МИДИЙЖИЛЕР биле пе́рсилер Вавило́нну эжелеп алганындан бээр ийи хире чыл эрткен. Көрүп көрем, ам чүү болуп турар-дыр! Ийе — изра́ильчилер Вавило́ндан чоруп турар. Канчап хосталып алганнары ол? Кым оларга чоруурун чөпшээрээн?

Пе́рси хаан Кир. Кир төрүттүнер ырак мурнунду-ла, Иегова Иса́ияны ол дугайында бижиир кылдыр оттурган: ‘Сен ылап-ла меңээ таарымчалыг чүүлдү кылыр сен. Хоорайның эжии ажык артып каар, ынчангаш хоорайны эжелептер сен’. Шак ынчалдыр болган. Вавило́н Ки́рниң башкарылгазы-биле эжелеттинген. Эжии, душ бооп, ажык арттарга, мидийжилер пе́рсилер-биле хоорайже кире берген.

Оон аңгыда, Иерусали́мни база ооң өргээзин катап тудар кылдыр Кир дужаал бээр, деп Иегованың медээчизи Иса́ия чугаалаан. Кир ындыг дужаал берген бе? Ийе, берген. Изра́ильчилерге Кирниң чугаалаан чүүлү бо: ‘Ам дораан Иерусали́мче баргаш, Иегова Бурганыңарның өргээзин тудуңар’. Ам изра́ильчилер шак ынаар бар чыдар.

Ынчалзажок Вавило́нда чурттап турар изра́ильчилерниң чамдыызы Иерусали́мге чедир ындыг узун орукту эртип шыдавас. Ооң узуну 800 километр, а хөй-ле изра́ильчилер хөлчок кыраан азы аарып турар. Чамдык изра́ильчилерниң артып каарында оон өске чылдагааннар база бар. Ынчалза-даа чорувас улуска Кир дужааган: ‘Алдын-мөңгүн база оон-даа өске белектерден Иерусали́мни база ооң өргээзин тудуп чоруур улуска бериңер’.

Шак ынчалдыр Иерусали́мче чоруур изра́ильчилер хөй белектер алган. Оон аңгыда Кир оларга, Иерусалим бузулган турда, Навуходоно́сор хаанның Иегованың өргээзинден алган аяктарын база кубоктарын берген. Чон дыка хөй чүүлдерни аппарган.

Изра́ильчилер бо орукту дөрт ай дургузунда эрткеш, Иерусали́мге үезинде чеде берген. Хоорай бузулган база чурт мырыңай кижи чок арткан үеден бээр, таптыг-ла 70 чыл эрткен. Изра́ильчилер чуртунче чанып келген-даа болза, хөй бергелерге таваржып турганын дараазында эгеден билип алыр бис.