ИЕРОВОАМ хаанның өлүмүнүң соонда Изра́ильдиң он төрел бөлүктүг күрүнезин чүгле каржы хааннар башкарып турган. Оларның эң-не каржызы Ахав деп хаан турган. Чүге деп, билир сен бе? Чүге дээрге ол хамыктың мурнунда Иезавель деп дыка каржы кадынны кадай кылдыр ап алган.

Иезавель Изра́иль чурттуг эвес турган. Ооң адазы Сидоннуң хааны турган. Иезавель Ваа́л деп меге бурганга чүгле боду чүдүүр хамаанчок, Ахавты болгаш өске-даа изра́ильчилерни аңаа чүдүүрүнче албадап турган. Иезавель Иегованы көөр хөңнү чок болгаш ооң хөй-ле медээчилерин өлүрген. Арткан медээчилер куйларга чаштынар ужурга таварышкан. Бир эвес Иезавель бир-ле чүвени күзеп турар болза, ол бодунуң чүвезин чедип алыр дээш, кижиниң амы-тынын-даа үзүп болур.

Бир катап Ахав дыка муңгаргай турган. Иезавель оон айтырган: ‘Чүге сен бөгүн ындыг муңгаргай сен?’

— Навуфейниң чугаалаан сөстеринден,—деп, Ахав хомудаан.— Мен ооң виноград тараан черин садып алыксаан мен. Ынчалза-даа Навуфей меңээ ону садарын ынавайн барган.

— Ажырбас, дүвүреве,— деп, Иезавель ону оожургаткан.— Ону ап алыр сен.

Иезавель Навуфейниң чурттап турар хоорайның чамдык даргаларынга чагаалар чортупкан. ‘Навуфей Бурганны болгаш хаанны каргап турган деп, каш өөдежок кижилер ону нүгүлдепсин,— деп, ол дужааган.— А ооң соонда Навуфейни хоорайдан үндүрүпкеш, даштар-биле өлүр соп кааптыңар’.

Навуфейни өлген деп дыңнааш, ол дораан-на Ахавка чугаалаан: ‘Шымда, виноград тараан черин бодуңга барып ап ал’. Иезавель ол хире коргунчуг үүлгедиг дээш, кеземче алыр ужурлуг эвес-тир бе?

Элээн үе эрткенде Иегова Ииуй деп аттыг кижини чоргузупкан. Ииуй кел чыдар деп дыңнап каапкаш, Иезавель карактарын будуп, каастанып эгелээн. Ынчалза-даа Ииуй чоокшулап келгеш, ону соңга караанга көрүп каапкан, оон Ииуй ордуда эр кижилерге алгырыпкан: ‘Ону дүжүр октаптыңар!’ Чурукта көрүп турарың ышкаш, эр кижилер дужаалды күүсеткен. Олар ону дүжүр октаптарга, ол өлүп калган. Иезавель кадынның төнчүзү ынчаар келген.