БО Иисустуң талалакчылары-дыр. Олар ону дыңнап, Иерусали́мге манап артып калганнар. Олар ону манап турар үеде, бүгү бажың иштинге хенертен дааш үнген. Ооң даажы күштүг, дыңзып каап турар хатка дөмей болган. Оон өөреникчи бүрүзүнүң бажының кырынга от чалбыыжы көстүп келген. Бо хып турар чалбыыштарны көрүп тур сен бе? Ол чүү бооп турары ол?

Хуулгаазын болган! Иисус дээрже Адазынче эглип келгеш, өөреникчилеринче ыдыктыг сүлдени бүргедипкен. Ыдыктыг сүлде оларны чүүже оттуруп турарыл, билир сен бе? Шупту өөреникчилер янзы-бүрү дылдарга чугааланып эгелээн.

Ол үеде Иерусали́мге турган хөй кижилер күштүг хатка дөмей даашты дыңнааш, чүү болганын билип алыр дээш, чыглып келген. Оларның аразында Беженги хүннүң байырлалынче келген өске чоннардан улус турган. Оларның кайгаанын кайы-хире дээр! Бурганның кайгамчыктыг херектериниң дугайында оларның төрээн дылынга өөреникчилер чугаалап турарын олар дыңнап турган.

— Олар шупту Галиле́ядан болгай,—деп, улус кайгап турган.— Бистиң чурттарывыстың дылдарында олар канчап чугааланып турары ол?

Ынчан Пётр туруп келгеш тайылбырлаан. Шупту улус дыңнаар кылдыр, ыыткыр — Иисус канчаар шаажылаткан база ону Иегова канчаар өлүглерден диргискенин ол кижилерге чугаалап берген. ‘Ам Иисус дээрде Бурганның холунуң оң талазында,— деп, Пётр оларга дыңнаткан.— Ол аазааны ыдыктыг сүлдени бүргедипкен. Ынчангаш бо хуулгаазыннарны көрүп база дыңнап турарыңар ол-дур’.

Пётрнуң сөстериниң соонда, дыка хөй улус Иисус-биле кылган чүүлү дээш, аажок хараадап турар. ‘Чүнү кылыр болзувусса эки?’ — деп, олар айтырып турар. ‘Эттингеш, сугга суктурар ужурлуг силер’,— деп, Пётр тайылбырлап турар. Ол хүн 3 000 хире кижи сугга суктургаш, Иисустуң талалакчылары апарган.