чоокшуладыры дег, соксаал чок мөргүлдер Иегова-биле найыралды быжыктырар. Мөргүлдер чаңгыс аай апарбас кылдыр, кандыг-даа сеткил-чүрек чок, хөй сөстерни катаптавазы чугула. Мөргүл оглу биле адазының аразында чугаа дег, болур ужурлуг. Бурган-биле чугаалажып тургаш, хүндүткелдиг болуру чугула, ынчалза-даа мөргүл чүрээниң ханызындан болгаш шын сеткилдиг болур ужурлуг (Ырлар 61:9). Библияны хууда өөренири база чүрээниң ханызындан мөргүлдер — бистиң Бурганга ыдыктыг бараалгалывыстың чарылбас бир кезии-дир. Бо бүгү Иегованың ынакшылынга бодувусту кадагалаарынга дузалап болур.

15, 16. Суртаал ажылын чүге эртине-байлак-биле деңнеп болурул?

¹⁵ Библияны өөрениири болгаш мөргүл — Бурган-биле чоок найыралга хамаарылгалыг, ыдыктыг бараалгалдың бир кезии-дир. Ам улус мурнунга бүзүреливисти чугаалап турар бараалгалдың дугайында чугаалажып көрээлем. Библейжи алыс шынны кижилерге чугаалап тур сен бе? Ол кайгамчык бараалгаар арганы бистерге Иегова дагзып каан (Луканың 1:73—75). Иегованың дугайында билип алган билиглер-биле үлежип тура, Бурганның Чагыргазының дугайында буянныг медээни суртаалдаар деп, шупту христианнарга берген чугула даалганы күүседип турар бис (Матфейниң 24:14; 28:19, 20).

¹⁶ Павел элчин Бурганга бараалгап турарын бедик үнелеп, ону эртине-байлак кылдыр санап турган (2 Коринфичилерге 4:7). Өскелерге Иегованың база ооң күзел-соруунуң дугайында чугаалаары — сээң эң-не эки дээн кылып болур чүүлүң-дүр. Ол эң-не эки Дээргиге бараалгал болгай, ынчангаш ол дыка улуг йөрээлдерни эккеп турар. Суртаал ажылынга киржип тургаш, шын сеткилдиг кижилерге дээрде Адавыска чоокшулаарынга база мөңге амыдыралдың оруунче туруп алырынга дузалап турар бис. Оон чугула чүүл бар деп бе? Иегованың база ооң Сөзүнүң дугайында чугаалап туруңда,  бүзүрелиң быжыгар база Бурганга ынакшылың өзер. Иегова сээң күжениишкиннериңни аажок үнелеп турар (Еврейлерге 6:10). Суртаал ажылы Бурганның ынакшылынга бодуңну кадагалаарынга дузалаар (1 Коринфичилерге 15:58).

17. Христиан суртаал ажылы чүге соңгаарладып болбас ажыл-дыр?

 ¹⁷ Чагырга дугайында суртаал — соңгаарладып болбас ажыл дээрзин, утпазы чугула. Бурганның Сөзү чугаалап турар: «Бурганның медээзин суртаалда, таарымчалыг-даа, таарымчалыг эвес-даа үеде даалгаң күүседиринге белен бол» (2 Тимофейге 4:2). Чүге бөгүн ол ылаңгыя чугула? Бурганның Сөзү харыылап турар: «Иегованың өндүр улуг хүнү мырыңай чоок. Ол чоокшулаан болгаш аажок далажып кел чыдар» (Софония 1:14). Ийе, Иегованың бо бүгү каржы тургузугну узуткаар үези мырыңай чоокшулаан. Ооң дугайында кижилерни баш удур сагындырар херек! Иегованы Дээди Чагырыкчы кылдыр хүлээп алыр үе келген деп, олар билир боор ужурлуг. Төнчү «озалдавас» (Аввакум 2:3).

18. Алыс шын христианнар-биле кады Иегованы чүге алдаржыдар ужурлуг бис?

¹⁸ Бис алыс шын христианнарга катчып, оларның-биле кады ону ажыы-биле алдаржыдарывысты Иегова күзеп турар. Ооң Сөзүнде: «Бот-боттарывыска сагыш-човаңгыр бооп, ынакшылче база буянныг херектерже бот-боттарывысты ыдалап көрээли. Чыглып, аралажырындан ойталаваалы (чамдык улус аңгыланып чаңчыга берген болгай), харын бот-боттарывысты деткип көрээли, сөөлгү хүннүң чоокшулап орарын көргеш, улам күштүг деткижээли» — деп чугаалаан (Еврейлерге 10:24, 25). Христиан чыыштар бистиң эргим Бурганывысты алдаржыдар кайгамчык арганы берип, аңаа ыдыктыг бараалгалды уламчылаарынга дузалап турар. Чыыштарга бүзүреливис чаңгыс аай ха-дуңмавысты деткип, сеткилин өөртүп болур бис.

