БО эр кижилер берге байдалда. Олар далаштыы-биле үнүптер ужурлуг — оон башка оларны өлүрүп кааптар. Ол дээрге изра́ильчи хайгыылчылар-дыр, а оларга дузалажып турар херээженниң адын Раа́в дээр. Раа́в Иерихо́н хоорайның ханазында чурттап турар. Билип алыылам, бо кижилер канчап берге байдалга таваржы бергенил?

Изра́ильчилер Иорда́н хемни кежип, Ханаа́н черинче киреринге белен. Ынчалза-даа ону кылырының бетинде, Иисус Навин ийи хайгыылчыны чоргузупкан. Ынчангаш оларга: ‘Иерихо́н хоорайны болгаш черни барып, көрүпкеш келиңер’,— деп дааскан.

Иерихо́нга чеде бергеш, хайгыылчылар Раа́втың бажыңынче углапкан. Ынчалза-даа бир кижи Иерихо́ннуң хаанынга хоптанган: ‘Бөгүн кежээ ийи изра́ильчи чер көрүп алыр дээш, бистиң хоорайывысче чедип келгеннер’. Ол дугайында билип алгаш, хаан бодунуң кижилерин Раа́вче чоргузупкан, а олар аңаа дужааган: ‘Сээң бажыңыңда турар эр кижилерни бээр үндүрүвүт!’ Ынчалза-даа Раа́в хайгыылчыларны дээвиир кырынга чажырыпкан. Ынчангаш ол чугаалап-тыр: ‘Бир-ле кижилер меңээ кээп чорду, ынчалза-даа оларның кайыын келгенин билбес-тир мен. Имир дүжүп орда, хоорайның эжиктери хагдынмаанда-ла, олар дүрген-не чорупкан. Бир эвес дүргедээр болзуңарза, оларны тудуп ап болур силер!’ Оон кижилер оларны сүрүп чорупканнар.

Олар чоруптарга, Раа́в далаштыы-биле крыша кырынче үне берген. ‘Иегова бо черни силерге бериптер деп, билир мен,— деп, ол хайгыылчыларга чугаалаан.— Силер Еги́петтен үнүптериңерге, ол Кызыл далайны канчаар кургадыпканының дугайында, база Сигон биле О́г деп ийи хааннарны канчаар өлүргениңерни дыңнаан бис. Мен силерге авыралды көргүскен мен, а силер база меңээ шак-ла ындыг авыралды көргүзерин аазап көрүңер. Мээң ачамны, авамны, ол ышкаш акы-дуңмаларымны дириг арттырып көрүңер’.

Хайгыылчылар аңаа авыралдыг болурун аазаан, ынчаарга ол база бир-ле чүвени кылыр ужурлуг. ‘Бо кызыл хендирни алгаш, соңгага шарып каг,— деп, хайгыылчылар аңаа чугаалаан,— ынчангаш бодуңнуң шупту төрелдериңни бажыңыңга чыып ал. Иерихо́н хоорайны эжелеп алыры-биле бис шупту чедип келгеш, соңгаңда хендирни көрүп кааш, сээң бажыңыңда кымны-даа өлүрбес бис’. Хайгыылчылар Иисус Навинге эглип келгеш, олар-биле чүү болганын шуптузун чугаалап берген.