ИЕРИХО́ННУҢ ханалары чүге кээп дүжүп турарыл? Оларның кырынче аажок улуг бомба кээп дүшкен ышкаш. Ынчалза-даа ол үеде бомбалар чок турган; ынчан боолар безин чок турган. Ол дээрге Иегованың база бир хуулгаазыны-дыр! Ол канчап болганыл, билип алыылам.

Дыңна даан, Иегова Иисус Навинге чүнү дагзып турар-дыр: ‘Дайынчыларың-биле хоорайны долгандыр кылашта. Алды хүн дургузунда, хүнде-ле бир катап эргиир силер. Дугуржулга-чагыг хааржаан тудуп алыңар. Ооң мурнунга чеди бараалгакчы кылаштавышаан, эдискилерин этсир ужурлуг.

Чедиги хүнде хоорайны чеди катап долгандыр эртер ужурлуг силер. Ооң соонда эдискилерни шала узадыр этсиптиңер, база кижи бүрүзү ыыткыр дайынчы кыйгыдан үндүрүпсүн. Ынчан ханалар дөзүнге чедир буступ каар!’

Иисус чон-биле кады Иегованың дужаалын ол-ла хевээр күүсеткен. Чыскаал кылажының үезинде шуптузу ыыт-дааш чок чоруп турар. Кым-даа чаңгыс-даа сөс этпээн. Чүгле эдискилерниң үннери болгаш чыскаал кылажында чоруур кижилерниң кылажы дыңналып турар. Иерихо́нда Бурганның чонунуң дайзыннары дыка-ла корткан чадавас. Соңгада кызыл хендирниң халаңайнып турарын, көрүп тур сен бе? Бо кымның соңгазы боор? Ийе — Раа́в ийи хайгыылчының дужаалын күүсеткен. Ооң-биле кады бүгү өг-бүлези долгандыр болуп турар чүүлдерни хайгааравышаан, чанында турар.

Ынчалдыр-ла чедиги хүн келген, чон хоорайны чеди катап долганып, эдискилерни этпишаан, дайынчы кыйгызын үндүрүптерге, ханалар буступ кээп дүшкен. Ынчан Иисус Навин дужааган: ‘Хоорайның шупту чурттакчыларын өлүрүп кааптыңар, а хоорайны өрттедиптиңер. Шупту чүвени өрттедиптиңер. Чүгле алдын-мөңгүн болгаш демир-чести арттыргаш, Иегованың чадырының эртине шыгжамырынче бериптиңер’.

Демги ийи хайгыылчыга Иисус чугаалаан: ‘Раа́втың бажыңынче баргаш, ону болгаш ооң өг-бүлезин шуптузун үндүрүптүңер’. Хайгыылчыларның аазааны-биле, Раа́в болгаш ооң өг-бүлези дириг арткан.