Кичээл 4

Аза деп кымыл?

Аза Эрлик кайыын тыптып келгенил? (1, 2)

Аза кижилерни канчаар мегелеп турарыл? (3—7)

Азага удурланыры биске чүге херегил? (7)

1. Аза азы Эрлик деп очулдурган грек дылда «диаболос» деп сөстүң утказында өскениң дугайында каржы нүгүл тарадыкчызы дээн. «Аза» дээрге «дайзын» азы «удурланыкчы» дээн. Ындыг аттарны Бурганның кол дайзыны эдилеп турар. Эгезинде ол дээрге Бурган-биле чурттап турган тергиин ангел турган. Ынчалза-даа соонда ол бодунуң дугайында эмин эртир хөй бодап, Бурганның эргезинде турар чүдүлгени күзей берген (Матфейниң 4:8—10).

2. Ол ангел, Аза, чылан таварыштыр Ева-биле чугаалажы берген. Ону мегелээш, Бурганны дыңнавазынче күткээн. Аза ынчалдыр Бурганның «тергииделин», азы Дээди Дээрги болуп турарын каржы удурланыышкын-биле шүгүмчүлээн. Бурган чагыргазын шын ажыглап турар бе, албатыларының эрге-ажыын кичээнгейге ап турар бе? — деп, айтырыгларны Аза тургузуп келген. Оон ыңай Аза: чаңгыс безин кижи Бурганга кызыгаар чок бердинген бооп артар бе? — деп чигзинген. Ынчаар аажылааш, Аза Бурганның дайзыны апарган. Мооң ужурунда ол Нүгүлчү Аза деп адаттынган (Бытие 3:1—5; Иов 1:8—11; Ажыдыышкын 12:9).

3. Кижилер аңаа чүдүзүн дээш, Аза мегелээрин кызып турар (2 Коринфичилерге 11:3, 14). Улусту мегелээр бир аргазы — меге шажын. Бир эвес шажын Бурган дугайында меге өөредип турар болза, ол Азаның сорулгазын күүседип турар (Иоанның 8:44). Меге шажыннарның талалакчылары алыс шын Бурганга чүдүп тур бис деп шын сеткилинден бодап болур. Ынчалза-даа олар Азага бараан болуп турар. Ол «амгы бо делегейниң «бурганы» (2 Коринфичилерге 4:4).

4. Азаның кижилерни чагырып алырының дараазында аргазы — көзүлбес күштер-биле харылзаа. Кижилер көзүлбес күштерден камгалал дилээр, өске улуска хора чедирер, келир үени баш бурунгаар билип алыр дээш, хуулгаазыннар кылдыртырда кыйгырарлар. Бо бүгүнүң артында каржы күш — Аза турар. Бурганга тааржыр деп бодаар болзувусса, канчап-даа көзүлбес күштер-биле харылзашпас ужурлуг бис (Второзаконие 18:10—12; Ажыл-чорудулга 19:18, 19).

5. Оон аңгыда, Аза кедергей язы-сөөк чоргааралынче хөлзедип база политиктиг организацияларга чүдүүрүнче албадавышаан, кижилерни мегелеп турар.  Кижилер чамдыкта чонун азы расазын өскелерден дээре деп санаар. Ол шын эвес (Ажыл-чорудулга 10:34, 35). Оон ыңай кижилерниң бергелерин политиктиг организациялар чайладыр деп, бодал бар. Аңаа бүзүрээр улус Бурганның Чагыргазын хүлээвейн турар. Ынчалзажок кижи төрелгеттенниң бергелерин чүгле Бурганның Чагыргазы шиитпирлептер (Даниил 2:44).

6. Азаның кижилер мегелээр аргаларының бирээзи — бачыттыг күзелдер-биле күткүүрү. Бачыттыг чаңчылдарның хоралыын Иегова билир, ынчангаш оон адырлырын негеп турар (Галатчыларга 6:7, 8). Чамдык бачыт кылып чаңчыккан кижилер сени оларга катчырын күзеп турар чадавас. Ынчалза-даа сенден ону шынында Аза күзеп турарын сактып чор (1 Коринфичилерге 6:9, 10; 15:33).

7. Иеговадан ойталаарынче албадаар дээш, Аза истеп сүрүүшкүн азы удурланыышкын ажыглап болур. Библияны өөрени бээриңге, чоок улузуңдан кым-бир кижи хөлчок хорадап болур. Өскелери сени кыжырый бээр чадавас. Ынчалза-даа амы-тынны сеңээ кым бергенил? Иегованың дугайында билиглер алырыңны соксадыр дээш, Аза сени коргудар күзелдиг. Азага тиилээр арга бербе! (Матфейниң 10:34—39; 1 Пётрнуң 5:8, 9). Азага удурланыр болзуңза, Иегованы өөртүп база Ооң эрге-чагыргазын күзээриңни көргүзериң ол (Притчи 27:11).

[9 дугаар арын, чурук]

Көзүлбес күштер-биле харылзаа, меге чүдүлге, язы-сөөк ылгаар чорук кижилерни будалдырып турар.

[9 дугаар арын, чурук]

Азага удурланып, Иегованың дугайында билиглерни алырын уламчыла.