БО ЧУРУКТА дываажаңны чуруп каан, ону Бурганның медээчизи Иса́ия ынчаар көрген чадавас. Иса́ия Ио́наның соонда удаваанда чурттап чораан.

Дываажаң — дээрге «сесерлик» азы «парк» дээни ол. Бо номда ооң мурнунда көргенивис бир-ле чүүлдү сеңээ ол сагындырып келбес-тир бе? Адам биле Евага Иегова Бурганның тарып бергени кайгамчык сесерлиинге ол дөмей эвес-тир бе? Ынчаарга кажан-бир бүгү чер дываажаң апаар бе?

Келир үеде Бурганның чонунга келир чаа дываажаң дугайында бижиирин Иегова Исаия медээчиге дужааган. Ол дамчыткан: ‘Бөрүлер биле хойлар кады тайбың чурттаар. Бызаалар биле арзылаң оолдары кады чемненир, бичии уруглар оларны ажаар. Чаш төл хоранныг чылан чанынга безин ойнаарга, кандыг-даа хора чок болур’.

— Ол чүүл кажан-даа болбас,— деп, хөй улус удур чугаалаар чадавас.— Чер кырынга үргүлчү хай-халап болуп келген, ынчангаш ындыг чүүл мөңгеде уламчылаар. Ынчалза-даа бо дугайын бодап көрем: Бурган Адам биле Еваны каяа чурттадып каан?

Дываажаңга. Чүгле Бурганга дыңнангыр эвези дээш, олар бодунуң кайгамчыктыг бажыңын чидирипкеш, кырааш, өлген. Бурган аңаа ынак кижилерге, Адам биле Еваның чидирген ол-ла амыдыралды, катап тургузарын аазап турар.

Келир чаа дываажаңга чүү-даа хора чедирбес база кандыг-даа үрегдел турбас. Бүгү чүве долгандыр тайбың болур. Шупту кижилер каң-кадык болгаш аас-кежиктиг болур. Шупту чүве, Бурганның эгезинде бодап алганы ышкаш, ол олчаан болур. Ол байдалды Бурган кандыг арга-биле кылырын сөөлзүредир билип алыр бис.