Иегованың Херечилери Олар чүге бүзүрээрил?

«Ындыг-даа болза үзел-бодалың дугайында сенден боттарывыс дыңнаксап тур бис, чүге дээрге улус чер болганга ол өөредигге удурланып турарын дыңнаан бис» (Ажыл-чорудулга 28:22). Бир дугаар чүс чылда Римге общинаның удуртукчулары эки чижек көргүскен. Олар чамдык чүүлдерни чүгле өске шүгүмчүлекчилерниң аксындан эвес, а үндезин барымдаадан дыңнап алыксап турганнар.

Бистиң дугайывыста хөй-ле меге бодалдар бар болганда, шынны бүзүрелдиг эвес үндезиннерден кызып, билип ап көөрү бодамча чок болур. Ынчангаш бис чүдүлгевистиң чамдык үндезин өөредиглерин силерге чугаалап бээринге өөрүүр-дүр бис.

Библия, Иисус Христос болгаш Бурган

«Бурган Бижилгени бүрүнү-биле хей-аът киирген болгаш [ол] ажыктыг» дээрзинге бүзүрээр бис (2 Тимофейге 3:16). Чамдык кижилер бисти херек кырында христианнар эвес деп бадыткап-даа турар болза, ол шын эвес. Иисус Христоска хамаарыштыр апостол Петрның барымдаазынга каттыжар-дыр бис: «Камгалал чүгле оон кээр, чүге дээрге, бисти ооң ачызында камгалал алзын дээш, кижи амытанга берип каан өске ат бүгү чер делегейде чок» (Ажыл-чорудулга 4:12).

Иегованың Херечилери Бурганны Иисустан улуг деп бүзүрээр, чүге дизе Иисус «Мен — Бурганның Оглу мен» база «Мени дириг Адам айбылап чоруткан» деп чугаалаан  (Иоанның 10:36; 6:57). Ону Иисус Боду мындыг сөстер-биле бадыткаан: «Адам Менден өндүр чаагай болгай» (Иоанның 14:28; 8:28). Ынчангаш бис Иисусту, Үш Бурган дугайында өөредигде чугаалааны ышкаш, Бодунуң Адазынга дең дээрзинге бүзүревес бис. Харын-даа, бис Иисусту Бурган чаяап каан болгаш Ол Бурганга чагыртып турар деп бүзүрээр бис (Колоссчуларга 1:15; 1 Коринфичилерге 11:3).

Орус дылда Бурганның ады — Иегова. Исход 6:3-те мынча деп айыткан: «Мен Авраамга, Исаакка база Иаковка «Бүгүдени Шыдаар Бурган» деп ат-биле келген мен, а «Дээрги-Чаяакчы» [Иегова, немелде тайылбыр] дээр адымны ажытпаан мен». Ол медеглелге дүүштүр Иисус Бурганның адынга тускай ужур-утканы берип, бодунуң талалакчыларын мөргүп өөредип турган: «Дээрде Адавыс! Сээң адың алдаржызын!». Ол Боду Бурганга мөргүп турган: «Сээң бо делегейден алгаш, Меңээ хүлээдип берген улузуңга Сээң адыңны ажыдып бердим» (Матфейниң 6:9; Иоанның 17:6).

Иегованың Херечилери, Иисус-биле дөмей, өскелерге Бурганның адын болгаш Ооң бодалдарын чарлаар ужурлуг деп санап турар. Ындыг болганда, бис Иегованың Херечилери деп атты хүлээп алган бис, чүге дээрге Иисусту, «Шынчы Херечини», өттүнүп турар бис (Ажыдыышкын 1:5; 3:14). Исаияның 43:10 ёзугаар Бурган Бодунуң чонунга таарыштыр чугаалаан: «Мээң Херечилерим, силер болгаш Мээң шилип каан кулум, деп Дээрги-Чаяакчы [Иегова, Ыдыктыг Бижиктерниң Чаа Делегей очулгазы (англ.)], чугаалап тур».

Бурганның Чагыргазы

Иисус Бодунуң талалакчыларын мынчаар мөргүүрүн өөредип турган: «Сээң Чагыргаң чедип келзин», база Ол Чагырганы Бодунуң өөредииниң кол темазы кылган (Матфейниң 6:10; Луканың 4:33). Чагырга — ёзулуг бар күрүне, ол дээрден черни башкарар, база Иисус Христос ооң томуйлаан көзүлбес хааны деп Иегованың Херечилери бүзүреп турар. «Ооң эрге-чагыргазы база тайбыңы кызыгаар чок көвүдээн» (Исаия 9:6, 7).

 Ындыг-даа болза Иисус Христос Бурганның күрүнезиниң кара чаңгыс хааны эвес. Ооң дээрге хөй кады хааннаар дузалакчылары бар. «Ам шыдажып турар болзувусса, ооң биле кады башкарар бис» — деп, апостол Павел бижээн (2 Тимофейге 2:12). Дээрге Христос-биле башкарар кылдыр диргизер кижилерниң саны «черден садып алдынган чүс дөртен дөрт муң-биле» кызыгаарлаттынган деп, Библия айтып турар (Ажыдыышкын 14:1, 3).

