АМ БАЗА филисти́мчилер изра́ильчилерге удур тулчур дээш чедип келген. Дави́дтиң үш улуг акызы ам Сау́лдуң шериинде бараалгап турар. Ынчангаш Иессе́й бир катап Дави́дке чугаалаан: ‘Акыларыңга тараадан база каш хлебтен аппарып бер. Олар кайы-хире чурттап турар-дыр, биливит’.

Дави́д дайынчы турлагга келгеш, акыларын тып аар дээш, барык-ла тулчуушкун болуп турар черже халаан. Филисти́мчи кайгамчык улуг кижи Голиа́ф, изра́ильчилерни кыжырыыр дээш, бурунгаар үнүп келген. Ол эртенниң-не болгаш кежээниң-не, 40 хонук дургузунда ынчаар кылып турар. Ол алгырып турар: ‘Бир кижиден шилип алыңар, ол мээң-биле тулушсун. Бир эвес ол мени тиилээш, өлүрер болза, бис силерниң кулдарыңар апаар бис. Ынчалза-даа бир эвес мен ону тиилээш, өлүрер болзумза, силер бистиң кулдарывыс апаар силер. Бир эвес дидимненир болзуңарза, бир кижиден шилип алыңар, ол мээң-биле тулушсун’.

Дави́д шериглерден айтырган: ‘Бо филисти́мчини өлүрер база Израи́льден бужар атты арыглаар кижи чүнү алыр?’

— Ындыг кижиге Сау́л хөй эртине-байлак бээр,— деп, шериглер харыылаан.— Уруун база кадай кылдыр бээр.

Ынчалза-даа шупту изра́ильчилер Голиа́фтан коргуп турар, чүге дээрге ол дыка улуг. Ооң узуну 3 хире метр, а ооң щидин дажып чоруур өске дайынчызы база бар.

Чамдык шериглер Сау́л хаанга Дави́д Голиа́ф-биле тулчурун күзеп турар деп барып чугаалаан. Ынчалза-даа Сау́л Дави́дке мынча дээн: ‘Ол филисти́мчи-биле сен тулчуп шыдавас сен. Сен дээрге көңгүс элээди болгай сен, а ол дээрге бүгү чуртталгазының дургузунда дайынчы-дыр’. Дави́д харыылаан: ‘Мээң ачамның хойларын адыг болгаш арзылаң тудуп апаарга, мен оларны өлүрүп кааптым. Бо филисти́мчи-биле оларныы ышкаш чүве болур. Иегова меңээ дузалажып бээр’. Ынчан Сау́л чугаалаан: ‘Ындыг-дыр, бар че, Иегова сээң-биле болзунам’.

Дави́д хем суунче баткаш, 5 дески даштарны шилип алгаш, хавынче суп алган. Ооң соонда даш октаар чепсээн алгаш, кайгамчык улуг кижиже уткуштур базыпкан. Голиа́ф ону көргеш, карактарынга бүзүревейн барган. Аңаа Дави́дти өлүрери дыка белен ышкаш сагындырган.

— Чүгле менче чоокшулап келем,— деп, Голиа́ф сагындырган,— сээң мага-бодуңну куштарга база дириг амытаннарга чиртиптер мен.— Ынчалза-даа Дави́д чугаалаан: ‘Сен менче селемелиг база узун чыдалыг келдиң, а мен сенче Иегованың ады-биле келдим. Бөгүн Иегова сени мээң холумче берипкеш, сени өлүрүп кааптар’.

Дави́д Голиа́фче маңнап келген. Хавындан дашты ужулгаш, даш октаар чепсээнче суккаш, бар-ла күжү-биле октапкан. Даш Голиа́фтың дорт бажынче дээптерге, ол өлүг аңдарлы берген! Филисти́мчилер, эң күштүг дайынчызы аңдарлып калган деп көргеш, шупту дезипкен. Изра́ильчилер оларны сүргеш, тулчуушкунну тиилеп алган.