ИЗРА́ИЛЬЧИЛЕР черден чүнү чыып турарыл, билир сен бе? Ооң хевири хырааны сагындырып турар. Ол ак өңнүг, хоюг болгаш тоглаачал. Ынчалза-даа ол хыраа эвес-тир; ол бир-ле чиртингир чүве-дир.

Изра́ильчилер Еги́петтен үнгенден бээр чүгле бир ай хире эрткен. Ам олар ээн ховуда. Мында чиртингир үнүш аймаа эвээш болгаш, чон хомудап турар: ‘Еги́петке турувуста-ла, Иегова бисти чүге узуткап кагбааныл. Аңаа бис, бети-ле дээрге, шупту чиксээн чүвелерни чип турдувус’.

— Мен силерге дээрден чемни төп бээр мен,— деп, Иегова ынчан аазаан. Шак-ла ынчаар Иегова кылган. Эртенинде изра́ильчилер ол ак бүдүмелди көргеш, аайын тыппайн: ‘Чүл бо?’ — дижип турганнар.

— Бо Иегованың силерге берип турар чеми-дир,— деп, Моисе́й тайылбырлаан. Кижилер ону МА́ННА деп адап каан. Ооң амданы ары чигирлиг быжырган далган сагындырып турган.

— Кижи бүрүзү кайы-хирени чип шыдаарыл, ол хирени чыып алзын’,— деп, Моисе́й чонга дужааган. Олар эртениң-не ынчаар кылып турар. А кажан хүн изип эгелээрге, чер кырынга артып калган ма́нна эрип турар.

Моисе́й оон ыңай немеп чугаалаан: ‘Дараазында хүнге чедир ма́ннаны артырбаңар’. Ынчалза-даа чамдык кижилер дыңнангыр эвес болган. Чүү болганыл, билир сен бе? Дараазында хүнге артырып алган ма́нна куртуй берген болгаш багай чыттыг апарган!

Ынчалза-даа неделяның бир хүнүнде Иегова чонга ма́ннаны биеэгизинден ийи катап хөйнү чыырын дужаап турар. Ол алды дугаар хүн-дүр. Иегованың тайылбырлааны-биле алырга, изра́ильчилер ма́ннаның чамдыызын дараазында хүнге артырып алыр ужурлуг турган, чүге дизе чеди дугаар хүнде ма́нна дүшпес. Ынчангаш чеди дугаар хүнге артырып каан ма́нна куртуваан болгаш чыдываан болган! Ол база бир хуулгаазын-дыр!

Ээн ховуга шупту чылдар дургузунда Иегова изра́ильчилерни ма́нна-биле чемгерип турган.