Кичээл 10

Бурганның көөр хөңнү чок херектери

Бурганга багай чүүлге кандыг хамаарылгалыг болурул? (1)

Кандыг эр-херээжен чорук Бурганга таарышпас? (2)

Христиан кижи мегеге кандыг хамаарылгалыг болур ужурлуг? (3) адаанныг оюннарга? (3) оор чорукка? (3) каржы чорукка? (4) илби-шидиге? (5) арагалаашкынга? (6)

Кижи багай херектерден канчаар адырлып алырыл? (7)

1. Бурганның бараалгакчылары буянныг чүүлге ынак. Ынчалза-даа олар каржыны көөр хөөн чок болурунга өөренир ужурлуг (Псалом 96:10). Ол дээрге Бурганның хөңнү чок херектеринден ойталаары болур. Кандыг херектерден?

2. Самыын чорук. Өөнүң ээзинге шынчы эвес, өгленир бетинде, мал-маган-биле, чоок төрелдер аразында, эр улус эр улус-биле эр-херээжен чорук кылыры — Бурганга удур кончуг аар бачыттар (Левит 18:6; Римчилерге 1:26, 27; 1 Коринфичилерге 6:9, 10). Ийи кижи өгленмейн чыткаш кады чурттап турар болза, чарлыры азы бадыланчыры шын (Еврейлерге 13:4).

3. Меге, адаанныг оюннар, оорлаашкын. Иегова Бурган кажан-даа мегелевес (Титке 1:2). Ооң эки хамаарылгазын чедип аар дээн улус мегелевес ужурлуг (Притчи 6:16—19; Колоссчуларга 3:9, 10). Адаанныг оюннарның шупту хевирлери чазыйландырар. Ынчангаш христианнар кандыг-даа адааннажыр оюннар ойнавас: лотерея, аът чарыжы  азы бинго дээн ышкаш (Ефесчилерге 5:3—5). Христианнар оорланмас. Биле тура-ла оорлаан чүүл садып албас, база өске кижиниң эдин айтырыг чокка албас (Исход 20:15; Ефесчилерге 4:28).

4. Кылык хайныры, каржы чорук. Башкарылга чок кылык күчүлелче идип болур (Бытие 4:5—8). Каржы чорук кылып чоруур кижи Бурганның өңнүү болуп шыдавас (Псалом 10:5; Притчи 22:24, 25). Өжээн негеп, каржыны каржы-биле харыылаары шын эвес (Притчи 24:29; Римчилерге 12:17—21).

5. Илби-шиди болгаш караң көрнүрү. Чамдык улус аарыглар эмнээр дээш көзүлбес күштер ажыглаар. Өскелери дайзыннары аарызын азы өлзүн дээш каргыш салырлар. Бо бүгүнүң артында турар күш — Аза. Ынчангаш христианнар канчап-даа аңаа киришпес ужурлуг (Второзаконие 18:9—13). Биске удур салган каржы күштерден эң-не дээре камгалал — Иегова-биле сырый харылзааны кадагалаары (Притчи 18:10).

6. Арагалаашкын. Хөй эвес арага, пиво азы өске арагалыг суксуннар ижеринде багай чүү-даа чок (Псалом 103:15; 1 Тимофейге 5:23). Ынчалза-даа хөй ижери база арагалаашкын — Бурганның караанга шын эвес (1 Коринфичилерге 5:11—13; 1 Тимофейге 3:8). Эмин эрттир арага ижерге кадыкшыл үрелир база өг-бүле бустур. Оон аңгыда өй чок арага ижер кижи өске күткүлдерге белени-биле алзып болур (Притчи 23:20, 21, 29—35).

7. Бурганның багай деп санаар херектерин кылып турар улус «Бурганның Чагыргазын салгавас» (Галатчыларга 5:19—21). Бурганга шынап-ла ынак болгаш ооң мурнунга таарымчалыг болурун күзээр болзуңза, ындыг херектерден адырлып шыдаар сен (1 Иоанның 5:3). Бурганның караанга багай чүүлдерни көөр хөңнүң чок кылдыр өөрен (Римчилерге 12:9). Бурганга тааржыр, чаңчылдары сайзыраңгай улус-биле аралажып харылзаш (Притчи 13:20). Арга-дуржулгалыг христиан өңнүктер дуза кадып болур (Иаковтуң 5:14). Оон артык Бурганның дузазын дилеп мөргүвүшаан, аңаа идеге (Филиппийжилерге 4:6, 7, 13).

[20, 21 дугаар арыннар, чуруктар]

Бурган арагалаашкынга, оорлаашкынга, адааннажыр оюннарга болгаш күчүлелге хөңнү чок.