НАВУХОДОНО́СОР хаан эң-не эртем-билиглиг изра́ильчилерни Вавило́нче аппарганындан бээр 10 ажыг чыл эрткен. Көрем, ам чүү болуп турар-дыр! Иерусали́м өрттенип тур. Дириг арткан изра́ильчилерни Вавило́нче тудуп аппарган.

Сактып келем, Иегованың медээчилери чүнүң дугайында сагындырып турган, шак ол чүүл олчаан болган. Ынчалзажок изра́ильчилер медээчилерни дыңнавайн турган. Иеговага чүдүүрүнүң орнунга, олар кызымаа-биле меге бурганнарга чүдүүрүн уламчылавышаан. Ынчангаш чон шииткелди чедип алган. Израильчилерниң каржы херектериниң дугайында Иезекии́ль медээчиниң чугаазындан билип ап турар бис.

Иезекии́ль деп кымыл, билир сен бе? Ол болза Иерусали́мниң улуг буураашкынынга чедир 10 ажыг чыл артканда, Навуходоно́сор хаанның Вавило́нче тудуп аппарганы аныяк оолдарның бирээзи. Ол-ла үеде Даниил-биле ооң үш өөрүн: Седрах, Мисах болгаш Авденагону сүрүп аппарган.

Иезекии́ль Вавило́нга турган үеде, Иерусали́мниң өргээзинде кандыг каржы чүүлдер кылып турарын, Иегова аңаа көргүскен. Иегова ону хуулгаазын-биле кылган. Иезекии́ль биеэги хевээр Вавило́нга турза-даа, Иегова өргээде чүү болуп турарын аңаа шуптузун көргүскен. Ооң көрген чүүлү — кончуу аттыг болган!

— Көрүп көр даан, чон кандыг бужар чүдек чүүлдер өргээде кылып турар-дыр,— деп, Иегова Иезекии́льге чугаалаан. — Ханаларже долгандыр көрем — кайда-даа чыланнар болгаш өске амытаннар дүрзүлери. Изра́ильчилерни база көрем — олар оларга чүдүп турлар! Иезекии́ль көргеш, ол бүгүнү бижип ап турар.

— Көрүп тур сен бе, изра́ильчи удуртукчулар бүдүү чүнү кылып турар-дыр?— деп, Иегова Иезекии́льден айтырган. Ийе, ону база ол көрүп турар. Ында 70 эр кижи база меге бурганнарга чүдүп турар. ‘Көрбейн турар-дыр Иегова. Чуртту кагган’,— деп, чугааланып турганнар.

Оон Иегова Иезекии́льге өргээниң соңгу эжииниң чанында олурар каш херээжен кижилерни көргүскен. Ында олар Фамму́з деп меге бурганга чүдүп турар. Ам Иегованың өргээзиниң кирер эжииниң чанында турар эр улусче көрем! Олар 25 хире кижи. Иезекии́ль оларже көрүп турар. Ол үеде олар чөөн чүкче көрнүп алгаш, хүнге чүдүп турар!

— Бо чон мени чүү деп-даа бодавас — деп, Иегова чугаалаан.— Олар анаа-ла багай чүүл кылып турар эвес, а мээң өргээмче келгеш, ону мында үүлгедип турар!— Ынчангаш Иегова аазап турар:— Олар мээң килеңимниң күжүн билип аарлар. Олар узуткаттынып турда, мен оларны кээргевес мен.

Иегова ону Иезекии́льге көргүскенинден бээр үш чыл безин эртпээнде, изра́ильчилер Навуходоно́сор хаанга удур тура халыышкын кылган. Ынчан ол оларже дайылдажып үнген. Чартык чыл эрткенде вавило́нчулар Иерусали́мниң ханаларын бускаш, хоорайны бүрүнү-биле өрттедипкен. Кижилерниң хөй кезии өлүрткен азы Вавило́нче туттуртуп алган.

Изра́ильчилерни мындыг коргунчуг айыыл таварар кылдыр, чүге Иегова чөпшээрээнил? Шын-дыр — чүге дизе олар Иегованы дыңнавайн база ооң хоойлу-дүрүмнеринге чагыртпайн турганнар. Бурганның негелдерин кезээде күүседири кайы-хире чугула деп моон көстүп турар.

Эгезинде чүгле хөй эвес кижилерге Изра́ильдиң черинге артып каарын чөпшээрээн турган. Навуходоно́сор хаан оларның удуртукчузу кылдыр Годолия деп аттыг иуде́й кижини тургускан. Ынчалза-даа сөөлзүредир чамдык изра́ильчилер Годолияны өлүрүп каапкан. Ол дээш вавило́нчулар келгеш, оларны база өлүрүп кааптар деп, чон корга берген. Ынчангаш олар Иереми́яны күш-биле алгаш, Еги́петче дезипкеннер.

Изра́иль черинге чаңгыс-даа кижи артпаан. 70 чыл дургузунда аңаа кым-даа чурттаваан. Чер көңгүс ээнзиргей. Ынчалза-даа 70 чыл болгаш бодунуң чонун ол черже катап эгидип алырын Иегова аазап турар. Ол үеде Вавило́н черинче аппарган Бурганның чону-биле чүү болуп турарыл? Билип алыылам.