КАЖАН чер кырынга кижилер көвүдей бээрге, оларның хөй кезии Ка́ин ышкаш багай чоруктар кылып турган. Ынчалза-даа чаңгыс кижи олардан ылгалып турган. Ол кижи бо — ооң адын Ено́х дээр. Ено́х дыка дидим турган. Долгандыр кижилер дыка багай херектер кылып турза-даа, Ено́х Бурганга бараалгаарын уламчылаан.

Чүге кижилер каржы-бак херектер кылып турганыл, билир сен бе? Ада́м биле Е́ваны дыңнангыр эвес болурунче болгаш хоруглуг чимисти чиптеринче кым идипкенил, сактып көрем. Шын-дыр, дээрниң багай төлээзи. Библия ону Эрлик деп адап турар. Ол дээрниң төлээзи шупту кижилерни багай кылыптарын кызып турар.

Бир катап Иегова Ено́хту таварыштыр кижилерге медээ дамчыткан, а олар ону дыңнаарын күзевээн. Ол медээ мындыг болган: ‘Шупту каржы кижилерни узуткаар хүннү Бурган тодараткан’. Олар ол медээни дыңнааш, дыка хорадаан боор. Ено́хту безин өлүрер деп кызып турган чадавас. Ынчангаш Бурганның сорулгаларын дыңнадырда, Ено́х дыка дидим болур ужурлуг турган.

Каржы кижилерниң аразынга Бурган Ено́хту үр чуртатпаан. Ол чүгле 365 чыл чурттаан. Чүге бис «чүгле 365 чыл» деп турар бис? Чүге дээрге амгы үеге бодаарга, ол үеде кижилер оон-даа күштүг-шыырак, назыны база дыка узун турган. Чүгле бодап көр даан — Мафусал, Ено́хтуң оглу, 969 чыл чурттаан!

Ено́х өлген соонда кижилер көңгүс үрелген. ‘Оларның кандыг-даа үеде шупту бодалдары каржы турган’, ынчангаш ‘чер кемниг үүлгедиглер-биле дола берген’ деп, Библия чугаалап турар.

Ол үеде чер кырынга чүге ынча хөй ажыг-шүжүг турганының бир чылдагаанын билир сен бе? Эрлик кижилерни багай чорукче идер бир чаа арга тып алган. Ооң дугайында дараазында эгеден билип алыр бис.