НО́Й кадайлыг база үш оолдуг турган. Но́йнуң оолдарын Сим, Хам, Иафе́т дээр. Оол бүрүзү кадайлыг турган. Ынчангаш Но́йнуң өг-бүлези шупту сес кижи.

Бо удаада Бурган Но́йга тускай даалга берген. Улуг хааржак-хеме тудар кылдыр. Ол корабль хире хемчээлдиг турган, ынчалза-даа ооң хевири узун, улуг хааржакка дөмей турган. ‘Ону үш каът кылдыр туткаш, ооң иштинге өрээлдерден кылып каг’,— деп, Бурган дааскан. Ында Но́йга, ооң өг-бүлезинге, дириг-амытаннарга база келир үеде херек апаар аъш-чем шыгжаар өрээлдер турган.

Оон аңгыда хааржак-хемеже суг сыстып кирбес кылдыр, сагыш човаарын Бурган Но́йга дааскан. ‘Мен кончуг улуг суг халавын болдурупкаш, бүдүн делегейни узуткаар мен’,— деп, Бурган сагындырган. Хааржак-хемеден дашкаар шупту чүве өлүп каар.

Но́й оолдары-биле Иегованы дыңнааш, тудуп эгелээн. Арткан кижилер чүгле кыжырып-каттыржып турганнар. Олар бак хевээр артып калганнар. Но́й Бурганның сагыш-бодалының дугайында сагындырарга, кым-даа аңаа бүзүревээн.

Хааржак-хеме дыка улуг болганда, ону тударынга хөй үе негеттинген. Ам-на, хөй чылдар эрткенде, хааржак-хеме белен болу берген. Ам Бурган Но́йга хааржак-хемеже дириг-амытаннарны киирерин дужааган. Чамдык амытаннарны ийилеп, эр-кыс кылдыр киирер турган. Өскелерин — чеди кылдыр. Ол ышкаш янзы-бүрү куштарны база киирерин Бурган дааскан. Но́й шак-ла ынчалдыр кылган.

Сөөлүнде хааржак-хемеже Но́й боду болгаш ооң өг-бүлези кирген. Оон Бурган эжикти хаапкан. Но́й өг-бүлези-биле хеме иштинге манап олурган. Чүгле бодап көр даан: сен база олар-биле кады ол хеме иштинде манап олурар сен. Бурганның сагындырып турган суг халавы, шынап-ла, келир бе?