СЭЭҢ-БИЛЕ мындыг чүүл болган бе: сен аазап каан сен, а соонда ону күүседири берге болу бээр? Шак-ла ындыг чүүл бо чурукта көргүскен кижи-биле болган — ынчангаш ол ындыг муңгаргай. Ол дээрге Иеффа́й деп аттыг дидим изра́ильчи шииткекчи-дир.

Иеффа́й изра́ильчилер Иеговага чүдүвейн барган үеде чурттап турган. Олар ам база багай чүүл кылып турар. Ынчангаш оларны аммончулар дарлаар кылдыр Иегова чөпшээреп турар. Ынчан изра́ильчилер Иеговаже чаннып, мөргүп эгелээннер: ‘Сээң мурнуңга бачыт кылдывыс. Өршээп көр, бисти камгала!’.

Кижилер багай кылган чүүлдери дээш, буруузун миннип турар. Буруузунуп турарының бадыткалы кылдыр, олар катап Иеговага чүдүп эгелээн. Ынчангаш Иегова бо удаада база оларга дузалажып турар.

Багай аммончулар-биле тулчур кылдыр чон Иеффа́йны шилип алган. Бо тулчуушкунга Иегова аңаа дузалажырын Иеффа́й дыка күзеп турар. Ынчангаш Иеговага ол аазап турар: ‘Аммончуларны тиилээринге дузалажыр болзуңза, мээң бажыңымдан бир дугаар кым үнерил, ону сеңээ бериптер мен’.

Иегова Иеффа́йның аазаашкынын дыңнааш, тулчуушкунга тиилээринге дузалашкан. Иеффа́й чанып кээрге, ону бир дугаар кым уткуп үнүп келгенил, билир сен бе? Ооң уруу — ооң чаңгыс борбак төлү. ‘О, мээң кызым! — деп, Иеффа́й ыглай берген.— Дыка-ла мени муңгараттың. Ынчалза-даа Иеговага аазаашкын берген мен, ынчангаш сөзүм дедир ап шыдавас мен’.

Баштай ооң аазаашкынын билип кааш, Иеффа́йның уруу база муңгарай берген. Чүге дизе ол ачазын база эштерин каар ужурга таваржыр болган. Ынчалзажок ол чуртталгазының арткан кезиин Силомда чадырга Иеговага бараалгаар. Ынчангаш ол ачазынга чугаалаан: ‘Бир эвес Иеговага аазаашкын берген болзуңза, ону күүседир ужурлуг сен.

Иеффа́йның уруу Силомче чорупкаш, чуртталгазының арткан кезиин Иегованың чадырынга бараалгап турар. Чылда дөрт хүн иштинде Изра́ильдиң уруглары аңаа кээп, кады өөрүшкүлүг үе эрттирип турган. Чон Иеффа́йның уруунга ынак, ол Иеговага дыка эки бараалгап турар болгай.