Дээр болгаш чер кайыын тыптып келгенил? Ол ышкаш ай, хүн, сылдыстар болгаш өске-даа чер кырында хөй чүүлдер кайыын тыптып келгенил? Библия шын харыыны берип турар: ол бүгүнү Бурган чаяаган. Ынчангаш бистиң номувус чаяалга дугайында библейжи чугаалардан эгелээн.

Бурганның бир дугаар чаяалгалары ооң бодунга дөмей, көзүлбес деп билип алыр бис. Ол дээрниң төлээлери болган. Ынчалза-даа чер биске — кижилерге чаяаттынган. Ынчангаш Бурган бир дугаар эр болгаш херээжен кижилерни, Адам биле Еваны чаяагаш, кайгамчыктыг чараш садка чурттадып каан. Ындыг-даа болза Адам биле Ева Бурганның чугаазын дыңнавайн баргаш, улаштыр чурттаар эргезин чидирген.

Адамның чаяаганындан бээр суг халавынга чедир 1 656 чыл эрткен. Ол үе дургузунда делегейде хөй багай хуу-боттар чурттап турган. Дээрге — көзүлбес мага-боттуг хуу-боттар: Эрлик база ооң багай дээрниң төлээлери. А чер кырынга — Каин болгаш өске-даа хөй багай кижилер, оларның аразында кайгамчык күштүг кижилер чораан. Ынчалза-даа чер кырынга эки кижилер база турган — Авель, Енох база Ной. БИР ДУГААР кезекте ол болуушкуннар болгаш ол кижилер дугайында чугаа болур.