Кичээл 9

Бурганның бараалгакчылары арыг болур ужурлуг

Чүге бүгүде арыг болур ужурлуг бис? (1)

Кандыг уткалыг чүдүлге арыг болурул? (2) мөзү-шынар? (3) бодалдар? (4) даштыкы хевир, бажың-балгат? (5)

Кандыг арыг эвес чугаадан ойталаары чогуур? (6)

1. Иегова арыг болгаш ыдыктыг Бурган. Ол бодунуң чүдүкчүлеринден чүдүлге, мөзү-шынар болгаш ал-бот, оран-сава база бодалдары арыг болурун манап турар (1 Пётрнуң 1:16). Бурганның караанга арыг болурун күзээр болзувусса, бистиң талавыстан шыңгыы күжениишкиннер херек. Бистиң чурттап чоруур өртемчейивис арыг эвес. Оон аңгыда боттарывыстың шын эвес күзелдеривис-биле демисежип турар бис. Ынчалза-даа дүжүп бербес ужурлуг бис.

2. Арыг чүдүлге. Иеговага бараан болурун күзээр болзувусса, меге чүдүлгениң өөредиглерин болгаш чаңчылдарын сагывас ужурлуг бис. Меге чүдүлгени каггаш, ону канчаар-даа деткивес ужурлуг бис (2 Коринфичилерге 6:14—18; Ажыдыышкын 18:4). Бурган дугайында шынны билип алгаш, мегеге өөредир улустуң будулгаазынынга алыспазы-биле оваарныры чугула (2 Иоанның 10, 11).

3. Мөзү-шынар арыы. Иегова чүдүкчүлеринден үргүлчү алыс шын христианнар бооп алдынып чоруурун күзээр  (1 Пётрнуң 2:12). Ол бистиң чүнү кылып турарывысты, чажыт херектерни безин шуптузун көрүп турар (Еврейлерге 4:13). Эр-херээжен мөзү чок чорук база бо делегейниң арыг эвес чаңчылдарындан ойталаар ужурлуг бис (1 Коринфичилерге 6:9—11).

4. Бодалдарның арыы. Угаанывысты арыг бодалдар-биле долдурар болзувусса, аажы-чаңывыс база арыг болур (Филиппийжилерге 4:8). Бир эвес угаан багай бодалдар-биле долган болза, түңнелинде багай херектер болур (Матфейниң 15:18—20). Бистиң угаанывыска багай салдарлыг хөглээшкиннерден ойталаары чугула. Бурганның Сөзүн өөренип тура, угаанывысты арыг бодалдар-биле долдуруп болур бис.

5. Даштыкы хевир, бажың-балгат арыы. Христианнар — Бурганның төлээлекчилери, ынчангаш мага-бодун болгаш идик-хевин арыг тудар. Арыгланыр бажың кирген соонда база чемненир болгаш аъш-чемни белеткээр бетинде холду чууру чугула. Бир эвес бажыңда чиигээр чер чок болза, албанны хөөп каар херек (Второзаконие 23:12, 13). Мага-бот, бажың-балгат арыы — каң-кадыкшылдың үндезини. Христиан кижиниң бажыңы иштинде-даа, даштында-даа арыг-силиг болур ужурлуг. Өске бажыңнар-биле деңнээрге үлегерлиг болуру чугула.

6. Арыг чугаа. Бурганның бараалгакчылары үргүлчү шынны чугаалаар ужурлуг. Мегечилер Бурганның Чагыргазынче кирбес (Ефесчилерге 4:25; Ажыдыышкын 21:8). Христианнар бак сөс этпес. Олар утказы куду, баштак болгаш ааска эптешпес төөгүлерни чугаалавас-даа, дыңнавас-даа. Бодунуң арыг чугаазы-биле олар ажылда, школада болгаш долгандыр чурттакчылардан ылгалдыг (Ефесчилерге 4:29, 31; 5:3).

[18, 19 дугаар арыннар, чуруктар]

Бурганның бараалгакчылары бүгүде арыг болур ужурлуг.