БО БИЧИИ уруг ам чүнүң дугайында чугаалап турарын, билир сен бе? Иегованың медээчизи Елисе́йниң дугайында база Иегованың дузазы-биле ооң кылган шупту кайгамчыктыг херектериниң дугайында. Бо херээжен изра́ильчи эвес болгаш, ол Иегованың дугайында чүнү-даа билбес. Ол бичии уруг канчап ооң бажыңында туруп алганыл, билип алыылам.

Бо дээрге сири́й херээжен кижи-дир. Ооң ашаа — сири́й шеригниң башкарыкчызы Нееман. Бичии уругну сирийжилер тудуп алгаш, Нееманның кадайының чалчазы кылып алган.

Нееман берге аарып турар: ол эмнеттинмес кеш аарыглыг. Ынчаар аараан кижиниң мага-бодундан эъттиң кезектери безин дүжүп болур. Ынчангаш кыс уруг Нееманның кадайынга чугаалаан: ‘О, бир эвес мээң дээргим Изра́ильде Иегованың медээчизинге барган болза. Медээчи ону кеш аарындан эмнеп кааптар ийик’. Удаваанда ол чугаа дугайында ооң ашаа билип каан.

Нееман сегиирин хөлчок күзеп турар, ынчангаш ол Изра́ильче чорупкан. Аңаа ол Елисе́йниң бажыңынче угландыр чорупкан. Елисе́й чалчазын чоргузупкаш, Нееманны Иорда́н хемге чеди катап шымныптарын дужааган. Нееман хөлчок хорадай берген: ‘Мээң чуртумнуң хемнери Изра́ильде кандыг-даа хемден артык эки!’ — деп, ол чугаалаан. Оон чорупкан.

Ынчалза-даа ооң чалчаларының бирээзи: ‘Дээрги, бир эвес Елисе́й сеңээ оон-даа артык нарын чүүлдү кылдырыпкан болза, сен ону кылыптар ийик сен. Сен ону анаа-ла дыңнап, шымныпсыңза, канчап баар деп?’ — деп көгүткен. Нееман чалчазын дыңнааш, Иорда́нга чеди катап шымныпкан. Ооң соонда ооң мага-боду шыырак болгаш кадык апарган!

Нееман өөрүшкүзүн чажырып шыдаваан. Ол Елисе́йже эглип келгеш, аажок магадап чугаалаан: ‘Изра́ильдиң Бурганы — бүдүн чер кырында чаңгыс алыс шын Бурган-дыр деп ам-на ылап билдим. Бо белекти менден хүлээп ап көрем’.— ‘Чок, мен ону албас мен’,— деп, Елисе́й чөпшээрешпээн. Бир эвес белекти ап алыр болза, ол шын эвес кылыптар деп, ол билир, чүге дээрге Нееманны Иегова экиртипкен болгай. Ынчалза-даа белекти Елисе́йниң чалчазы Гиезий алыксай берген.

Гиезий дараазында чүүлдү кылган. Ол Нееманга чедир халааш: ‘Елисе́й сеңээ дамчыдарын дилээн: ол сээң белектериниң чамдыызын чаа-ла келген бодунуң эштеринге бээри-биле алыр болду’,— деп, ол чугаалаан. Ол меге дээрзи билдингир. Ынчалза-даа Нееман Гиезийниң мегечизин билбейн турар болгаш аңаа чамдык белектерин берипкен.

Кажан Гиезий чанып кээрге, Елисе́й болган чүүлдүң дугайында шуптузун билир. Ооң дугайында Иегова аңаа чугаалаан. ‘Сен ол хире багай чорукту кылганың дээш, Нееманның эмнеттинмес кеш арыы сеңээ дамчый бээр’,— деп, ол чарлаан. Ол-ла дораан ол чүүл болу берген!

Бис моон чүнү өөренип ап болур бис? Бирээде, бис ол бичии уруг ышкаш, Иегованың дугайында чугаалаар ужурлуг бис. Ол хөй-ле эки чүүлдерге чедирип болур. Ийиде, бис эгезинде Нееман ышкаш, улуургак болбас болзувусса эки,— Бурганның бараалгакчыларын дыңнаар ужурлуг бис. А үште, Гиезий ышкаш, мегелевес ужурлуг бис. Библиядан дыка хөй ажыктыг чүүлдерни билип ап турар бис, ылап-тыр бе?