Шупту чоннардан кижилерни Ооң-биле найыралдажып, мөргүүрүн Бурган күзеп турар (Ырлар 64:3). Ынчалза-даа Ол мөргүл бүрүзүн дыңнавас. Чижээ, кадайын багай аажылап турар эр кижиниң мөргүлүнге ол харыылавайн барып болур (1 Пётр 3:7). Кажан израильчилер дедирленип каржы херектерин соксатпайн туруп бээрге, Бурган оларның мөргүлдерин дыңнавайн турган. Ындыг-даа болза бачыттарын миннип турар улусту, Ол дыңнаарынга белен. Бурганга мөргүүрү — улуг алдар-хүндү деп сактыры чугула. (Номчуптуңар: Исайя 1:15; 55:7.)

 «Бурган шупту мөргүлдерни дыңнап турар бе?» деп видеороликти көрүңер.

 Иегова бистиң алыс шын чаңгыс Бурганывыс болгаш Чаяакчывыс, ынчангаш чүгле Аңаа мөргүүр ужурлуг бис (Матфей 4:10; 6:9). Бачыттыг кылдыр төрүттүнүп турар болганывыста, Бурганның мурнунга арыг эвес бис. Ол чылдагаан-биле Иисус Христостуң адын таварыштыр мөргүүр ужурлуг бис, чүге дизе ол бачыттарывыс дээш амы-тынын берген. Ооң ачызында Иегованың мурнунга арыг кылдыр санаттынар бис (Иоанн 14:6). Кандыг-бир мөргүлдү шээжилеп алгаш катаптаарын азы мөргүл номундан анаа номчуурувусту Иегова күзевейн турар. Мөргүүрде боттарывыстың бодалдарывысты болгаш минниишкиннеривисти илередирин Ол күзээр. (Номчуптуңар: Матфей 6:7; Филипчилерге 4:6, 7.)

 Иштивисте безин чугаалаан мөргүлдеривисти Чаяакчывыс дыңнап каар (1 Хааннар 1:12, 13). Кандыг-даа үеде мөргүүрүвүстү Ол күзеп турар. Чижээлээрге, хүн эгезинде, төнчүзүнде, чемненириниң бетинде база бергелерге таварышканда мөргүүр болза эки. (Номчуптуңар: Ырлар 54:23; Матфей 15:36.)

 Чаяакчыга бүзүревес база черни дываажаң кылыптар деп Ооң аазаашкынын кочулап турар улустуң аразында чурттап чоруур  болганывыста, Бурганга чоокшулаары белен эвес (2 Тимофейге 3:1, 4; 2 Пётр 3:3, 13). Ынчангаш кады бүзүрээн ха-дуңмавыс-биле аралажып, бот-боттарывысты деткиири биске аажок чугула. (Номчуптуңар: Еврейлерге 10:24, 25.)

 Бурганга ынак улус-биле аралажыры — биске Ооң-биле найыралдажырынга дузалаар. Иегованың Херечилериниң ужуражылгалары — бүзүреливисти быжыктырар кайгамчыктыг арга. (Номчуптуңар: Римчилерге 1:11, 12.)

 Бурганның Сөзүнде билиглерниң дугайында ханы боданыр болзуңарза, Иегова-биле найыралдыг апаар силер. Ынчангаш Ооң херектери, хоойлулары болгаш аазаашкыннарының дугайында мөргүп боданыңар. Бурганның ынакшылын, мерген угаанын үнелээринге ханы боданыры дузалаар. (Номчуптуңар: Иисус 1:8; Ырлар 1:1—3.)

 Бурганга идегеп, бүзүрээр болзуңарза, чүгле ынчан Ооң-биле найыралыңар чоок болур. Үнүштү өстүрерде үргүлчү суггарылга херек. Бүзүрелдиң өзүлдези база шак-ла ындыг. Ынчангаш кандыг-бир библейжи өөредиг алыс шын деп силерни чүү бүзүредип турарын боданыры чугула. (Номчуптуңар: Матфей 4:4; Еврейлерге 11:1, 6.)

 Бердинген чону дээш, Иегова сагыш човап чоруур. Бүзүреливисти болгаш мөңге чуртталгаже идегеливисти чок кылып болур чүүлдерден Иегова бисти камгалаар (Ырлар 90:1, 2, 7—10). Аас-кежиивиске болгаш кадыывыска айыылдыг амыдыралдан Бурган бисти оваарындырып турар. Иегова бисти эң-не эки амыдыралга өөредип чоруур. (Номчуптуңар: Ырлар 72:27, 28; Иаков 4:4, 8.)