ДЕЛЕГЕЙДЕ эң-не күштүг кижиниң адын кым дээр турганыл, билир сен бе? Самсо́н шииткекчи. Самсо́н Иеговадан күштү алган. Самсо́ннуң төрүттүнериниң бетинде-ле Иегова ооң авазынга мынча деп медеглээн: ‘Удавас оолдуг болур сен. Ол Изра́ильди филисти́мчилерден хостаар’.

Филисти́мчилер — Ханаа́нда чурттап турар багай чон-дур. Оларның дайынчылары хөй, ынчангаш олар изра́ильчилерни ёзулуг-ла дарлап турар. Бир катап Самсо́н филисти́мчилерниң чурттап турар черинче чедирер орукка кылаштап чорда, аңаа уткуштур ырланып турар улуг арзылаң үнүп келген. Ынчалза-даа Самсо́н ону кызыл холу-биле өлүрүп каапкан. Ол чүс-чүс багай филисти́мчилерни база өлүрген.

Элээн үе эрткенде Самсо́н Дали́да деп аттыг херээженге ынакшый берген. Бир эвес ол Самсо́ннуң күжүнүң чажыдын билип алыр болза, филисти́мчи дарга бүрүзү аңаа 1 100 мөңгүн акша бээрин аазаан. Дали́да ол акшаларны алырын күзеп турар. Ол Самсо́ннуң база Бурганның чонунуң ёзулуг өңнүү эвес-тир. Ынчангаш Самсо́ндан ооң улуг күжүнүң чажыдын каш-даа катап айтырган.

Адак сөөлүнде кээп Самсо́ндан ооң күжүнүң чажыдын Дали́да билип апкан. ‘Мээң бажым дүгүн кажан-даа таартпаан,— деп, Самсо́н аңаа тайылбырлаан.— Төрүттүнген хүнүмден эгелеп, Бурган мени бодунуң тускай бараалгакчызы — назорей кылдыр шилип алган. Бир эвес бажым дүгүн таартыптар болза, күжүмнү чидириптер мен’.

Ынчангаш Дали́да ооң дугайында билип алгаш, Самсо́нну хойнунга удудур өпейлеп каапкан. Оон өрээлче Самсо́ннуң чажын таартып кааптар кылдыр кижини кыйгырыпкан. Кажан Самсо́н оттуп кээрге, ол күжүн чидирипкен болган. Ынчан филисти́мчилер келгеш, ону тудуп алган. Олар ооң ийи караан дешкеш, бодунуң кулу кылдыр кылып алганнар.

Бир катап филисти́мчилер бодунуң бурганы Даго́нга хүндү кылдыр улуг байырлал кылган, база Самсо́нну кыжырыыр дээш, ону кара-бажыңдан үндүрүп эккелген. Ол үениң дургузунда Самсо́ннуң бажының дүгү катап өзүп келген. Оон Самсо́н холундан чедип чораан оолга чугаалаан: ‘Бо бажыңның туттунуп турар чагыларын суйбап көөрүн, чөпшээреп көр’. Ынчан Самсо́н Иеговадан күш дилеп мөргээш, чагылардан туттунупкан. ‘Филисти́мчилер-биле өлү берейн’,— деп, ол алгырыпкан. Ол байырлалга 3 000 филисти́мчилер турган, а кажан Самсо́н чагыларны идиптерге, бажыңның бузулганындан ол шупту багай кижилер өлген.