ЧЕРДЕ кым чыдары ол, билир сен бе? Савл-дыр. Сактыр-дыр сен бе — ол кижи Стефа́нны даштар-биле соп каапкан кижилерниң хептерин кадарып турган. Көр даан — чырыктың карак чылчырыктадыр деп чүвезин! Ол чүү боор?

Стефа́нның өлүмүнүң соонда Савл Иисустуң талалакчыларның истеп сүрүүшкүннүн башкарган, соонда оларны хилинчектээри-биле. Ол бажың бүрүзүн кезип, оон христианнарны үндүр сөөртүп, оларны кара-бажыңче киир октап турар. Дыка хөй өөреникчилер өске хоорайларже дескеш, аңаа «буянныг медээни» суртаалдап турар. Ынчалза-даа Савл өске-даа хоорайларга оларны истеп сүрүп турар. Ол ам Дама́скыже углап бар чыдар. Ынчалза-даа хенертен орукка бир-ле кайгамчык чүве болган.

Хенертен дээрден чырык Савлды чылчырыктадыпкан. Көрүп турарың ышкаш, Савл черже кээп дүшкен. Ооң соонда үн дыңналган: ‘Савл, Савл! Мени чүге истеп сүрүп тур сен?’ Савлдың кады чораан эштери чырыкты база көрүп, үннү дыңнап турар, ынчалза-даа ол чүнүң дугайында чугаалап турарын олар билбейн турар.

— Кым сен, Дээрги?— деп, Савл айтырган.

— Мен сээң сүрүп турарың Иисус-тур мен,— деп үн аңаа харыылаан. Савл ооң өөреникчилерин истеп сүрерге, ооң бодун истеп, сүрүп турган дег аңаа шак ынчаар аарышкылыг, ынчангаш Иисус ынчаар чугаалап турар.

— Чүнү кылыр мен, Дээрги?— деп, Савл идегелин ышкынып, ыыткыр айтырган.

— Туруп келгеш, Дама́скыже бар,— деп, Иисус дужааган.— Аңаа баарыңга, чүнү кылырын улус чугаалап бээр. Савл тургаш, караан ажыдыпкан — ынчалза-даа ол чүнү-даа көрбейн турар. Ол согурарып калган! Ынчангаш ооң-биле кады чораан улус ону четкеш, Дама́скыже аппарган.

Ооң соонда Дама́скыда өөреникчилериниң бирээзинге Иисус дужааган: ‘Анания, туруп кел. Дорт дээр кудумчуга бар. Иу́даның бажыңындан Савл аттыг кижини айтырывыт. Мен ону бодумнуң тускай бараалгакчым кылдыр шилип алдым’.

Анания шак ынчаар кылган. Савлды тып алгаш, холдарын ооң кырынга салгаш чарлаан: ‘Карактарың катап көре берзин дээш база ыдыктыг сүлде сени бүргезин дээш, Дээрги мени сенче чорудупту’. Ол дораан Савлдың караандан казырык ышкаш чүве дүже берген, ынчангаш ол катап көрүп эгелээн.

Савл өске чоннардан кижилерге дыка хөй суртаалдап турар. Ам ол апостол Павел кылдыр билдингир апарган, дараазында эгелерден ооң дугайында оон-даа хөйнү билип алыр бис. Ынчаарга Бурган Пётрну кандыг херек дээш чоргусканыл, баштай билип алыылам.