Иегова черни кижилерге чаяап берген. Чер — бистиң ниити бажыңывыс. Бир дугаар кижилер Ада́м биле Ева дээрге чурттаар кылдыр чаяаттынмаан. Аңаа чурттаар кылдыр, Бурган дээрниң төлээлерин чаяаган (Иов 38:4, 7). А кижилерни кайгамчык Эдем сесерлиинге чурттадып каан (Эге дөс 2:15—17). Эгезинде-ле Иегова бир дугаар кижилерни кажан-даа өлбейн, ажы-төлү-биле черге мөңгеде чурттаарын күзээн. (Номчуптуңар: Ырлар 36:29; 113:24.)

 Эгезинде чүгле Эдем сесерлии дываажаң турган. Чоорту бир дугаар өг-бүлениң ажы-төлү төрүттүнүп, кижилер бүдүн чер кырын долдурар ужурлуг турган. Олар дываажаңның девискээрин улгаттырып, бүдүн черни чечектелген сесерлик кылыптар ийик (Эге дөс 1:28). Чер кажан-даа узуткаттынмас. Ол кезээде бистиң бажыңывыс бооп артар. (Номчуптуңар: Ырлар 103:5.)

 «Бурган черни чүү дээш чаяаганыл?» деп видеороликти көрүңер.

 Ада́м биле Ева Бурганга удур тура халыырга, Бурган оларны Эдем сесерлиинден үндүр ойладыпкан. Шак ынчаар дываажаңны кижилер чидириптерге, төөгүде кым-даа ону катап тургузуп шыдаваан. Оон бээр чер кырында каржы кижилер тергиидээн. (Номчуптуңар: Эге дөс 3:23, 24.)

 Иегова кижи төрелгетенге хамаарыштыр Бодунуң күзел-бодалындан ойталаан бе? Чок! Бурган кызыгаар чок күчү-күштүг. Аңаа күзел-бодалын күүседиринге чүү-даа шаптыктап шыдавас (Исайя 45:18). Иегова кижилерге хамаарыштыр эң эгезинде-ле бодап алган бодалын боттандырар, ынчан чер база катап дываажаң апаар. (Номчуптуңар: Ырлар 36:11, 34).

 Чер кырынга дываажаң Иисустуң чагыргазының үезинде катап тургустунар. Эгезинде Иисус дээрниң төлээлерин баштааш, Армагеддон дайынынга Бурганның удурланыкчыларын шуптузун узуткаар. Оон Эрликти 1000 чыл дургузунда тамыга кинчилеп  каар. Бурганның чону ол дайынны ажып эртер, чүге дизе оларга Иисус чүнү канчаарын айтып бээр болгаш камгалаар. Олар черге Дываажаңга кезээ мөңгеде чурттаар. (Номчуптуңар: Ажыдыышкын 20:1—3; 21:3, 4.)

 Бурган черни кажан каржыдан арыглаар? Ол үе кажан кээрин тодарадырының «демдээн» Иисус берген. Делегейде болуушкуннар кижи төрелгетени айыылдыг байдалда деп көргүзүп турар. «Бо делегейниң төнчүзүнде» чурттап чоруурувусту ол «демдек» көргүзүп турар. (Номчуптуңар: Матфей 24:3, 7—14, 21, 22.)

 Иисус Муң чыл башкарылгазының үезинде чер кырында хилинчек-човалаңны дөгерезин соксадыр (Исайя 9:6, 7; 11:9). Хаан эргезинден аңгыда, ол Дээди бараалгакчы болганда, Бурганга ынак улусту бачыттан адырар. Ынчалдыр Бурган Иисусту таварыштыр аарыг-аржыкты, кырыыр чорукту база өлүмнү чок кылыр. (Номчуптуңар: Исайя 25:8; 33:24.)

 Дываажаңга Бурганга дыңнангыр улус чурттаар (1 Иоанн 2:17). Биче сеткилдиг, өөрениринге белен улусту дилеп тып, оларга Бурган-биле өңнүктежиринге дузалаарын Иисус өөреникчилеринге дааскан. Иегова амгы үеде сая-сая улусту келир үеде черге Дываажаңга чурттаарынга белеткеп турар (Софония 2:3). Иегованың Херечилериниң Хурал залдарынга улус канчаар эки ашаа, эки адазы, эки кадайы, эки авазы болурун өөренип турар. Ада-иелер ажы-төлү-биле Бурганга кады мөгейип, амдыгааштан эгелеп Библия оларның чуртталгазын канчаар экижидип болурун билип ап турар. (Номчуптуңар: Михей 4:1—4.)