Шупту күрүнелерниң албатылары бар болганда, дээрде башкарыкчылардан аңгыда, миллиард өске кижилер мөңге чуртталганы алыр деп, Иегованың Херечилери бүзүреп турарлар. Адак сөөлүнде, чер чараш сесерлик кылдыр өскерлип, Христостуң болгаш Ооң кады башкарар дузалакчыларынга чагыртыр Бурганның Чазааның төлептиг албатылары-биле долар. Ынчаар Иегованың Херечилери, чер кажан-даа узуткаттынмас база «Шынны сагыыр кижилер черни салгап, мөңге чурттаар» деп библейжи аазаашкын күүсеттинеринге быжыг бүзүрелдиг (Псалом 36:29; 103:5).

Ынчалза-даа Бурганның Чагыргазы кандыг арга-биле келирил? Кижилерниң херектеринче Бурганның дорту-биле киржилгези негеттинип турарын Библия тодаргай көргүзүп турар: «Дээрги Бурган чазак тургузар, ол мөңгеде бууравас, база ол чазак... шупту чазактарны чылча шаап, бузар, а боду мөңге артар (Даниил 2:44).

Бурганның Чазаа кажан келирил? Бо хүн күүсеттинип турар библейжи баш удур чугаалаан чүүлдеринге даянып алгаш, Иегованың Херечилери ол көңгүс удавас чедип келир деп бүзүреп турарлар. Бо тургузугнуң «сөөлгү хүннериниң»  демдектерин Грек Бижиктерде баш удур тодаргай бижип каан. Матфейден 24:3—14, Лукадан 21:7—13 база 2 Тимофейге 3:1—5 бижээн баш удур чугаалаан чүүлдерниң чамдыызын көөрүн силерге сүмелеп тур бис.

Бистер Бурганывыс Иеговага бүгү-ле чүрээвис-биле, сеткил-сагыжывыс-биле, угаан-сарыылывыс-биле, күжүвүс-биле ынак база чанывыста кижилерге бодувуска дег ынак болганывыста, бистерде сөөк-язы ылгаар, раса болгаш ниити байдал ылгаар чорук шуут чок (Марктың 12:30, 31). Бистиң бүгү делегейде чурттап турар христиан акышкылар аразында көстүп турар ынакшылывыс калбаа-биле билдингир. Бо чүүл «сөөлгү хүннерниң» демдектериниң дугайында тодаргай бижээн баш удур көрген чүүл-биле дүгжүп турар, ында шупту чоннардан кижилер Бурганга чүдүүр болгаш «моон соңгаар дайыннажырынга өөренмес» деп чугаалаан (Исаия 2:2—4; Софония 3:9; Иоанның 13:35). Ынчангаш чурттарның политиктиг херектеринге хамаарыштыр нейтралдыг турушту ээлеп турар бис. Бурганга шын чүдүүрү — мөзү чок чоруктан, ооң санында: мегеден, оор чоруктан, ашак-кадай болганынга шынчы эвезинден, самыын чоруктан, гомосексуализмден, ханны шын эвес ажыглаарындан, бурган хевиринге чүдүүрүнден болгаш Бижилгелерниң хоруп турар ындыг янзылыг херектеринден ойталап чорууру деп, санап турар бис (Исход 20:3—5; 13—17; Левит 17:10; 20:13; Псалом 14:1—5; 1 Коринфичилерге 6:9—11).

Келир үеже идегел

Бистиң бо өртемчейде бо үеде чуртталгавыс мооң-биле төнмээн деп, Иегованың Херечилери бүзүреп турар. Бурганның Чагыргазының үезинде бисти кайгамчыктыг келир үе манап турар деп быжыг бүзүрелдиг бис — өлген улус безин дирлип келир! Кижи өлүп каарга, ооң амыдыралы соксаар деп, Библияның өөредиинге бүзүрээр бис (Псалом 145:3, 4; Екклесиаст 9:5; Иезекииль 18:4). Библияда өлүм чок сүнезин азы катап төрүттүнериниң дугайында бодал тывылбас.  Харын-даа өлген улустуң келир чуртталгазы Бурганның диргизиишкин үезинде оларның дугайында сактып кээринден хамааржыр (Иоанның 5:28, 29).

Ооң-биле кады кажан Бурганның Чагыргазы шупту чазактарны узуткап кааптарга, амгы үеде чурттап турар хөй кижилер дириг артар деп, Иегованың Херечилери бүзүрээр. Ынчан Ной болгаш ооң өг-бүлези улуг Үерден дириг артканы ышкаш, ол дириг арткан улустар арыглаттынган черге аас-кежиктиг чурттаар (Исаия 11:1—9; 65:17; Матфейден 24:36—39). Бо делегейниң төнчүзүн чурттап эртер дизе, Иегованың негелдезинге дүгжүрү чугула. Библияда мынча дээн: «Бо делегей... эстип хайлы бээр. А Бурганның күзел-соруун күүседип чоруур кижи мөңге амыдыраар» (1 Иоанның 2:17; Псалом 36:11; Ажыдыышкын 7:9, 13—15; 21:1—5).

Чугаажок, бистиң шупту чүдүлге өөредиглеривисти бо дептержигештиң арыннарынга чугаалаары болдунмас, ынчангаш силерниң чурттап турар чериңерде Иегованың Херечилеринден айтырарын сүмелээр-дир бис.

[4 дугаар арында киирилде немелде]

Иегованың Херечилери деп атты хүлээп алган бис, чүге дээрге Иисусту өттүнүп турар бис