ХӨЙ муң-муң кижилер Вавило́ндан Иерусали́мге чедир узун орукту эрткен. Ынчалза-даа олар кээрге, Иерусали́м — чүгле улуг бөлүк бузундулар болган. Мында кым-даа чурттавайн турар. Олар шуптузун катап тудар ужурга таварышкан.

Баштай олар өргүл салыр бедигээшти туткан. Иеговага белек кылдыр дириг амытаннар өргүүр тускай черни. Каш ай болганда изра́ильчилер өргээни тудуп кирипкен. Ынчалза-даа долгандыр чурттап турар дайзыннар изра́ильчилерниң өргээ тударын күзевейн турар. Ынчангаш тудугну соксадыр дээш, оларны коргударын оралдажып турар. Түңнелинде Пе́рсияның чаа хаанын тудуг ажылдарын хоруп турар хоойлу үндүрерин олар албадап шыдапкан.

Чылдар эрткен. Изра́ильчилерниң чанып келгенинден бээр барык 17 дугаар чыл эртип турар. Чонну тудугну уламчылаарынче кыйгырар кылдыр, Иегова бодунуң медээчилери Иса́ияны болгаш Заха́рияны чортупкан. Чон Иегованың дузазынга даянып, медээчилерни дыңнап турар. Хоойлу тудуг кылырын хоруп турза-даа, ол катап эгелээн.

Ынчан Фафнай деп аттыг пе́рси дарга келгеш изра́ильчилерден айтырган — кандыг эрге-биле олар өргээни тудуп турарын. Ынчан изра́ильчилер Вавило́нга турда, Кир хаан оларга мынча дээнин дыңнаткан: ‘Ам дораан Иерусали́мче баргаш, Иегова Бурганыңарга өргээден тудуңар’.

Фафнай Вавило́нче, ол үеде мөчээн Кирниң сөглээн сөстери шын бе деп айтырган чагаа чоргускан. Удатпаанда Пе́рсияның чаа хаанындан харыы келген. Кир ол сөстерни херек кырында чугаалаанын, ол ында бадыткаан. Хаан дужааган: ‘Изра́ильчилер бодунуң Бурганынга өргээни тудуп алзыннар. Оларга кандыг-даа дузаны кадарын силерден негеп тур мен’. Дөрт хире чыл эрткенде өргээ туттунган, ынчангаш изра́ильчилер ол дээш дыка өөрүп турар.

Хөй чылдар эрткен. Өргээ туттунганындан бээр, 48 хире чыл эрткен. Иерусали́мде чон түреңги чурттап турар, а хоорай боду база Бурганның өргээзи дыка ядыы кылдыр көстүр. Ол үеде Вавило́нда Е́здра деп аттыг изра́ильчи кижи Бурганның өргээзинге септелге херек деп билген. Ол чүнү кылганыл, билир сен бе?

Е́здра пе́рси хаан Артаксе́рке баарга, ол буянныг хаан Е́здрага Иерусали́мче аппаар хөй белектер берген. Е́здра Вавило́нда чурттап турар изра́ильчилерден, ону Иерусали́мге чедиржип бээр кылдыр, дуза дилээн. 6 000 хире изра́ильчилер чоруур дишкен. Олар хөй алдын, мөңгүн база үнелиг эртинелер сөөртүп чораан.

Орукта багай кижилер хөй боорга, Е́здра дүвүреп турар.Олар алдын, мөңгүннү былаап ап, а боттарын өлүрүп болур. Ынчангаш, бо чурукта ону көргүскени ышкаш, Е́здра шупту чонну чыып алган. Чон Иеговага мөргүп турар, оларның Иерусали́мге чедир узун оруун ол камгалаар кылдыр.

Ынчангаш Иегова оларны камгалап турар. Дөрт ай болгаш онча-менди Иерусали́мге чедип келгеннер. Иегова ооң дузазынга даянып турар кижилерни камгалап турар деп, бо таварылга көргүзүп турар эвес-тир бе?