ДАВИ́Д Иерусали́мге хааннап тургаш, Иегованың дузазы-биле дайзыннарны хөй катап тиилээн. Иегова изра́ильчилерге Ханаа́н черин бээрин аазаан. Иегованың дузазы-биле ол бүгү аазаттынган чер ам оларның өнчүзү апарган.

Дави́д — эки башкарыкчы. Ол Иеговага ынак. Ынчангаш ол бир-ле дугаарында Иерусали́мче Иегованың дугуржулга-чагыг хааржаан көжүрүпкен. Оон ыңай ол дугуржулга-чагыг хааржаан салыр Бурганның өргээзин тударын күзеп турар.

Ынчалза-даа каш чыл эрткенде, Дави́д кончуг багай чорук үүлгеткен. Өске кижиниң чүвезин алыры шын эвес дээрзин Дави́д билир. Ынчалза-даа бир-ле катап кежээ, ордузунуң дээвиириниң кырындан, ол дыка чараш херээженни көрүп каан. Ону Вирса́вия дээр — ол, Дави́дтиң шерииниң дайынчызы болур, У́рияның кадайы-дыр.

Дави́д Вирса́вияны изии-биле күзей бергеш, ону ордузунче эккелген. Ол үеде Вирса́вияның ашаа ырак фронтуда турган. Чүл ынчаш, Дави́д ооң-биле кады чыткан, ооң соонда Вирса́вия чаш уруглуг апаар деп билген. Дави́д ол дээш дыка девидээн: ол шеригниң баштыңчызы Иоа́вка чагаа чоргузупкан, аңаа У́рияны эң-не дошкун тулчуушкунче, ону өлүрүп кааптар кылдыр, тургузарын дужааган. У́рия өлген соонда, Дави́д Вирса́вияга өгленип алган.

Иегова Дави́дче дыка килеңнээн. Ол Нафан деп бодунуң бараалгакчызын чоргузарга, Дави́дтиң кылган бачыдын ол ажыы-биле чугаалаан. Көрем, ол Дави́д-биле канчаар чугаалажып турар-дыр. Дави́д бодунуң кылган үүлгедии дээш буруузун миннинген, ынчангаш Иегова ону өлүмге шиитпээн. Ынчалза-даа Иегова: ‘Багай үүлгедиг кылганың дээш, сээң бажыңыңга хөй халаптар болур’,— деп чарлаан. Дави́дтиң таварышкан халаптары хөй-ле болган!

Баштай Вирса́вияның оглу чок апарган. Ооң соонда Дави́дтиң эң улуг оглу Амнон, Фамарь деп бодунуң кыс дуңмазы-биле ээн черге артып калгаш, ону күштеп каапкан. Дави́дтиң оглу Авессало́м ол дээш хөлчок килеңнээнинден Амнонну өлүрүп каапкан. Сөөлзүредир Авессало́м хөй улустуң эки хамаарылгазын чаалап алгаш, бодун хаан кылыпкан. Ынчалза-даа сөөлүнде кээп Дави́д Авессало́мга удур дайынны тиилеп алган, а Авессало́мну улус өлүрүп каапкан. Шынап-ла — Дави́д хөй халаптарга таварышкан.

Ол үеде Вирса́вия оол божуп алган, аңаа Соломо́н деп атты берген. Кажан Дави́д кырып-чөнүп, аарый бээрге, Адо́ния деп оглу ооң орнунга хааннаарын оралдашкан. Ынчан Дави́д, Соломо́н хаан болур деп чүвени көргүзери-биле, Соломо́ннуң бажынче үстү кудуптарын Садо́к деп бараалгакчыга дужааган. Удаваанда Дави́д 70 харлыында өлүп калган. Дави́д Изра́ильге дөртен чыл дургузунда хааннап турган, ам болза Изра́ильдиң хааны Соломо́н апарган.