КӨР ДААН, корабль-биле чүү болган-дыр! Ол буступ тур! Көрем — шупту кижилер сугже шурагылапкан. Оларның чамдыызы эрикче эштип чорупкан. А бо, Павел эвес-тир бе? Ооң-биле чүү болганыл, билип алыылам.

Сактып келем — Павел Кесарияның кара-бажыңынга ийи чыл иштинде олурган. Оон ону элээн каш хоругдаткан кижилер-биле корабльге олурткаш, Римче чортупкан. Крит ортулуктуң чоогунга олар коргунчуг шуурганга таварышкан. Хаттың күштүүнге корабльди башкарар арга чок. Хүндүс хүн, а дүне — сылдыстар көзүлбес. Ынчангаш хөй хүннер эртерге, корабльде кижилер дириг артар идегелин шуут ышкыныпкан.

Ынчан Павел туруп келгеш: ‘Силерниң араңардан кым-даа өлбес, чүгле корабль буступ каар. Бо дүне меңээ Бурганның төлээзи келгеш мынча диди: „Кортпа, Павел! Сен, Римниң башкарыкчызы, це́зарьның мурнунга турар ужурлуг сен. Ынчангаш Бурган сээң-биле корабльде турар шупту кижилерни камгалап алыр“’.

Шуурганның 14-кү хүнүнде, дүн ортаа үезинде, далайжылар сугнуң тереңи бичиилеп сыыгап эгелээнин эскерип каан! Караңгыда хаяларга үзүптеринден корткаш, олар якорьларны октапкан. Эртен эрте олар бичии мугулдур көрүп каан. Корабльды эрикче чоокшуладырын оралдашкан.

Олар эрикке барык чоокшулай бергенде, корабль элезинниг сыык черже кадалгаш, доктаай берген. Ынчан чалгыглар ону кезектерге чара шаап эгелээн. Харыысалгалыг чүс шериг баштыңчызы дужааган: ‘Шупту эштип билир улус, баштай-ла сугже шурай бергеш, эрикче эштиңер. А арткан улус, оларның соондан шураңар, сугга дүшпези-биле, корабльдиң бузундуларындан туттунуңар’. Олар шак ынчаар кылган. Ынчангаш, дээрниң төлээзиниң аазааны дег, корабльге турган шупту 276 кижи менди-чаагай эрикке четкен.

Оларның дүшкен ортулуунуң адын Ма́льта дээр. Ол черниң чурттакчылары аажок эвилең-ээлдек болгаш, олар корабльдың кижилери дээш сагыш човап турар. Агаар аязы бээрге, Павелди өске корабльче олурткаш, Римче чоргузупкан.