БИР эвес сеңээ дээвиирге чедир узун кижи чоокшулап келген болза, чүнү бодаптар сен? Ол — ёзулуг-ла кайгамчык улуг кижи! Шаанда чер кырынга шынап-ла кайгамчык улуг кижилер чурттап чораан. Оларның адалары дээрниң төлээлери турган деп, Библия көргүзүп турар. Ынчалза-даа ындыг чүве канчап болу бергенил?

Сактып кел даан, дээрниң каржы төлээзи, Эрлик, үргүлчү шаптараазыннар кылып турган болгай. Бурганның төлээлерин безин өскээр будаарын ол кыскан болгай. Чоорту чамдык дээрниң төлээлери Эрликти дыңнап эгелээн. Олар Бурганның дагзып каан дээрде ажылын каапканнар. Оон соонда кижи дег мага-ботту хүлээп алгаш, черже бадып келгеннер. Чүү дээш, билир сен бе?

Олар чараш херээжен кижилерни көрүп кааш, оларның-биле чурттаксай берген деп, Библия чугаалап турар. Олар черже бадып келгеш, ол херээженнерге өгленип алганнар. Библияда бо чүүлдү багай деп чугаалаан, чүге дизе Бурган төлээлерин дээрге чурттаар кылдыр чаяаган.

Дээрниң төлээлери биле кадайларының ажы-төлү анаа уруглардан ылгалдыг болган. Баштай ол эскертинмес турган чадавас. Ынчалза-даа олар узап-ла, узап-ла, күжү көвүдеп-ле, көвүдеп-ле турган, а сөөлүнде барып кайгамчык улуг кижилер болуп өзүп келгеннер.

Ол кайгамчык улуг кижилер дыка каржы турган. Олар узун болгаш күштүг болганда, кезээде кижилерге хора чедирер турган. Олар кижи бүрүзүн боттарынга дөмей багай кылырын кызып турганнар.

Ол үеде Ено́х шагда-ла мөчээн турган, ынчалза-даа чер кырынга бир эки кижи чурттап чораан. Ооң адын Ной дээр турган. Ол кезээде Бурганның даалгазын күүседип чораан.

Бир-ле катап Бурган шупту багай улустуң узуткаар үези келген деп, Нойга дыңнаткан. Ынчалза-даа Бурган Нойну, ооң өг-бүлезин болгаш хөй дириг-амытаннарны камгалап алыр деп турар. Ону Бурган канчаар кылганыл, билип алыылам.