БО чүү деп тудуг, билир сен бе? Ол Иеговага чүдүүр тускай чадыр-дыр. Ону скиния деп база адаар. Чон ону Еги́петтен үнгеш, бир чыл эрткенде туткан. Ынчаарга ону кымның планы ёзугаар туткан, билир сен бе?

Иегованың планы ёзугаар. Сина́й дагның бажынга Моисе́й ону Иеговадан алган. Иегованың айтыышкыны-биле, чадырны кезектерге чазарга, белен кылдыр кылып каан. А ол кезектерни — өске черже көжүргеш, аңаа катап база чыыр кылдыр. Ындыг арга-биле, ховуга бир черден бир черже көжүп чорааш, изра́ильчилер ол чадырны бодунга ап чорааннар.

Чадырның ыраккы кезээнче көрүптер болзуңза, ында хааржак азы аптараны көрүп каар сен. Ол дээрге дугуржулга-чагыг хааржаа-дыр. Ооң кырынга ийи дээрниң төлээзи, азы херуви́мнер, ийи талазынга турган. Бир дугаар даштарны Моисе́й бузупкан болгаш, Бурган ийи калбак даштарга он хоойлуну база катап бижип берген. Дугуржулга-чагыг хааржааның иштинге олар шыгжаттынып турган. Аңаа ма́нналыг сава база турган. Ма́нна дээрге чүл, сактыр-дыр сен бе?

Иегова дээди бараалгакчы кылдыр Моисе́йниң акызы Ааро́нну шилип алган. Ол чонну Иеговага чүдүүр кылдыр башкарып турар. Ооң оолдары база Бурганның бараалгакчылары бооп турар.

Ам чадырда улуг өрээлче көрем. Бичии өрээлден ол ийи катап улуг. Ыш үнүп турар хааржак азы аптараны мында көрүп тур сен бе? Ол өргүл салыр бедигээш-тир — аңаа фимиа́м деп аттыг, чигирзиг чыттыг бүдүмелди бараалгакчылар өрттедип турар. Оон аңгыда, мында чеди лаалыг чырыткы бар. Үшкү эт дээрге — стол-дур. Ында 12 хлеб шыгжаттынып турар.

Чадырның хериминиң иштинде улуг паш, азы суглуг доскаар бар. Оон бараалгакчылар чунуп турар. Оон ыңай мында өргүл салыр улуг бедигээш бар. Ооң кырынга Иеговага өргүл кылдыр дөгерген дириг амытаннарны өрттедип турар. Чадыр турлагның дал ортузунда турар, а шупту изра́ильчилер ону долгандыр майгыннарда чурттап турар.