АМ Ка́ин биле А́вельди көрүп көрем. Кайызы-даа өзүп келген. Ка́ин чер ажылын кылып турар. Ол тараа, ногаа аймаан болгаш чимистерни өстүрүп турар.

А А́вель хойлар азырап турар. Хураганнар ажаарынга ол хөлчок ынак. Олар улуг хойлар бооп өзүп-көвүдеп кээрге, удаваанда ол бүдүн коданны карактап эгелээн.

Бир-ле хүн Ка́ин биле А́вель Бурганга белектерин сунган. Ка́ин бодунуң өстүрген чимистерин эккелген. А А́вель — бодунуң эң-не эки хойларын эккелген. Иеговага А́вель болгаш ооң белээ хөлчок таарымчалыг болган. Ынчалза-даа Ка́ин болгаш ооң белээ аңаа таарышпаан. Чүге ындыг болганыл, билир сен бе?

А́вельдиң белээ Ка́инниң белээнден эки болганы дээш эвес. А чүге дизе А́вель буянныг, эки кижи. Ол Иеговага болгаш бодунуң акызынга ынак. А Ка́ин — каржы кижи турган, ол бодунуң дуңмазынга ынак эвес.

Ынчангаш Бурган Ка́инни эттинип алырын дилеп турар. Ындыг болза-даа Ка́ин дыңнангыр болбаан. Бурган А́вельге Ка́инден артык ынак боорга, ол хөлчок хорадап турар. Бир-ле катап Ка́ин А́вельге: ‘Ховуже бараалам, че’,— деп чугаалаан. Оон олар иелээ ховуга турда, Ка́ин бодунуң дуңмазын бар күжү-биле сопкан. Ооң согуунуң күжүнден ол өлүп калган. Ка́инниң кылыпкан үүлгедии коргунчуг эвес-тир бе?

А́вель өлген-даа болза, Бурган ону ам-даа сактыр. Иегова А́вель ышкаш буянныг кижилерни кажан-даа утпас. Ынчангаш Иегова Бурган бир-ле кайгамчык хүнде А́вельди диргизиптер. Ынчан А́вель өлүр ужурга таварышпас. Бо чер кырынга ол мөңге чурттаар. А́вель ышкаш кижилер-биле таныжып алыры дыка онза эвес-тир бе?

Ынчалза-даа Бурганга Ка́ин ышкаш кижилер таарышпас. Ынчангаш Бурган Ка́инни дуңмазын өлүрген дээш шиидип, өг-бүлезинден ырадыр чортупкан. Өске черже көжерде, Ка́ин кыс дуңмаларының бирээзин эдертип алган, ол ооң кадайы болу берген.

Кезек үе эрткенде Ка́ин кадайы-биле ажы-төлдүг болу берген. Ада́м-биле Е́ваның оолдары болгаш уруглары база өгленип алгаш, ажы-төлдүг апарганнар. Удаваанда чер кырынга кижилер көвүдей берген. Оларның чамдыызы-биле таныжып көрээлем.