ЭЛЧИГЕН чугааланып турганын кажан-бир дыңнаан сен бе? ‘Чок,— деп, харыылаар чадавас сен.— Дириг амытаннар чугааланып шыдавас болгай’. Ынчалза-даа Библияда бир чугааланып турган кыс элчиген дугайында бижээн. Ол чүүл канчаар болу бергенил, билип алыылам.

Изра́ильчилер Ханаа́н черже киреринге барык белен. Моавтың хааны Валак изра́ильчилерден хөлчок коргуп турар. Изра́ильчилерни келгеш, каргаар кылдыр, Валаа́м деп кажар кижини ол кыйгыртыпкан. Валак Валаа́мга хөй акша бээрин аазап турар боорга, Валаа́м бодунуң элчигенин мунупкаш, Валакче чорупкан.

Иегова чонун Валаа́мга каргадырын күзевейн турар. Ынчангаш Валаа́мның оруун доза туруп, ону доктаадыптар кылдыр, селеме туткан дээрниң төлээзин ол чоргузупкан. Валаа́м дээрниң төлээзин көрбейн турар, ынчалза-даа элчиген ону көрүп турар. Ынчангаш ол дээрниң төлээзинден өскээр ээрин оралдажып, сөөлүнде кээп ол орукка чыдып алган. Валаа́м аажок килеңнеп, элчигенни ыяш-биле хап эгелээн.

Ооң соонда Иегова Валаа́мны, элчиген аңаа чүнү чугаалап турарын, дыңнаптар кылдыр кылыпкан. ‘Мени эттээр хире, сеңээ чүнү кылыпкан мен?’— деп, элчиген айтырган.

— Сен мени дорамчылап тур сен,— деп, Валаа́м ажынган.— Бир эвес менде селеме турган болза, сени ол дораан өлүрүп кааптар ийик мен!

— Ооң мурнунда мен бодумну ынчаар алдынып турдум бе?— деп, кыс элчиген оон айтырган.

— Чок,— деп, Валаа́м боданып чугаалаан.

Ынчан Иегова Валаа́мның караан ажыдыптарга, ооң оруун доза турупкан, селеме туткан дээрниң төлээзин ол көрүп каан. Дээрниң төлээзи чугаалаан: ‘Элчигениңни чүү дээш эттеп турарың ол? Мен сээң орууңну доза туруптар дээш келдим, чүге дээрге сен, Изра́ильди каргаар дээш, барбас ужурлуг сен. Бир эвес сээң элчигениң менден чайладыр турбаан болза, мен сени өлүрер турган мен, а элчигенге кандыг-даа хора чедирбес турган мен’.

Валаа́м буруузун миннип, чугаалаан: ‘Бачыт кылган-дыр мен. Сени мээң оруумда турар деп, билбээн мен’. Дээрниң төлээзи Валаа́мны салыптарга, ол Валакче улаштыр чорупкан. Валаа́м ол-ла хевээр Изра́ильди каргаарын оралдажып-даа турар болза, ооң орнунга Иегова Изра́ильди үш катап йөрээрин албадапкан.