ЧҮГЕ бо кижи бодунуң халадын кезектерге ора тыртып тур, билир сен бе? Ынчаар кылырын аңаа Иегова дужааган. Ол — Бурганның Ахия деп аттыг медээчизи-дир. Медээчи деп кымыл, билир сен бе? Бурган ол кижиге келир үеде чүү болурун баш бурунгаар айтып бээр.

Ахия-биле ам чугаалажып турар кижини Иеровоам дээр. Соломо́н ону чамдык тудуг ажылдарының хайгааракчызы кылдыр тургузуп каан. Ахия Иеровоамга орукка таваржы бергеш, бир-ле элдеп чүвени кылып турар. Бодундан чаа халатты ужулгаш, ону 12 кезекке ора тыртыпкан. Оон ол Иеровоамны: ‘Бодунга он кезектен ап ал’,— деп дилээн. Ахия Иеровоамга он кезекти чүге бергенил, билир сен бе?

Иегова Соломо́ндан күрүнезин хунаап алыр деп шиитпирлээнин, Ахия тайылбырлап турар. Ынчангаш он төрел бөлүктү Иегова Иеровоамга бээр деп бодап алган. Ынчап кээрге Соломо́ннуң оглу Ровоамның башкарылгазының адаанга чүгле ийи төрел бөлүк артар.

Соломо́н ол дугайында билип кааш, хөлчок килеңнээн. Ынчангаш Иеровоамны өлүрерин оралдажып турар. Ынчалза-даа Иеровоам Еги́петче дезе берген. Элээн үе эрткенде Соломо́н мөчээн. Ол дөртен чыл иштинде хаан турган, ам ооң орнунга ооң оглу Ровоам хаанай берген. Иеровоам Соломо́ннуң өлүмүнүң дугайында дыңнааш, Изра́ильче эглип келген.

Ровоам — багай хаан-дыр. Ол кижилерни адазы Соломо́ндан артык багай кылдыр аажылап турар. Иеровоам болгаш өске каш сураглыг кижи Ровоам хаанга келгеш, чонну эки кылдыр аажылаарын дилээн. Ынчалза-даа Ровоам оларны дыңнавайн барган. Ол чонну биеэгизинге бодаарга, оон-даа багай кылдыр аажылап эгелээн. Ынчангаш чон Иеровоамны 10 төрел аймактың хааны кылдыр шилип алган, а өске ийи төрел бөлүк, Вениами́н биле Иу́да, Ровоам хаанның башкарылгазында артып калган.

Иеровоам чонун Иерусали́мге, Иегованың өргээзинге, барып чүдүвес кылдыр күзеп турар. Ынчангаш ол ийи алдын бугажыкты кылгаш, чонну ол бугажыктарга чүдүүрүн албадап турар. Удаваанда бүгү чурт каржы-дошкун болгаш күчүлел-биле дола берген.

Ийи төрел аймактыг күрүнеде база хөй халаптар бооп турар. Ровоамның хааннай бергенинден бээр беш-даа чыл эртпээнде, Еги́петтиң хааны Иерусали́мче дайылдажып үнүпкен. Иегованың өргээзинден ол дыка хөй эртинелерни апарган. Ынчангаш Бурганның өргээзиниң баштайгы турган хевири үр эвес турган.