КӨРҮП тур сен бе, Павелдиң холун кинчилеп каан, а чанында ону рим шеригжи кадарып тур. Павел ам Римниң кара-бажыңында. Ол Римниң це́зары чүнү шиитпирлээрин манап турар. Павел хоругдаткан-даа болза, аңаа кижилер кээп болур.

Римге келгеш үш хонганда, Павел иуде́й баштыңчыларны чалаан. Ынчан Римде чурттап турар хөй иуде́йлер аңаа келген. Павел оларга Иисустуң дугайында база Бурганның чагыргазының дугайында суртаалдап турар. Чамдыктары аңаа бүзүрээш, христианнар апарган, а өскелери бүзүревейн турар.

Ону кадарып турар янзы-бүрү шериглерге база Павел суртаалдап турар. Кара-бажыңга тургаш ол ийи чыл дургузунда Павел кымга болдунарыл, шуптузунга суртаалдап турган. Безин це́зарьның бажыңындан кижилер Чагырга дугайында буянныг медээни дыңнап турар, ынчангаш оларның чамдыызы христианнар апарган.

Ынчаарга стол артында бижиттинип олурар кижи кымыл? Билир сен бе? Шын-дыр — Тимофей-дир. Тимофей база Чагырга дугайында суртаал ажылы дээш хоругдаттырып турган, ол ам хосталгада. Бээр ол Павелге дузалажыр дээш келген. Тимофе́й ам чүнү бижип олурарыл, билир сен бе? Билип алыылам.

110 дугаар чугаада бижээн Фили́ппы биле Эфе́с деп хоорайларны сактыр-дыр сен бе? Ол хоорайларга христиан хуралдар үндезилээринге Павел дузалажып турган. Ам, кара-бажыңга тургаш, Павел ол христианнарга чагаалар чоргузуп турар. Олар Библияда бар болгаш «Ефесчилерге» биле «Филиппийжилерге» деп аттыг. Таптыг-ла ам Павел Фили́ппы хоорайның христианнарынга чагааны Тимофе́йге адап берип тур.

Филиппийжилер Павелге хөй эки чүүлдер кылган. Олар аңаа кара-бажыңче белек чоргузуп бээрге, Павел ол дээш оларга өөрүп четтирип турар. Белекти Епафродит эккелген. Ынчалза-даа ол соонда берге аарааш, өлүр часкан. Ам ол чүгээртээн: удавас ол чанып кээр. Павел биле Тимофе́йден чагааны Фили́ппыже ол аппаар.

Павел хоругдалга турган үезинде, оон өске, Библияда база бар, ийи чагаа бижээн. Оларның бирээзин Колоссы хоорайның христианнарынга бижээн. Ооң адын чүү дээр, билир сен бе? «Колоссчуларга». Ийи дугаар чагааны, база Колоссы хоорайда чурттап турар, Павелдиң чоок эжи болур Филимо́нга бижээн. Чагаада Филимо́ннуң кулу Онисимниң дугайында чугаалаан.

Онисим Филимо́ндан дескеш, Римче чедип келген. Павел кара-бажыңда олурар деп чүвени бир-ле арга-биле ол билип алган. Кажан ол Павелге ужуражып кээрге, Павел аңаа суртаалдаан. Удаваанда Онисим база христиан апарган. Ам Онисим дескени дээш хараадап турар. Ынчаарга Павел Филимо́нга чүнү бижип турар, билир сен бе?

Филимо́н Онисимни өршээр кылдыр, ол дилеп турар. ‘Мен сенче Онисимни дедир чоргузуп тур мен,— деп, ол Филимо́нга дыңнаткан.— Ынчалза-даа ол ам сээң анаа-ла кулуң эвес. Ол ам арта дыка эки христиан дуңмаң-дыр’. Колоссыже дедир чанарда, Онисим ол ийи чагааны ап алган: бирээзин — колоссчуларга, өскезин — Филимо́нга. Ооң кулу христиан апарганын билип кааш, Филимо́н кайы-хире өөрээнин бодап болур бис.

Кажан Павел филиппийжилерге база Филимо́нга бижиирде, ол шынап-ла өөрүшкүлүг медээлиг. ‘Силерже Тимофе́йни чоргустум,— деп, Павел филиппийжилерге дыңнаткан.— Ынчалза-даа удавас бодум база чеде бээр мен’. Филимо́ндан ол дилеп турар: ‘Туруп алыр черден меңээ белеткеп берем’.

Павел хосталгаже үнүп келгеш, ооң христиан акы, угбалары чурттап турар аңгы-аңгы хөй черлерже барган. Ынчалза-даа соонда Павелди Римде кара-бажыңга катап олуртуп каан. Бо удаада ону өлүрүп шаажылаар деп, ол билир. Ынчангаш ол Тимофе́йге далаш-биле келирин бижээн. ‘Мен Бурганга шынчы арткан мен, ынчангаш Бурган мени шаңнаар’,— деп, Павел чагаага бижээн. Павелди өлүрүп шаажылаан соонда каш чыл эрткенде, Иерусали́мни ийи дугаар бускан, бо таварылгада — ри́мчилер.

Ынчалза-даа Библияда бижээн чүүл чүгле ол эвес. Иегова Бурган апостол Иоа́нны Библияның сөөлгү номнарын, ол ышкаш Ажыдыышкын номун бижииринче оттурган. Ол библейжи номда келир үе дугайында чугаалап турар. Келир үе чүнү эккээрил, ам билип алыылам.