КӨРЕМ — дээрниң төлээзи кара-бажыңның эжиин ажыдып тур. Оон Иисустуң апостолдарын хостап тур. Олар канчап ынаар кире бергенил, билип алыылам.

Иисустуң өөреникчилери ыдыктыг сүлдеге бүргеткен соонда, ол чүүл удаваанда болган. Мындыг чүве болган: бир катап хүндүс Пётр биле Иоа́нн Иерусали́мниң өргээзинче бар чыткан. Өргээниң эжииниң чанында кижи олурган — ол төрүмелинден бертик болган. Ону маңаа хүннүң-не эккеп каарга, өргээже кээп турар улустан ол акша дилеп турар. Пётр биле Иоа́нны көрүп кааш, кандыг-бир чүведен бээр кылдыр, ол чаннып турар. Апостолдар канчаарыл?

Олар доктаапкаш, ол ядыы кижиже көрген. ‘Менде акша чок,— деп, Пётр чугаалаан,— ынчалза-даа менде бар чүвени бээр мен. Иисустуң ады-биле тургаш, кылашта!’ Ынча дивишаан, ол кижиниң оң холундан тудуп алган — ол доп-дораан тура халааш, кылаштай берген. Чон болуп көрбээн хуулгаазынны көргеш кайгап, дыка өөрүп турар.

— Бо хуулгаазынны Иисусту өлүглерден диргискен Бурганның күжү-биле кылдывыс,— деп, Пётр тайылбырлаан. Олар чонга ону тайылбырлап турда, шажын баштыңчылары келген. Иисустуң дирилгениниң дугайында чонга чугаалап турары дээш, Пётр биле Иоа́ннче олар аажок кылыктанган. Ынчангаш оларны сегирип алгаш, кара-бажыңче киир октапканнар.

Дараазында хүн шажын баштыңчыларының улуг хуралы болган. Ынаар Пётрну, Иоа́нны, база оларның экирткени кижини эккелген. ‘Бо хуулгаазынны кандыг күш-биле кылдыңар?’— деп, олар апостолдардан харыы негээн.

Иисусту өлүглерден диргискен Бурганның күжү-биле — деп, Пётр оларга тайылбырлаан. Бараалгакчылар аайын тыппайн турар — ол болуп көрбээн хуулгаазын шынап болганынга, олар чөпшээрешпес аргазы чок. Ынчангаш, апостолдарга Иисустуң дугайында чугаалаарын хорааш, оларны салыпканнар.

Хүннер эртип турар, апостолдар Иисустуң дугайында суртаалдап, аарыг улусту экиртирин уламчылавышаан. Ол хуулгаазыннар дугайында дамчыыр чугаалар чоок кавыга дүрген тарай берген. Ынчангаш Иерусали́мге чоок хоорайлардан аарыг улузун эдертип алган кижилер, апостолдарга экиртир дээш, мөөңү-биле кээп турган. Шажын баштыңчылары адааргааш, апостолдарны сегиргеш, кара-бажыңче киир октапкан. Ынчалза-даа апостолдар аңаа үр болбаан.

Чурукта көргүскени ышкаш, дүне Бурганның төлээзи кара-бажыңның эжиктерин ажыдыпкан. ‘Үнүңер, өргээже баргаш, чонга чугаалаарын уламчылаңар’,— дээн. Дараазында эртен, шажын баштыңчыларының чоруткан кижилери, апостолдарның чиде бергенин көрүп каан. Сөөлзүредир олар апостолдарны өргээге чон өөредип турда тып алгаш, дээди иудей Чөвүлел мурнунда эккелген.

— Иисустуң дугайында өөредирин силерге кончуг шыңгыы хорудувус чоп,— деп, шажын баштыңчылары хорадап турар.— Силер дээрге өөредииңер-биле Иерусали́мни долдурупкан силер.— Кижилерге эвес, а Бурганга колдадыр чагыртыр ужурлуг бис,— деп, ол чүүлге апостолдар харыылаан. Ынчангаш олар «буянныг медээни» улаштыр суртаалдап турганнар. Бо үлегер алыр кайгамчык чижек эвес-тир бе?