БО чурук баштайгызындан чүнүң-биле ылгалып турар-дыр? Шын-дыр — мында кижилер бар. Ол бир дугаар эр биле херээжен кижилер-дир. Оларны кым чаяаганыл? Бурган. Ооң ады кымыл, билир сен бе? Иегова. А бир дугаар эр биле херээжен кижилер Ада́м биле Е́ва деп аттар алган.

Иегова Бурган Адамны мынчаар чаяап кылган. Ол черден довуракты алгаш, тергиин кижиниң мага-бодун чаяаган. Ооң соонда Адамның думчуунче үрүптерге, ол дириг апарган.

Иегова Бурган Адамга даалга берген. Ол шупту дириг-амытаннарга аттар бээр турган. Эң-не тааржыр аттарны шилип алыры-биле, Адам үр үениң дургузунда оларны шинчилеп, көрүп турган чадавас. Ынчалза-даа ону кылып тура, ол бир-ле чүүлдү эскерип эгелээн. Билир сен бе, чүнү?

Шупту дириг-амытаннар эжеш чурттап турганнар. Мында ачазы-чаан биле авазы-чаан, ачазы-арзылаң биле авазы-арзылаң бар болган. Чүгле Адамның эжи чок болган. Ынчаарга Иегова Адамны ханы уйгу-биле удудупкаш, ооң бир ээгизин уштупкан. Ол ээгиден Иегова херээжен кижини Адамга кадай кылдыр кылып берген.

Ам Адам кайы-хире аас-кежиктиг апарганыл! А Ева мындыг кайгамчыктыг чараш садка чурттадып кааны дээш, кайы-хире аас-кежиктиг турганын, чүгле бодап көр даан! Ам олар ажы-төлдүг болуп, база аас-кежиктиг кады чурттаар аргалыг болган.

Адам биле Ева мөңге чурттаар кылдыр, Иегова күзеп турган. Олар бүгү черни Эдем сады ышкаш кайгамчыктыг кылдыр кылзын деп, Бурган күзээн. Ол ажылды кылып турар кылдыр сагыштапкаш, Адам биле Ева дыка-ла аас-кежиктиг турган боор оң. Черни чараш сад кылдыр өскертиринге киржиксээр-дир сен бе? Ынчалза-даа Адам биле Еваның аас-кежии үр болбаан. Чүге ындыг болганыл, билип алыылам.