НАВУХОДОНО́СОР хаан шупту эң-не эртем-билиглиг изра́ильчилерни Вавило́нче тудуп аппарган. Оларның аразындан эң-не чараш болгаш угаанныг элээди оолдарны ол шилип алган. Мында оларның дөртүн көрүп тур сен. Бирээзин Дании́л дээр, а арткан үжүн вавило́нчулар Седрах, Мисах болгаш Авденаго дээр.

Навуходоно́сор элээди оолдарны бодунуң ордузунга бараалгадыры-биле өөредир күзелдиг. Үш чыл иштинде өөреткен соонда, ол эң-не угаанныгларын шилип алыр, оон олар аңаа бергелер шиитпирлээринге дузалажыр. Өөренир үе дургузунда оолдарның кадык-шыырак арттарын хаан күзеп турар. Ынчангаш ону болгаш ооң өг-бүлезин канчаар чемгерип турар-дыр, оларны шак ынчаар эки чемгерип, суксун бээрин чалчаларынга ол дужаап турар.

Аныяк Дании́лче көрем. Навуходоно́сорнуң Асфеназ деп кол чалчазынга, ол ам чүнү тайылбырлап турарыл, билир сен бе? Хаанның столундан чем чиир күзели чок деп, ол чугаалап турар. Ынчаарга Асфеназ дүвүрей берген. ‘Хаан силерниң чүнү ижер, чиириңерни шиитпирлеп каан,— деп, ол чугаалаан.— Бир эвес силер өске оолдар ышкаш кадык-шыырак болбас болзуңарза, ол мени өлүрүп кааптар’.

Ынчан Дании́л Асфеназтың ону болгаш ооң үш өөрлерин кадарар кылдыр тургускан таңныылга барган. ‘Биске шенелде үе — 10 хонуктан берип көрем,— деп, ол таңныылды дилээн. — Биске чүгле ногаа аймаа болгаш сугдан бер. Ооң соонда бисти хаанның столундан чемненип турар арткан оолдар-биле деңнеп көр даан, кым эки кылдыр көстүр эвес, көрүптер сен’.

Таңныыл чөпшээрешкен. 10 хонук эртерге, Дании́л база ооң үш өөрү өске оолдарга бодаарга, кадык-шыырак кылдыр көстүп турар. Ынчангаш таңныыл моон-даа соңгаар оларга ногаа аймаан хаанның чеминиң орнунга чиирин чөпшээрээн.

Үш чыл эрткенде, шупту аныяк оолдарны Навуходоно́сорга эккелген. Оларның кижи бүрүзү-биле чугаалашкаш, Дании́лди болгаш ооң үш эжин эң-не угаанныг оолдар деп, хаан эскерген. Ынчангаш оларны ордузунга дузалакчылар кылдыр артырып алган. Ынчангаш хаан Дании́л, Седрах, Мисах база Авденагога кандыг-даа берге айтырыг салырга, олар хаанның кандыг-даа бараалгакчызындан азы мерген угаанныгларындан 10 катап дээре харыылаар болган.