КӨРЕМ, чон бо аныяк оолду канчаар кыжырып турар-дыр. Ол кымыл, билир сен бе? Ол Иереми́я-дыр. Бурганның сураглыг медээчизи.

Ио́сия чуртунда дүрзү-бурганнарны узуткап эгелээн соонда, үр болбаанда, Иегова Иереми́яга Ооң медээчизи апаар кылдыр дужааган. Ынчалза-даа Иереми́я бодун эмин эртир аныяк деп санап турар. Ынчалзажок Иегова ону деткиирин аазаан.

Иереми́я изра́ильчилерни багай херектер кылырын соксадырынче кыйгырып турар. ‘Чоннарның чүдүп турар бурганнары меге’,— деп, ол чугаалап турар. Ынчалза-даа хөй изра́ильчилер алыс шын Бурган Иеговага чүдүүрүнүң орнунга, дүрзү-бурганнарга чүдүүрү дээре деп санап турар. Иереми́я Бургандан удавас кээр кеземче дугайында чонга чарлаарга, олар ону чүгле кыжырып турар.

Чылдар эртип турар. Ио́сия өлүп каарга, үш ай болгаш ооң оглу Иоаки́м хаан апарган. Иереми́я ол-ла хевээр чонга чарлавышаан: ‘Бир эвес эттинип албас болзуңарза, Иерусали́м буураар’.— ‘Ындыг сөстер дээш сени өлүрер херек’,— деп, бараалгакчылар алгыржып турар, оон Иереми́яны тудуп алган. Ооң соонда олар изра́ильчи нояннарга: ‘Иереми́яны өлүрүп шаажылаар херек — ол бистиң хоорайывыска удур чүве чугаалап турар’,— дишкеннер.

Иереми́я канчаар ам бодун алдынарыл? Ол коргушка алыспаан! Ол ажыы-биле чугаалаан: ‘Бо сөстерни Иеговадан чугаалап тур мен. Бир эвес эттинип албас болзуңарза, Иегова Иерусали́мни буурадып кааптар. Ынчалза-даа билип алыңар: мени өлүрер болзуңарза, шынчы кижини өлүрген боор силер’.

Нояннар Иереми́яны дириг артырып каан, ынчалза-даа изра́ильчилер ол-ла хевээр эттинмээн. Сөөлзүредир Навуходоно́сор деп вавилончу хаан келгеш, Иерусали́мге удур тулушкан. Сөөлүнде кээп Навуходоно́сор изра́ильчилерни кулдар кылып алган. Муң-муң изра́ильчилерни Вавило́нче аппарган. Чүгле бодап көр даан, сыр өске кижилер сени бажыңыңдан танывазың чуртче аппаары дээрге, чүү деп чүвел!