19. Хуралдың ынакшылын канчаар быжыктырып болур бис?

¹⁹ Иегованың өске бараалгакчылары-биле аралажып тургаш, хуралдың ынакшылын база найыралын быжыктырып болур бис. Иегова бистиң эки талаларывысты эскерерип турары ышкаш, бүзүреливис чаңгыс аай ха-дуңмавыстың эки шынарларын эскерери чугула. Өске улустуң тергиин алдынарын манава. Шупту христианнар Бурган-биле найыралды сайзырадып турар-даа болза, оларның чедиишкиннери дөмей эвес. Ооң дугайында утпайн чор. Частырыглар кылырынга шуптувус сундулуг бис (Колоссчуларга 3:13). Иеговага бүгү чүрээниң ханызындан ынак кижилер-биле чоок найырал  Бурганга чоокшулаарынга сеңээ дузалаар. Шынап-ла, христиан ха-дуңма-биле демниг болуру база Иеговага кады бараалгаары, Бурганның ынакшылынга бодуңну кадагалаарынга сеңээ дузалаар. Ооң ынакшылынга бодун кадагалап, шынчы бараалгап турар улусту Иегова канчаар шаңнаарыл?

20, 21. «Алыс шын амыдырал» дээрге чүл база ол чүге кайгамчык идегел бооп турар?

²⁰ Иегова бодунуң шынчы бараалгакчыларын чуртталга-биле шаңнаар. А ам чурттавайн турар эвес бис бе? Бистиң хөй кезиивиске харыызы билдингир: бис тынып, ижип-чип турар болгай бис. Чурттап турар болбайн, канчаар бис. Чуртталгавыстың эң-не аас-кежиктиг үелеринде безин: «Чуртталганың магалыын!» — деп, чугаалаар болгай бис. Ынчалзажок Библияның көргүзүп турары-биле алырга, бөгүн кижилер ол сөстүң долу утказы-биле ёзулуг чурттавайн турар.

²¹ «Алыс шын амыдыралдан» быжыг туттунарын Библия бисти кыйгырып турар (1 Тимофейге 6:19). Бо сөстерден алырга, «алыс шын амыдыралды» чүгле келир үеде чедип алыр бис. Бурганның бодап алганы дег, тергиин апаргаш, ол сөстүң долу утказы-биле ёзулуг чурттай бээр бис. Дываажаңга, кажан бис кайгамчык кадыкшылдыг, ёзулуг тайбыңныг болгаш аас-кежиктиг апаарывыска, ынчан ам-на алыс шын мөңге чуртталганы чедип алыр бис (1 Тимофейге 6:12). Кайы-хире кайгамчык келир үе бисти манап турар-дыр!

22. «Алыс шын амыдыралдан» быжыг туттунары дээрге, чүү дээни ол?

²² «Алыс шын амыдыралдан» быжыг туттунары деп чүл? Ол сөстерни чугаалаарының мурнунда Павел христианнарны «буян тарыырын» болгаш «буянныг ажыл-херээ-биле байыырынче» кыйгырган (1 Тимофейге 6:18). Ынчангаш Библиядан билип алган билиглерни канчаар ажыглап турарывыстан хөй чүве хамааржыр. Ынчаарга Павелдиң сөстери-биле алырга, буянныг ажыл-херектер кылып тургаш, «алыс шын амыдыралды» чаалап ап болур бис дээни ол бе? Чок, ол арга Бурганның энерелиниң азы ооң ачы-буян хайырлалының ачызында ажыттынып турар (Римчилерге 5:15). Ынчалзажок Иегова бодунга шынчы бараалгап турар кижилерни шаңнаарынга  белен. «Алыс шын амыдыралды» чедип алырыңны ол күзеп турар. Бурганның ынакшылынга бодун кадагалап турар шупту кижилерни кайгамчык мөңге чуртталга манап турар.

23. Бурганның ынакшылынга бодун кадагалаары чүге чугула?

²³ Кижи бүрүзү боданыр болза эки: Бурганга таарымчалыг бооп, Библияның өөредип турары дег, аңаа бараалгап турар мен бе? Бир эвес хүнүң-не аңаа шынзыгып турар болзувусса, шын орукта-дыр бис. Иегова — бистиң чаглаавыс деп, бүзүреп болур бис. Бо дүвүрээзинниг үеде, каржы делегейниң төнчүзүнүң бетинде, ол бодунуң шынчы бараалгакчыларын камгалаар. Мырыңай чоокшулаан, чаа делегейже киреринче Иегова биске дузалаар. Чөп-шынныг чаа черге бисти кайы-хире аас-кежиктиг чуртталга манап турар-дыр! Үезинде шын шилилгени кылганывыс дээш, кайы-хире өөрүүр деп бис! Бир эвес сен бо хүн шынчы бооп артып, Бурганның ынакшылынга бодуңну кадагалап турар болзуңза, Иегова Бурганның бодап алганы дег, «алыс шын амыдыралды» чедип алгаш, мөңге чурттап болур сен.