ЧУГАА 67
Иосафт Иеговага идегеп турар
БО КИЖИЛЕР кымнарыл, олар ам чүнү канчап турары ол, билир сен бе? Олар тулчуушкунче бар чыдары ол, а мурнунда эр улус ырлажып турар. Ынчалза-даа сен: ‘Ыраажыларның тулчуушкунга херек селемелери, узун чыдалары чүге чогул?’ — деп, айтырар боор сен. Билип алыылам, че.
Ийи төрел бөлүктүг Израиль күрүнени Иосафа́т башкарып турар. Он төрел бөлүктүг күрүнени башкарып турар Ахав хаан база ооң кадайы Иезавель-биле ол чаңгыс үеде чурттап турар. Ынчалза-даа Иосафа́т, адазы Аса ышкаш, эки хаан. Ынчангаш хөй чылдар дургузунда ийи төрел бөлүктүг мурнуу күрүнениң чону аас-кежиктиг чурттап турар.
Ынчалза-даа чонну девидедипкен бир болуушкун болган. Дыңнадыкчылар Иосафа́тка мынча деп дыңнаткан: ‘Моав, Аммо́н черинден база Сеир дагдан канчаар-даа аажок улуг шериг сенче дайылдажыр дээш кел чыдыр’. Элээн хөй изра́ильчилер Иеговадан дуза дилээр дээш, Иерусали́мче кээп турар. Олар шупту өргээже углапкан, аңаа Иосафа́т мөргээн: ‘О Иегова, Бурганывыс, чүнү кылырын билбес-тир бис. Бо аажок улуг шеригден камгаланыр харыывыс чок-тур. Бис сенден дуза манап тур бис’.
Иегова оларны дыңнап турар база бодунуң бараалгакчыларының бирээзин чонга чарлаар кылдыр хей-аът киирген: ‘Бо дээрге силерниң эвес, а Бурганның тулчуушкуну-дур. Силерниң тулушкан херээңер чок болур. Иегова силерни канчаар камгалаарын чүгле анаа көөр силер’.
Дараазында хүн Иосафа́т чонну: ‘Иеговага идегеңер!’ — деп кыйгырып турар. Ооң соонда шеригниң мурнунга ыраажыларны ол тургузуптарга, олар чыскаал кылажы-биле чорбушаан, Иеговага мактал ырларын ырлажып турар. Олар тулчуушкун черинче чоокшулап кээрге, чүү болганын, билир сен бе? Иегова дайзынның дайынчыларын бот-боттарынче удурландырыпкан. Изра́ильчилер тулчуушкун черинге чедип кээрге, ол-дур — дайзыннар шупту өлүг чыткан!
Иеговага идегээш, Иосафа́т мерген угаанныг болган эвес-тир бе? Бир эвес Аңаа идегээр болзувусса, бис база мерген угаанныг чорук кылыр бис.