Каржы кижилерге Дываажаңны Иегова үретпес. Аңаа чүгле Бурганның өңнүктери чурттаар. Каржы кижилер-биле чүү болурул? Харыыны билип алыр дээш, Нойнуң шынныг төөгүзүн көрүптээли. Ной муң-муң чылдар бурунгаар чурттап чораан. Ол эки кижи, база үргүлчү бүгү күжү-биле Иегованың күзелин күүседирин кызып чораан. Ынчалза-даа чер кырынга өске кижилер каржы чүүлдер кылып турган. Ынчангаш Иегова Нойга, шупту каржы кижилерни Суг халавы-биле узуткаар деп турарын чугаалаан. Ной болгаш ооң өг-бүлези Суг халавы кээрге, камгаланыр кылдыр, хааржак-хеме тударын Нойга Ол айыткан (Бытие 6:9—18).

Ной өг-бүлези-биле хааржак-хемени туткан. Ной Суг халавы болурун кижилерге кичээндирерге-даа, олар дыңнавайн, каржы чоруун уламчылап турганнар. Кажан хааржак-хеме туттуна бээрге, Ной дириг-амытаннарны ынаар чыггаш, өг-бүлези-биле кире берген. Ынчан Иегова коргунчуг шуурганны черже углапкан. Чаъс 40 хүн, 40 дүн чаарга, бүгү черни суг шыпкан (Бытие 7:7—12).

 Каржы кижилер өлген, Ной болгаш ооң өг-бүлези дириг арткан. Иегова оларны Суг халавындан камгалааш, каржы чүүлден арыглаан черни берген (Бытие 7:22, 23). Шынны күүседиринден ойталаан улусту, Иегованың узуткаар үези катап келир деп, Библия чугаалаан. Эки улус өлбес. Олар Дываажаң черге мөңге чурттаар (2 Петрдан 2:5, 6, 9).

Бөгүн каржы чүүлдерни хөй улус кылып турар. Делегей хилинчек-биле долган. Кижилерни баш удур медеглээр дээш, Иегова бодунуң Херечилерин катап, катап чортуп турар, ынчалза-даа хөй кижилер Иегованың сөстерин дыңнаар күзел чок. Олар оруктарын өскертир хөөн чок. Бурган эки биле бактың дугайында чүнү чугаалап турарын, олар хүлээр күзел чок. Ол кижилер-биле чүү болурул? Олар кажан-бир өскерлир бе? Дыка хөйү черле өскерилбес. Каржы кижилерни узуткаар үе чоок, олар кажан-даа катап чурттавас (Ырлар 91:8).

Чер узуткаттынмас, ол Дываажаң болур. Бурганның өңнүктери болуп турар улус, Дываажаң черге мөңге чурттаар (Ырлар 36:29).