Кичээл 14

Иегованың Херечилериниң организациязының тургузуу

Иегованың Херечилериниң амгы төөгүзү кажан эгелээнил? (1)

Иегованың Херечилериниң хуралдары канчаар эртип турарыл? (2)

Чарыгдалдар канчаар дуглаттынып турарыл? (3)

Хуралдарның удуртулгазын кым харыылап турарыл? (4)

Чыл санында кандыг улуг ужуражылгалар эртип турарыл? (5)

Кол башкарылга черинде болгаш салбырларда кандыг ажыл чоруттунуп турарыл? (6)

1. Иегованың Херечилериниң амгы төөгүзү 1870 чылдарда эгелээн. Эгезинде олар Библияның Шинчилекчилери деп аттыг турган. Ынчалза-даа 1931 чылда Иегованың Херечилери деп атты Библиядан үндезилеп алганнар (Исаия 43:10). Эгезинде бичии организацияга, ам 230 ажыг чуртта база девискээрлерде миллион-миллион идепкейлиг суртаалчылар хамааржыр.

2. Иегованың Херечилериниң хөй кезиинде неделя санында үш ужуражылга эртип турар. Шупту күзелдиг кижилерни кайызынче-даа чалап турар (Еврейлерге 10:24, 25). Өөренир кол чүүл — Библия. Хуралдар мөргүл-биле эгелээр болгаш мөргүл-биле төнер. Хуралдарның хөй кезиинде чүректиң ханызындан «ыдыктыг ырлар» күүсеттинип турар (Ефесчилерге 5:18, 19). Кирери хостуг, акша чыылдазы кылбайн турар (Матфейниң 10:8).

3. Хуралдарның хөй кезии тускай залдарда эртип турар. Ол колдуунда Херечилерниң аразындан эки турачыларның тутканы бөдүүн бажыңнар болур. Ооң иштинде дүрзү-хевирлер, белдир-крест ышкаш чүүлдер чок. Чарыгдалдар эки тура  өргүлү-биле дуглаттынып турар. Күзелдиг улус тургузуп каан тускай хааржактарже өргүп болур (2 Коринфичилерге 9:7).

4. Хурал бүрүзүнде удуртукчулар азы хайгааракчылар бар. Олар хуралдың өөредилгезин удуртуп турар (1 Тимофейге 3:1—7; 5:17). Оларга дузалакчылар дузалажып турар (1 Тимофейге 3:8—10, 12, 13). Адаттынган бараалгакчылар — хуралдың арткан христианнарындан бедик эвес (2 Коринфичилерге 1:24). Оларда тускай ат-дужаал чок. (Матфейниң 23:8—10). Шупту улус ышкаш кеттинерлер. Оларның ажылы төлеттинмес. Олар хуралдың чүдүлгези дээш эки туразы-биле сагыш човап турар. Берге үелерде олар сагыш оожургадып болгаш сүме кадып болур (Иаковтуң 5:14—16; 1 Пётрнуң 5:2, 3).

5. Оон ыңай Иегованың Херечилеринде чыл санында массалыг ужуражылгалар азы конгресстер болуп турар. Аңаа чаңгыс үеде хөй хуралдар библейжи өөредилгениң тускай программазын дыңнаар. Дүрүм ёзугаар конгресс бүрүзүнде чаа өөреникчилерниң сугга сугарын эрттирер (Матфейниң 3:13—17; 28:19, 20).

6. Иегованың Херечилериниң бүгү делегей чергелиг кол башкарылгазы Нью-Йоркта. Ында, бүгү делегейниң хуралын хайгаараар, арга-дуржулгалыг — Удуртур чөвүлел ажылдап турар. Оон ыңай, аңгы-аңгы чурттарда 100 ажыг салбырлар ажылдап турар. Ында күзелдиг ажылчыннар библейжи ном-дептерлерни парлаарынга болгаш тарадып чортурунга дузалажып турар. Салбырларда суртаал ажылының башкарылгазы база чоруттунуп турар. Чоокку салбырже чедерин бодап алза кандыгыл?