Иисус Христос — Бурганның Оглу болгаш Ооң эң чоок, эргим өңнүү. Черге төрүттүнериниң мурнунда Иисус күчүлүг ангел болуп, дээрге чурттап турган (Иоанндан 17:5). Черже кижилерге Бурганның дугайында шынны өөредир дээш келген (Иоанндан 18:37). Оон аңгыда дыңнангыр кижилерни бачыт болгаш өлүмден камгалаар дээш, амы-тынын берген (Римчилерге 6:23). Ам Иисус — черни Дываажаң болдурар, Бурганның дээрде Чазааның Хааны (Ажыдыышкын 19:16).

Ангелдер база Бурганның өңнүктери. Ангелдер черге кижилер дег чурттаваан. Оларны Бурган черни мурнай чаяаган (Иов 38:4—7). Сая сая ангелдер бар (Даниил 7:10). Кижилер Иегованың дугайында алыс шынны билип алырын, Бурганның дээрде ол өңнүктери күзеп турар (Ажыдыышкын 14:6, 7).

Бурганның черде база өңнүктери бар, оларны Иегова бодунуң херечилери деп адап турар. Херечи кижи судка кымның азы чүнүң дугайында билирин чугаалаар. Иегованың Херечилери өске улуска, Иегованың дугайында болгаш Ооң үзел-бодалдарын чугаалап турар (Исаия 43:10). Иегованың Херечилери сеңээ Иегованың дугайында алыс шынны билип алырынга, ангелдер дег, дузалажыр күзелдиг. Сени база Бурганның өңнүү болурун олар күзеп турар.