КӨРЕМ, бо бичии уруг эштери-биле чүнү номчуп турар-дыр? Шын-дыр, сээң ам номчуп турарың ном-дур — «Мээң библейжи чугааларлыг номум». База сээң номчуп турарың эгени олар номчуп турлар — «Мөңге чурттаар дизе, чүнү кылыр ужурлуг бис».

Билир сен бе, олар оон чүнү билип ап турарыл? Бир эвес мөңге чурттаар күзелдиг болзувусса, хамыктың мурнунда Иегованың болгаш ооң оглу Иисус Христостуң дугайында билип алыр ужурлуг бис. Библияда чугаалап каан: ‘Мынчаар мөңге чурттап болур. Чаңгыс алыс шын Бурганның дугайында база ооң черже чоруткан Оглу Иисус Христостуң дугайында билип ал’.

Иегова Бурганның база ооң Оглу Иисустуң дугайында канчаар билип ап болур бис? Бир аргазы: «Мээң библейжи чугааларлыг номум» деп номну эгезинден төнчүзүнге чедир номчууру. Ында Иегованың болгаш Иисустуң дугайында хөйнү чугаалап турары, шын-дыр бе? Бо номда оон ыңай оларның кылган азы бүдүрер деп турары хөй херектериниң дугайында база дыңнадып турар. Ынчалза-даа бис чүгле бо номну номчуурундан аңгыда, хөйнү кылыр ужурлуг бис.

Шалада база бир номну көрүп тур сен бе? Ол Библия-дыр. Чугааларның үндезини болур Библияның үзүндүлерин бир кижи сеңээ номчуп берзин. Бис Иеговага шын бараалгап шыдаар кылдыр база мөңге чуртталганы алыр кылдыр, Библияда шупту херек чүүл бар. Ынчангаш Библияны үргүлчү өөренир кылдыр чаңчыгар ужурлуг бис.

Ынчанмыже Иегова Бурганның болгаш Иисус Христостуң дугайында чүгле билип алыры чедишпес. Оларның дугайында база олар чүге өөредип турар дугайында дыка хөйнү билир тургаш-даа, мөңге чуртталганы албайн барып болур бис. Оон ыңай чүү херегин, билир сен бе?

Өөренип алган чүүлүвүске дүүштүр чурттаар ужурлуг бис. Иу́да Искарио́тту сактыр-дыр сен бе? Ол Иисустуң шилип алганы 12 апостолдарының бирээзи турган. Иу́да Иегованың болгаш Иисустуң дугайында дыка хөйнү билир турган. Ынчанмыже ооң-биле чүү болган? Элээн үе эрткенде, ол бодунга ынак апаргаш, Иисусту дайзыннарга 30 мөңгүн чооска садыпкан. Ынчангаш Иу́да мөңге чуртталганы албас.

69 дугаар чугаада Гиезий деп аттыг кижи дугайында номчуп турдувус, сактыр сен бе? Ол өске кижиниң хевин база акшазын алырын күзей берген. Ол эт-септи алыксааш, ол мегелепкен. Ынчалза-даа Иегова ону ол дээш шииткен. Бир эвес ооң хоойлуларын дыңнавас болзувусса, ол бисти база шиидер.

Ынчанмыже Иеговага шынчы бараалгап чораан эки кижилер база хөй турган. Бис база олар ышкаш болурун күзээр бис бе? Бичии Самуи́л эки үлегер көргүскен. Самуи́л Иегованың чадырынга бараалгап эгелээрде, чүгле дөрт-беш хире харлыг турганын 55-ки чугаадан билип алганывысты, сактып келем. Ынчангаш сээң харың каш-даа болза — Иеговага бараалгаары кажан-даа эрте эвес.

Иисус Христостуң үлегерин эдерерин бис шупту күзеп турар болгай бис. 87 дугаар чугаадан Иисус көңгүс элээди тургаш, өргээге өске улустар-биле дээрде Адазының дугайында чугаалажып турганын билип алган бис. Ол дег болуулам, че. Бистиң кайгамчыктыг Иегова Бурганывыс база ооң Оглу Иисус Христостуң дугайында аргалыг-ла болза хөй санныг кижилерге чугаалап берээлем, че. Ынчаар кылып тургаш, черге Бурганның дываажаңынга мөңге чурттап болур бис.